Në tre vjetët e fundit mërgimtarët nga Zvicra përbëjnë numrin më të madh të ardhjeve në Kosovë, në krahasim me shtetet e tjera të botës, me theks të veçantë, të Evropës.

Si në vitin 2019, ashtu edhe në vitet 2020 dhe 2021 mërgimtarët nga Zvicra janë në krye të listës për nga numri më i madh i ardhjeve në Kosovë përmes Aeroportit Ndërkombëtar të Prishtinës “Adem Jashari”.

Lidhur me numrin e ardhjeve totale të udhëtarëve dhe përqindjet sipas shteteve, Albinfo.ch ka bërë një analizë, sipas së cilës gjatë vitit 2019 nga Zvicra në Kosovë kanë ardhur 595,456 mërgimtarë. Në vitin 2020 rrjedhimisht kanë ardhur më pak për shkak të valës së parë pandemike dhe kufizimeve, duke arritur totalin prej 239, 308 të ardhurish. Ndërsa viti 2021 pati rekord ardhjeje nga Zvicra, me 818,190 pasagjerë.

“Numri më i madh i udhëtarëve që fluturojnë nga aeroporti i Prishtinës kanë destinim Zvicrën, me qytetet e saj si Bazeli, Cyrihu dhe Gjeneva”, bën të ditur Zyra për Informim e Aeroportit të Prishtinës.

Ndërkohë, udhëtarët nga Gjermania zënë vendin e dytë, gjegjësisht, për tre vjet radhazi pasagjerët nga ky shtet u renditën në të dytët sa u përket ardhjeve totale.

Albinfo.ch raporton se mërgimtarët e këtij shteti në vitin 2019 ishin 529,362, gjithsej, kurse në vitin 2020 numri i tyre ishte 236,876. Nga ana tjetër, viti 2021 ishte viti ku pati rritje të dukshmeedhe nga Gjermani, me një total prej 677,617 udhëtarësh.

“Prej destinacioneve, me më së shumti udhëtarë nga ky shtet dallohen Dyseldorfi, Shtugarti, Mynihu, Berlini, e kështu me radhë”.

Nga ana tjetër, pavarësisht se sipas statistikave të ardhjeve të mërgimtarëve Turqia renditet e treta, duhet theksuar se pjesa dërmuese e mërgimtarëve nga SHBA-ja dhe Kanadaja fluturojnë nëpër Turqi, për të ardhur më pas në Kosovë, shkruan albinfo.ch.

Duke qenë se nuk ka fluturime direkte nga Shtetet e Bashkuara në Kosovë, mërgimtarët zgjedhin Turqinë për shkak të biletave me çmime më të arsyshme për udhëtuar më pas në vendlindjen e tyre.

Pra, rrjedhimisht, mërgimtarët nga SHBA-ja dhe Kanadaja renditen në vendin e tretë. Në vitin 2019 kishte 248,311 pasagjerë, në vitin 2020, 75,718 dhe në vitin 2021 kishte rritje të numrit të udhëtarëve nga këto dy vende, duke arritur në 331,410.

Ardhjet e mërgimtarëve nga Austria renditen në vendin e katërt të listës. Gjatë vitit 2019 nga ky shtet pati 81,614 pasagjerë. Në 2020-ën kishte 36,742, ndërkaq në 2021-ën kishte rritje të numrit të udhëtarëve me 134,261 në total.

Zyra për Informim nga Aeroporti i Prishtinës ka treguar numrin e ardhjeve totale për tre vjetët e fundit në përgjithësi, e po ashtu edhe të fluturimeve.

Theksohet se muaji gusht i vitit 2021 ka pasur numrin më të lartë të ardhjeve në aeroportin e Prishtinës, me gjithsej 383,776 udhëtarë, që pasohet nga muaji korrik me 340,446 udhëtarë. Nga ana tjetër, numri më i ulët ka qenë gjatë muajit prill, me 79,278 udhëtarë, pasuar nga muaji shkurt, me 96,442 udhëtarë.

Sindikatat e Kosovës kanë kërcënuar me greva nëse nuk miratohet Ligji i Pagave.

Ministri i Financave, Punës e Transfereve, Hekuran Murati ka thënë se deri tek këto kërcënime ka ardhur për shkak se sindikalistët janë mashtruar nga qeveritë e kaluara.

Ai ka thënë se kërkesat e sindikalistëve nuk janë të sinqerta.

“Diskursi publik nga disa prej përfaqësuesve të sindikatave nuk konsideroj që është i sinqertë. Kjo, për shkak se kemi të bëjmë me një qeveri që ende nuk i ka bërë një vit. Nëse kemi thënë që i zgjidhim problemet brenda mandatit, unë mund të kuptoj që vitin e tretë, mundet me pas kritika, por jo ende pa i bë një vit”, tha Murati.

Murati theksoi se më herët janë dhënë premtime që nuk janë mbajtur, ndërsa tani do të mbahen premtimet, nga qeveria aktuale.

“Unë besoj që sindikatat por edhe punëtorët, do të duhej ta dinin që janë mashtruar sa e sa herë, që janë mashtruar e janë manipuluar prej këtyre partive që kanë qenë në qeverisje, nuk duhet besuar në to”, tha Murati.

“Edhe më herët janë dhënë premtime, nga qeveritë paraprake, por e kemi parë sa janë realizu. Tash e kemi një qeveri, kur e jep një zotim edhe e realizon. Nuk jemi anashkalues, por vetëm e konsiderojmë që është e pasinqertë të thuhet se po kërkohen të drejtat e punëtorëve dhe të kërkohet të realizohet çdo gjë në një vit dhe të kërcënohet me greva. Greva duhet të jetë fjala e fundit e një diskutimi social”, tha Murati.

Ai u shpreh se më herët kanë përkrahur grevat për shkak se qeveritë e kaluara nuk i kanë mbajtur premtimet.

“Është bërë një Ligj i Pagave, i cili ka qenë një listë dëshirash, pra kanë plotësuar kërkesa dhe dëshira, por që ka qenë i parealizueshëm. Ka qenë edhe aktgjykimi i Gjykatës Kushtetuese në Kuvend e kam cituar, ku thuhet se edhe po të hynte në fuqi, ka qenë i pazbatueshëm, sepse nuk ka qenë i buxhetuar”, u shpreh Murati.

Tutje, ministri i Financave shtoi se, “Ky është rezultati, këtë e ka thënë edhe aktgjykimi, nuk kanë qenë të buxhetuara. Pse duhet një qeveri ta marr përsipër zbatimin e gënjeshtrave të partive tjera. Kemi zgjidhje. Fillimisht Ligji i Pagave bën harmonizim. Ligji i Pagave bën harmonizim. Është një ligj tjetër që është për rritje të pagave në sektorin publik, është ai për financa publike dhe përgjegjësitë”, tha Murati.

Kryesia e Kuvendit të Kosovës, në mbledhjen e sotme, të parën për këtë sesion, përcaktoi agjendën e punës së kuvendit për këtë javë.

Kryesia vendosi që kuvendi të mblidhet në seancë plenare të enjten, më 20 janar 2022, në të cilën pritet të shqyrtohen disa projektligje, të zhvillohet një debat, si dhe të shqyrtohen çështje të tjera të përcaktuara në rend të ditës.

Seanca do të fillojë me deklarime jashtë rendit të ditës dhe pyetje parlamentare, për të vijuar me zëvendësimin e anëtarëve në komisionet parlamentare.

Në vazhdim të seancës, deputetët do të debatojnë lidhur me ngritjen e çmimeve.

Pas debatit, Kuvendi do të hyjë në pjesën e shqyrtimit të projektligjeve.

Fillimisht, pritet të shqyrtohet Projektligji nr.08/L-101 për Ratifikimin e Marrëveshjes së Financimit në mes të Republikës së Kosovës përfaqësuar nga Ministria e Financave, Punës dhe Transfereve, dhe Asociacionit Ndërkombëtar për Zhvillim për projektin “Projekti i Reformës së Sistemit të ndihmës sociale në Kosovë”, për të vijuar më tej me shqyrtimin e dytë të tri projektligjeve: Projektligjit nr. 08/L-013 për të drejtat pronësore të shtetasve të huaj në Republikën e Kosovës, Projektligjit nr. 08/L-015 për Gjykatën Komerciale, si dhe Projektligjit nr. 08/L-057 për ndryshimin dhe plotësimin e Ligjit 04/ L-089 për Deminim Humanitar.

Seanca pritet të vazhdojë me shqyrtimin e parë i Projektligjit nr. 08/L-023 për ndryshimin dhe plotësimin e Ligjit nr. 03/L-064 për festat zyrtare në Republikën e Kosovës, për t’u përmbyllur me shqyrtimin e Raportit vjetor të Komisionit të Pavarur për Miniera dhe Minerale për vitin 2020.

Pas përfundimit të kësaj seance, do të vazhdojë seanca me pikat e papërfunduara më 24, 28 dhe 29 dhjetor 2021.

Ndryshe, në mbledhjen e sotme, Kryesia shqyrtoi edhe çështje të tjera nga fushëveprimtaria e saj.

Në 24 orët e fundit, në Kosovë janë regjistruar 728 të infektuar me koronavirus, ka njoftuar Ministria e Shëndetësisë.

Gjatë kësaj periudhe janë shëruar 99 pacientë, duke çuar numrin e të shëruarve në 158.750.

Sipas MSH-së, numri total i rasteve aktive është 5.118.

Zëdhënësi i BE-së Peter Stano thekson se BE-ja shpreh keqardhje për faktin që serbët nga Kosova nuk u lejuan të votojnë në referendumin e djeshëm dhe u bën thirrje të dyja palëve të bien dakord për një zgjidhje të pranueshme reciproke që do t’u mundësonte serbëve të votojnë në Kosovë në zgjedhjet e ardhshme.

“Votimi i serbëve në Kosovë me ndihmën e OSBE-së është një praktikë e vendosur prej kohësh, e aplikuar disa herë nga viti 2012 deri në vitin 2020. Na vjen keq për vendimin që këtë herë të mos e zbatojmë këtë mekanizëm të njohur”, tha Stano.

Peter Stano i bënë thirrje Beogradit dhe Prishtinës që të fillojnë bisedimet për modalitetet për pjesëmarrjen e serbëve të Kosovës në zgjedhjet e prillit.

“Edhe pse nuk ka marrëveshje ndërmjet Beogradit dhe Prishtinës për këtë çështje në kuadër të dialogut, ne presim që palët të fillojnë negociatat për modalitetet që do t’u mundësonin serbëve të votojnë në zgjedhjet e organizuara nga Serbia në të ardhmen dhe ne jemi të gatshëm të ndërmjetësojmë”, theksoi Stano.

Stano shtoi se dialogu ndërmjet Beogradit dhe Prishtinës nuk është ngecur, por se ai vazhdon “çdo ditë”, përmes kontakteve me të gjitha palët.

“Përfaqësuesi i lartë Borrrel foli javën e kaluar me presidentin Vuçiq dhe kryeministrin Kurti. Fakti që nuk ka takime në nivelin më të lartë nuk do të thotë se nuk ka dialog. Një takim në nivel eksperti ose politik do të bëhet kur të vijë koha”, tha Stano.

Ministri i Financave, Punës e Transfereve, Hekuran Murati ka thënë se janë duke parë alternativa tjera, si do të rregullohet çështja e mihjes së kriptovalutave në Kosovë.

Murati në “Përballje”, theksoi se janë duke menduar një zgjidhje afatgjatë, sepse nuk mund të shfrytëzohet çmimi i energjisë elektrike si për amvisëri, si për pajisje të kriptovalutave që për dikë është profitabile.

“Vendimi është i përkohshëm, por megjithatë unë mendoj se duhet ta mendojmë në afatgjatë ne këtë çështje. Duke e shfrytëzuar çmimin e energjisë elektrike që është i paraparë për amvisëri për t’i përmbushur nevojat bazike për ta ngrohur ambientin, apo për të zier ushqim, e ta shfrytëzojmë për dikë që është profitabile, atëherë o duhet të ndryshoj sistemi tarifor, që ata të kalojnë në një tarifë tjetër, o duhet të shihet një zgjidhje afatgjatë. Sepse edhe të kriptovalutat ka sisteme të ndryshme”, tha Murati.

Ai shpjegoi që janë dy sisteme për mihje të kriptovalutave njëra që konsumon energji elektrike në mënyrë intensive e tjetra që konsumon më pak.

Murati po ashtu tha se “në një situatë, kur nuk mund t’i përmbushim gjenerimet e energjisë elektrike, sidomos në periudhën shtator-mars, nuk mund t’i përmbushim nevojat vetanake, është problem”.

“Sa i përket aspektit të konfiskimit dhe procedurave ligjore, këto janë gjëra që i dinë më mirë organet e rendit”, tha Murati. Ai foli foli edhe për aksionet e Policisë së Kosovës, ku tha se 272 pajisje të sekuestrua shpenzojnë energji elektrike sa një fshat me 500 shtëpi.