Ka vdekur në moshën 93-vjeçare, nëna e ish-kryetarit të Partisë Demokratike të Kosovës, Kadri Veseli, Ajshe Veseli.

Kadri Veseli brenda gjashtë muajsh ka humbur të dy prindërit, teksa po mbahet i paraburgosur në Gjykatën Speciale në Hagë, raporton arbresh.info.

Por, ende nuk dihet nëse Veseli do të lejohet të vijë në varrimin e nënës së tij.

Nga Gjykata Speciale në një përgjigje për arbresh.info thonë se korniza ligjore e Dhomave të Specializuara u mundëson personave në paraburgim që të bëjnë kërkesa tek paneli kompetent kur ka arsye bindëse humanitare.

Se a do të lejohet Veseli të vijë në Kosovë pritet të vendos paneli.

“Korniza ligjore e Dhomave të Specializuara të Kosovës u mundëson personave në paraburgim që të bëjnë kërkesa tek paneli kompetent kur ka arsye bindëse humanitare. Paneli do të vendos për kërkesa të tilla”, tha zëdhënësja e Dhomave të Specializuara të Kosovës në Hagë, Angela Griep.

Kujtojmë se pasi i vdiq babai Kadri Veseli u lejua që të merrte pjesë në të pame, për t’u kthyer sërish në Qendrën e Paraburgimit të Gjykatës Speciale në Hagë. Fazli Veseli vdiq më 7 korrik të vitit të kaluar, në moshën 94-vjeçare./arbresh.info/

Oda e Afarizmit të Kosovës i ka bërë thirrje Qeverisë Kurti që të bëjë ndryshime urgjente në festat zyrtare. Nëpërmjet një komunikate, Oda shkruan se zëvendësimi i ditëve të festave që bien në ditë vikendi është praktikë që po e dëmton vendin në aspektin financiar e ndërkombëtar.

“OAK kërkon që festat zyrtare të mos zëvendësohen me ditë punë në rastet kur ato bien gjatë ditëve të vikendit, por ditë pushimi të jetë vetëm dita e cila është ditë pushimi”, thuhet tutje.

Përhapja marramendëse me shifër eksponenciale e variantit të ri Omicron, që në fillim shkaktoi frikë dhe panik, si duket do të jetë shpresa dhe rruga dalëse nga tuneli i zi i shkaktuar nga pandemia dyvjeçare e Covidit-19.

Observimet dhe të dhënat e studimeve klinike nga Afrika e Jugut ku u paraqit fillimisht ky variant dhe pastaj ato në Danimarkë e Britani të Madhe, e ditëve të fundit edhe në Francë, tregojnë se ky variant hiperkontagjioz prek të gjitha moshat dhe kategoritë, me një preferencë për personat e vaksinuar, sipas Dr. Martin Blachierit, i cili bazohet në studimin e fundit të publikuar nga Ministria e Shëndetësisë së Danimarkës.

Mirëpo, e mira në këtë të keqe është se ky virus është shumë më pak virulent edhe përkundër numrit shumë të madh të të infektuarve; jep shumë më pak forma të rënda dhe më pak spitalizime në raport me format paraprake e në veçanti krahasuar me variantin Delta.

Dhe, si shpjegohet ky fenomen i hiperkontagjiozitetit dhe dobësimit kaq të ndjeshëm të virulencës së variantit Omicron ?

Mutacionet natyrale të viruseve ndodhin çdoherë dhe janë të natyrave të ndryshme. Viruset nuk mund të jetojnë e as shumëzohen jashtë nikoqirit, meqenëse nuk kanë sistem metabolik komplet që mundëson replikimin e tyre dhe për këtë ata përdorin ribozomet e sistemin metabolik intraqelizor. Pra, për të mbijetuar, virusi duhet të futet brenda qelizës. E, për t’u futur në qelizë duhet të gjejnë çelësin i cili do të kapet nga receptorët përkatës (në këtë rast në qelizat e mukozave të sistemit të sipërm respirator). Lidhja e “çelësit” me “bravën” do të shkaktojë një reaksion kimik i cili do ta shpërthejë membranën qelizore dhe virusi futet në qelizë ku do të shumëzohet (inkubacioni).

Dhe, pikërisht Omicroni ka pësuar mutacione të shumta për të gjetur çelësin që hapë çdo bravë, edhe nëse ato janë të mbrojtura nga “ushtarë” të krijuar nga infeksioni natyror apo nga vaksina e administruar.

Mirëpo, pas çdo mutacioni në proteinën S, e cila forcon depërtueshmërinë, virusi do të humbë nga fuqia apo virulenca. Dhe, ky është fati i mirë.

Omicroni është një variant i SAR-Cov-2-shit, një linjë e re poligjenetike B.11.529 – sipas nomenklaturës Pango – e cila karakterizohet nga numri i shumtë i mutacioneve. Deri tani ka shënuar 60 mutacione e prej tyre 30 vetëm në proteinën S (Spike).

Proteina Spike e cila gjendet në sipërfaqen e virusit është çelësi që mundëson futjen e virusit brenda qelizës ku ai lidhet me receptorët specifikë qelizorë të mukozës së rrugëve të sipërme të frymëmarrjes. Pasi të futet në qelizë, virusi liron ARN-në e vet dhe fillon replikimi i ti. Pra, viruset janë parazitë intraqelizor që nuk mund të shumëzohen pa përdorur metabolizmin e nikoqirit. Dhe, i gjithë sistemi imunitar i provokuar nga infeksioni apo nga vaksina është i përqendruar në krijimin e antitrupave kundër kësaj proteine, për ta penguar pikërisht futjen e virusit në qelizat tona.

Fakti se virusi Omicron ka pësuar 30 mutacione vetëm në proteinën S, flet se virusi ka dashur dhe ka arritur t’i ikë mbrojtjes imunitare fituar përmes infeksioneve apo vaksinimeve. Kjo e ka bërë variantin Omicron tepër kontagjioz, dhjetë herë më shumë se varianti inicial i Wuhanit. Ky variant “shëtit” lirshëm te personat e vaksinuar edhe me tre doza, te moshat e reja, te fëmijët dhe te personat që janë infektuar me variantet paraprake. Andaj, sipas të gjitha gjasave nuk ka metodë efikase që mund ta ndalojë përhapjen eksponenciale të këtij varianti.

Cunami Omicron shpejtë pritet të kontaminojë gjithë planetin me çmimin e një ftohjeje banale të rrugëve të sipërme të frymëmarrjes e që shumë më pak prekë mushkëritë për dallim nga variantet paraprake.

Të gjitha projeksionet janë se Omicroni shpejtë do të krijojë imunitetin kolektiv. Imuniteti post-Omicron pritet të jetë më solid dhe në bashkëveprim me imunitetin post-vaksinal do të jetë më i qëndrueshëm dhe mund t’i jap fund pandemisë.
P.S. Mikrobota është univers në vete dhe funksionimi ynë është i lidhur ngushtë me të. Si duket, çdo prishje e këtij balanci që zakonisht bëhet jo nga pa dija, por nga egoizmi njerëzor, dosido do të vë në aksion mikrobotën e cila do të luftojë për ekzistencën e saj dhe në fund do të vë rregull. Të shpresojmë se gjeneratat e reja do të jenë më koshiente dhe më të ndërgjegjshme se tonat.

Analisti politik, Albert Krasniqi ka reaguar sot lidhur me çështjen e konfiskimit të pasurisë së pajustifikueshme, ndërsa theksoi se kjo duhet të bëhet për të vendosur drejtësi dhe barazi, ndërkaq rroga e vogël e fitimi i madh duhet të marrë fund.

Krasniqi në një postim në Facebook shkruan se me iniciativën e Qeverisë për themelimin e Byrosë Shtetërore për Verifikimin dhe Konfiskimin e Pasurisë së Pajustifikueshme, amnistohen të gjithë ata që janë pasuruar në mënyrë të paligjshme.

Lexoni të plotë postimin e Krasniqit:

Konfiskimi i pasurisë së pajustifikueshme duhet të bëhet për të vendosur drejtësi e sjellë barazi. Rroga e vogël e fitimi i madh, duhet të marrë fund!

Por me iniciativën e Qeverisë për themelimin e Byrosë Shtetërore për Verifikimin dhe Konfiskimin e Pasurisë së Pajustifikueshme, amnistohen të gjithë ata që janë pasuruar në mënyrë të paligjshme:

– Në pesë vitet e para të procesit të privatizimit (2003-2008);

– Para shpalljes së pavarësisë në 2008;

– Që nuk kanë ushtruar funksionin publik që 10 vite.

Përveç këtyre, ligji i propozuar është edhe në kundërshtim me Kushtetutën.

– E para, shkel liritë dhe të drejtat themelore, respektivisht parimin e prezumimit të pafajësisë. Me këtë ligj, pala është e fajshme derisa nuk të provohet ndryshe.

– E dyta, cenon parimin e ndarjes së pushteteve, pasi i atribuon administratës kompetencat e prokurorisë. Pushteti legjislativi ndërhynë në punën e pushtetit gjyqësor.

– E treta, Kuvendi tejkalon kompetencat e veta, pasi Byrosë i jep statusin e institucionit të pavarur. Kushtetuta ka përcaktuar institucionet e pavarura dhe funksionet e tyre, kurse përmes ligjit Kuvendit i ka mundësuar vetëm themelimin e agjencive të pavarura.
Nëse këto shkelje janë bërë nga mosdija, edhe mund të falen. Por nuk mund të falen nëse janë bërë me qëllim sa për të nxitur kundërshtimin e opozitës, për ta fajësuar pastaj se është kundër konfiskimit të pasurisë së pajustifikueshme.

Kjo iniciative nuk guxon të shpërdorohet, vetëm sa për qëllim të ndërtimit të strategjisë së fushatës së ardhshme zgjedhore.

Konfiskimi i pasurisë së pajustifikueshme duhet të jetë proces serioz, i menduar mirë, i pa kompromis dhe që nuk amniston askënd! Jo një mekanizëm i partisë/koalicionit në pushtet për të përndjekur opozitën përmes një Drejtori që e zgjedh me votim të hapur dhe e shkarkon sa herë të dojë. /Telegrafi/