Pas reshjeve të borës qarkullimi në rrugët e vendit është vështirësuar. Detaje për këtë ka dhënë Mal Lokaj, nga Ministria e Infrastrukturës.

Pavarësisht ankesave të shumta të qytetarëve, Lokaj thotë se gjendja e rrugëve është e mirë.

“Momentalisht sipas informacioneve nga menaxherët e shtatë regjioneve të Kosovës, gjendja e rrugëve nacionale dhe regjionale, pra këto rrugë janë në kompetencë të Ministrisë, dhe dy autoudhët, është e mirë. Nuk mund të themi që është perfekte, por rrugët janë të qarkullueshme në të gjitha lokacionet edhe në të gjitha pozicionet gjeografike”, tha Lokaj për RTVDukagjini.

Ai thotë se janë përgatitur dhe s’presin vështirësi në mirëmbajtjen e rrugëve as në javët e ardhshme.

“Operatorët ekonomik që janë përzgjedhur nga Ministria për mirëmbajtjen e rrugëve janë të përgatitur, me staf, me makineri dhe me materialin e nevojshëm që nevojitet për mirëmbajtjen e rrugëve”, tha Lokaj.

Zëdhënësi i KEDS-it, Viktor Buzhala, ka thënë se pritet të ketë një rritje të faturave të energjisë elektrike për 30 deri 40 për qind, në dy shqyrtimet që do t’i bëjë Zyra e Rregullatorit të Energjisë (ZRRE).

“Gjatë këtyre ditëve presim ZRRE-ja të marrë vendimin nga aplikimi që kemi bërë për shqyrtim të jashtëzakonshëm tarifor. Presim të ketë rritje të çmimit, pasi kemi bërë kërkesën bazuar në formulë. Në bazë të shpenzimeve që i kemi pasur e kemi bërë atë kërkesë. E presim të ketë refleksion. Duhet ta cekim se do të ketë edhe një shqyrtim të rregullt pastaj në pranverë. Për tarifat që hyjnë në fuqi nga 1 prilli i këtij viti e deri më 31 mars të vitit vijues. Është proces i rregullt, pritet sërish të ketë rritje. Por, ne nuk jemi autoriteti që vendos është ZRRE-ja. Fatkeqësisht do të jetë rritje relativisht e lartë. Do të jetë rritje 30 deri 40 për qind në bazë të vlerësimeve që i bëjmë, për të dy herët them. Por ende nuk kemi as shqyrtimin e jashtëzakonshëm e pastaj duhet bërë kërkesë edhe për shqyrtimin e rregullt”, ka thënë Buzhala në emisionin SOT të KTV-së.

Ai ka treguar se aktualisht sistemi elektroenergjetik i vendit ka një xhiro rreth 300 milionë euro në vit, kostoja e kësaj krize mund të shkojë së paku 100 milionë euro shtesë. Kjo ndahet në 600 mijë konsumatorë, ka shtuar Buzhala.

Ai ka treguar se gjendja e energjisë është përmirësuar dhe nuk ka pasur reduktime këtë vit, me përjashtim të disa prishjeve.

Ka thënë se subvencionimi i KEK-ut me 20 milionë euro, pastaj rënia e çmimeve të energjisë në treg e po ashtu moti i mirë shkuan në favor.

Ministrja e Arsimit, Arbërie Nagavci, duke folur për raportin me sindikatat ka thënë se i shohin si partner me të cilin duhet të punojnë për të përmirësuar kushtet për mësimdhënësit ashtu si edhe rezultatet në përgjithësi.

“Tani sindikatat janë më të zëshme për pagat e mësimdhënësve dhe natyrisht se ky është edhe një preokupim i joni dhe duhet të kujdesemi që të kemi një trajtim korrekt, të barabartë dhe parimor për të gjithë punëtorët që janë të përfshirë në sistemin e arsimit duke u kujdesur që të respektohet parimi bazë për punë të njëjtë pagë të njëjtë. Edhe udhëzimi administrativ për licensimin e mësimdhënësve i cili asnjëherë nuk është përfillur në tërësi edhe ky për vlerësimin e performanës së mësimdhënësve bashkë me Ligjin për Pagat dhe një varg politikash të tjera duhet të dërgojë drejt një pike ku rriten kompetencat e mësimdhënësve, ku iu ofrohet mbështetje për punën e tyre dhe edhe ku shpërblehen për punën që e bëjnë. Sindikatat, në përgjithësi, i shohim si palë me të cilët duhet të punojmë për të përmirësuar kushtet e punës së mësimdhënësve por edhe për të pasë rezultate më të mira. Nuk po i referohem individëve të caktuar, por si organizatë sindikale natyrisht se në rolin që duhet të luajnë duhet të kenë për bazë disa qëllime përfshirë përmirësimin e kushteve për punë që janë po aq të rëndësishme sa pagat por natyrisht edhe për përmirësimin e rezultateve në përgjithësi”.

Nagavci, në Info Magazine të Klan Kosovës, ka treguar nëse ndjehet në presion nga ultimatumi i SBASHK-ut për grevë nëse deri në muajin mars nuk hartohet Ligji i ri për Paga.

“Jo, asnjëherë. Personalisht as nuk kam ndjerë ndonjë presion, sepse e kam thënë që në intervistën time të parë si ministre se as mua si ministre dhe as Qeverinë Kurti nuk mund të na shantazhojë askush. Ne i kemi të qarta synimet dhe qëllimet tona në përmirësimin e rezultateve në të nxënit, derisa mësimdhënësit dhe menaxhmenti i shkollave janë partnerë tanë tepër të rëndësishëm. Meqë edhe vet vij nga fusha e mësimdhënies ku kam punuar gjatë jam shumë e vetëdijshme për vëmendjen, interesimin dhe vullnetin e mësimdhënësve për të dhënë më të mirën të mundshme. Shumë herë debatet dhe diskutimet që janë hapur kanë qenë të paqena dhe janë krijuar shumë shpesh tituj që nuk e kanë paraqitur realitetin, sepse nga dita ime e parë e punës bashkë me kabinetin, zyrtarët e ministrisë dhe qeverinë kemi synim që të punojmë maksimalisht për të arritur më të mirën e mundshme. Asnjë presion apo shantazh nuk do të na pengojë që të arrijmë qëllimet tona”.