Mërgimtarë nga Kosova që janë nisur për në Gjermani, me kompaninë “T…. Tours, janë duke pritur tash e sa orë në kufirin Serbi – Hungari.

Të paktën kështu ka thënë Faton Haxhaj, i cili është njëri nga udhëtarët e këtj autobusi, i cili për Klankosova.tv deklaroi se arsyeja e vonesës është fakti se në autobus ka qenë një sasi e mishit dhe suxhukut e cila nuk është deklaruar në pikëkalimin kufitar.

“Jam me agjencionin “T….Tours”. Kemi prit në kufi me Hungarinë nga ora 18:00 dje, e sot në mëngjes e kemi bërë kontrollën normale në ora 05:30. Pasi na kanë lëshuar, na kanë detyruar që të kthehemi mbrapa në hyrje, përsëri sepse kjo kompani ka marrë mish dhe suxhuk. Ata nuk e kanë deklaruar, e për atë arsye që s’e kanë deklaru na kanë kthy mbrapa”, ka thënë ai, derisa ka dërguar edhe pamje të kolonës së autobusëve nga kjo pikë kufitare.

Ndërsa, nga kompania “T… Tours” kanë thënë se nuk janë të informuar se autobusi i tyre ka mbetur në këtë kufi për disa orë, derisa nuk e mohojnë se ka mundur të ketë edhe sasi të mishit dhe suxhukut që është bartur me këtë autobus.

“Ka pasë porosi të udhëtarëve, ka mujtë me pasë. Nuk jam në dijeni që autobusi është në pritje nga ora 18:00 dje, ekipi s’ka lajmëru asgjë”, thuhet në përgjigjen e kompanisë.

Mbi 70 për qind të mostrave të testuara për Omicron në Kosovë, në testimet e fundit të bëra më 5 janar të këtij viti rezultuan pozitive me këtë variant.

Kështu kanë bërë të ditur përmes një përgjigje me shkrim nga Instituti Kombëtar i Shëndetësisë Publike të Kosovës.

Sipas të dhënave të IKSHPK-së, nga 34 mostra pozitive me coronavirus, në testimin e fundit më 5 janar 2022, 24 mostra apo 70 për qind kishin rezultuar me variantin Omicron.

Deri më tani në Kosovë tri herë ka pasur testime për variantin Omicron, ndërkaq numri i rasteve me këtë variant sipas këtyre të dhënave po rritet.

“Më datë 26.12.2021 janë testuar 23 mostra pozitive në SARS-CoV-2, prej të cilave ishin 8 (34.7%) me variantin Omicron.

Më datë 31.12.2021 janë testuar 30 mostra pozitive në SARS-CoV-2, prej të cilave ishin 10 (33.3%) me variantin Omicron.

Më datë 05.01.2021 janë testuar 34 mostra pozitive në SARS-CoV-2,​ prej të cilave ishin 24 (70.5%) me variantin Omicron”, kanë bërë të ditur nga IKSHPK-ja.

Ministria e Shëndetësisë është duke konsideruar rishikimin e masave antiCOVID, kjo pas rritjes së rasteve me coronavirus që është duke vazhduar tash e disa ditë në vendin tonë.

Kështu ka konfirmuar për Telegrafin, Drin Podrimqaku, këshilltar në Ministrinë e Shëndetësisë këtër ditë më parë, por deri më tani nuk ka ndonjë masë të re që ka marrë kjo ministri.

“Ministria e Shëndetësisë po i konsideron rishikimin e masave antiCovid, sipas rekomandimeve të ekspertëve shëndetësor dhe të dhënave të gjendjes epidemiologjike nga institucionet shëndetësore”, kishte thënë ai.

Instituti Kombëtar i Shëndetësisë Publike të Kosovës (IKSHPK), ka njoftuar se nga fillimi i vitit ka filluar rritje e rasteve pozitive me COVID-19 e veçmas me shfaqjen e variantit të ri të virusit SARS CoV-2 Omicron (B.1.1.529) duke shtuar intensitetin çdo ditë.

IKSHPK është duke vazhduar pandërprerë me testimin dhe gjurmimin e të gjitha rasteve, kontakteve të rasteve në komunitet dhe diagnostikimin laboratorik.

“Situata epidemiologjike mund të përkeqësohet edhe më shumë ditët në vazhdim, andaj IKSHPK apelon tek të gjithë qytetarët që të respektohen masat e Qeverisë së Republikës së Kosovës.

Për shkak të rrezikshmërisë së lartë të përhapjes së COVID-19, bëjmë thirrje në veçanti për kujdes dhe mosgrumbullim. Ndërsa, rekomandojmë institucionet përgjegjëse të mbikëqyrin me përpikëri dhe të ndërmarrin të gjitha veprimet e nevojshme për zbatimin e masave për parandalimin dhe luftimin e pandemisë”, thuhet në njoftim.

IKSHPK ka theksua se është i domosdoshëm kujdesi i shtuar i të gjithëve që në mënyrë strikte të respektohet distanca fizike, të përdoren maskat, të bëhet dezinfektimi dhe ajrosja e hapësirave, duke pamundësuar dhe shmangur përhapjen eventuale të mëtejme të infeksionit të COVID-19.

Nga vrasja e sotme në malet e fshatit Pakashticë të Podujevës, Klan Kosova merr vesh se viktima dhe dorasi ishin baxhanakë mes vete dhe se vrasja ka ndodhur aksidentalisht, derisa burrat po bënin gjueti në male.

Viktima nga fshati Dumnicë është një 30-vjeçar me inicialet M.K., ndërsa dorasi një 34-vjeçar me inicialet F.B.

Policia është ende në vendin e ngjarjes dhe po bën hetime se si erdhi deri te vrasja.

Në vrasjen, që ndodhi në orën 16:00, ishin të pranishëm katër persona.

Policia e Kosovës e ka arrestuar një person që dyshohet se pas një mosmarrëveshje, e ka sulmuar fizikisht dajën e tij.
Rasti ka ndodhur në rrugën “Nexhmedin Llumnica” në Prishtinë, mbrëmë në orën 19:00.Sipas Policisë, viktima ka pranuar tretman mjekësor, ndërsa me vendim të prokurorit i dyshuari dërgohet në mbajtje.

Çdo të dytin person në Kosovë, nëse pyetet, dëshiron të largohet nga Kosova, për të punuar në një shtet evropian.

Nisur nga aplikimet e shumta për tu larguar nga Kosova, vendi së shpejti do të përballet me mungesën e fuqisë punëtore. Kështu ka deklaruar Jusuf Azemi, kryetar i Sindikatës së Pavarur të Sektorit Privat.

Azemi për këtë është nisur nga deklarimi i shtetit gjerman se ka nevojë edhe për mbi 400 mijë punëtorë të huaj, e mbase shifra mund të shkojë deri në një milion. Ndërkohë që ditë më pare Albinfo ka raportuar se vetëm në dhjetor kanë qenë rreth 57 mijë aplikime nga kosovarët për viza pune në Gjermani.

Shqipëria dhe Kosova renditen lartë, për sa i përket dëshirës së largimit nga vendi i lindjes. Shqipëria ishte e katërta në një listë me 152 vende përsa i përket dëshirës së qytetarëve për t’u larguar nga vendi.

Në anketën botërore të Organizatës Gallup, 60% e pjesëmarrësve nga Shqipëria shprehen se do të donin të largoheshin.

Kosova renditet e trembëdhjeta me 46% të pjesëmarrësve që shprehin dëshirë për t’u larguar. Mes shteteve të Evropës, Kosova dhe Shqipëria ishin vendet me përqindjen më të lartë përsa i përket dëshirës për imigrim.

Arsyet janë, punësimi, pagat, shëndetësia, standarti i jetës, shkollimi dhe më pak vizia turistike.