Është hapur konkursi për drejtorë të gjashtë klinikave në Qendrën Klinike Universitare.

Shërbimi Spitalor Klinik Universitar ka shpallur konkursin për drejtorë të gjashtë klinikave në kuadër të QKUK-së.

Konkursi është hapur për Klinikën e ORL-së, Neurologjisë, Psikiatrisë, Radiologjisë, Onkologjisë dhe Kirurgjisë së Fëmijëve.

Ndërkaq, drejtorëve që iu ka skaduar mandati iu është vazhduar detyra deri në përfundim të procedurave të konkursit.

Për të marr nën drejtim një nga këto klinika, kandidatët duhet të kenë arsimim të lartë universitar, thirrje akademike ose shkencore të lëmisë së caktuar. Në mungesë të tyre, përzgjidhen kandidatët nga radhët e specialistëve.

Kandidatët duhet të kenë pesë vite përvojë pune profesionale në sistemin shëndetësor.

Në prag të vitit të ri, ministri i Punëve të Brendshme, Xhelal Sveçla bashkë me presidenten Vjosa Osmani, kanë vizituar sot Policinë e Kosovës dhe Brigadën e Zjarrfikësve në Prishtinë, me ç’rast ka kërkuar nga qytetarët që të festojnë me zemër dhe jo me armë.

Sveçla përmes një njoftimi në Facebook ka kërkuar po ashtu për kujdes maksimal në natën e sotme, duke i ftuar ata që të festojnë me dashuri e ngrohtësi me ata që i kanë pranë.

“Apeloj për kujdes maksimal në natën e sotme të ndërrimit të motmotit. Festoni me zemër, me dashuri e ngrohtësi me ata që i keni pranë dhe jo me armë që të rrezikoni jetën e tyre”, ka apeluar ai.

Ministri i Punëve të Brendshme nuk ka lënë pa kërkuar kujdes të shtuar edhe përball pandemisë.

“Zyrtarët policorë dhe Zjarrfikësit sonte do të jenë në detyrë për sigurinë e të gjithë qytetarëve edhe pse do të jetë festë. Gjej rastin të falënderoj të gjithë zyrtarët policor, zjarrfikësit, zyrtarët e të gjitha institucioneve të Republikës së Kosovës për punën dhe angazhimin e tyre përgjatë gjithë këtij viti. Bashkë do të vazhdojmë punën edhe më intensivisht por më i rëndësishmi mbetet shëndeti juaj dhe i gjithë qytetarëve tanë. Ne po përballemi me variant të ri të virusit COVID-19 andaj ju lutem për kujdes ndaj vetes, të afërmve tuaj dhe qytetarëve tanë. Uroj për një vit të shëndetshëm, të suksesshëm e prosperues për të gjithë ju”, ka shtuar ai.

Kryetari i Aleancës për Ardhmërinë e Kosovës, Ramush Haradinaj, ka uruar qytetarët për Vitin e Ri 2022.

“Kosova po e përmbyll një vit shumë të rëndë. Një vit të përballjes me sëmundjen e shekullit dhe me gjithë pasojat e saj. Vit të përballjes me krizë ekonomike, sociale e politike”, shkroi Haradinaj në një postim në Facebook.

“Prioriteti ynë më i madh mbetet shëndeti dhe mirëqenia juaj. Obligimi ynë që Kosova të bëhet më e jetueshme”.

Tutje Haradinaj tha se do pëpiqet të forcojnë miqësinë me ShBA-të dhe të vazhdojnë rrugën për anëtarësim në NATO”.

“Sonte në prag të ndërrimit të motmoteve, kujtojmë me respekt, ata që ranë për liri, duke qenë gjithmonë mirënjohës për sakrificën e tyre. Falënderues për secilin qytetarë të Kosovës ose të huaj, që shërbeu për lirinë, paqen e sigurinë e vendit tonë”, u shpreh deputeti.

“Ju uroj gjithë të mirat në vitin 2022. Paçi shëndet, harmoni e mbarësi në familjet tuaja”, përfundoi Haradinaj.

Kryetari i Partisë Demokratike, Memli Krasniqi, ka uruar qytetarët për ndërrimin e motmoteve.

Krasniqi falënderoi profesionistët shëndetësorë, policët e mësimdhënësit për punën e tyre në një vit pandemik.

Tutje ai falënderoi sportistët dhe artistët për lartësimin e flamurit të Kosovës.

Krasniqi veçanërisht uroi ish-presidentin Hashim Thaqi dhe ish-kryetarin e partisë së tij, Kadri Veselin, si dhe ish-krerët tjerë të UÇK-së të cilët po mbahen në Hagë.

“Ndonëse padrejtësisht e presin të mbyllur ndërrimin e motmoteve, janë krenarë që populli i Kosovës feston i lirë”, u shpreh deputeti.

Ministria e Shëndetësisë, sipas të dhënave nga Instituti Kombëtar i Shëndetësisë Publike të Kosovës, ka njoftuar se 42 qytetarë kanë rezultuar pozitiv me virusin COVID-19 dhe nga 30 mostra të marra kanë rezultuar pozitiv 8 raste me variantin Omicron.

Gjatë 24 orëve të fundit, nuk është shënuar asnjë rast i vdekjes.

Sot janë shëruar 8 qytetarë, derisa numri i përgjithshëm i të shëruarve është 158.041. Në total numri i rasteve aktive është 453.

Në anën tjetër, në 24 orët e fundit janë dhënë 2.018 doza të vaksinës kundër COVID-19.

Prej fillimit të vaksinimit në të gjitha qytetet e Kosovës janë dhënë 1.673.578 doza të vaksinës. Deri më sot 782.696 qytetarë janë vaksinuar me dozën e dytë.

Policia e Kosovës, ka bërë të ditur se gjatë natës në rrugën “Ukshin Kovaçica”, kanë vërejtur se brenda një lokali po zhvilloheshin veprimtari të kundërligjshme “Organizim i skemave piramidale dhe bixhozit të paligjshëm”.

Tutje, në njoftimin e policisë bëhet e ditur se brenda lokalit janë hasur 22 persona, ndërsa në cilësi të provave janë gjetur dhe sekuestruar 782 mjete të ndryshme që shërbejnë për lojëra fati

“Gjësendet e sekuestruara do të shërbejnë si dëshmi materiale dhe janë proceduar në rastin në fjalë”.

“Lidhur me rastin në cilësi të të dyshuarve janë intervistuar personat të cilët pas intervistimit janë liruar në procedurë të rregullt”, thuhet në njoftimin e Policisë së Kosovës.

Gjithashtu, policia njofton së të njëjtëve u janë shqiptuar edhe gjoba për mosrespektim të masave kufizuese kundër pandemisë.