Kryeparlamentari Glauk Konjufca ka komentuar refuzimin e mbajtjes së referendumit serb në Kosovë, për të cilën ripërsëriti se qe veprim i duhur.

Ai këtë e quajti lloj sfide për shtetin e Kosovës, dhe u shpreh në TV Dukagjini se mbajtja e këtij referendumi do të ishte fatal për shtetin e Kosovës.

”Referendumi do të ishte fatal për shtetin e Kosovës. Na prapë ishim çu të nesërmen, kurgjo s’na kish gjetë. Si thotë populli ‘’copë s’na u kish heq’’ po në kuptimin kushtetues, në nenin 1 ish kanë dëm”.

”Nëse mbet njëshi, sepse njëshi s’bën të preket, se të tjerat nuk na vyjnë pastaj”.

Ministri i Kulturës, Rinisë dhe Sportit, Hajrullah Çeku, ka deklaruar se është duke u punuar shumë për çmimin “Oscar”, derisa tha se shpreson shumë në arritjen e çmimit.

Ai deklaroi në DESK-un e KOHËS se për “Oscar” përpos artit dhe cilësisë, nevojitet edhe lobimi, dhe se ndaj ekipit janë kryer dy “infuzione financiare” në betejën e tyre.

“Po punojmë shumë për Oscar. Është angazhim i madh, kemi shpresë, e kam kuptuar në këtë angazhim që është lobim përpos art e cilësi. Kemi shumë njerëz të angazhuar, po na jep shumë shpresë. I kemi kryer dy ‘infuzione financiare’ ndaj ekipit në betejën e tyre. Jemi shumë më afër pas 15-shit që është mbërritur tash”, deklaroi ai.

Çeku tha se kritika dhe shkrimet e huaja, përfshirë edhe vlerësimit, e bëjnë Zgjoin film shpresëdhënës për përfshirje në 5-shen.

“Komuniteti artistik është shumë më përpara sesa niveli ku institucionet janë. Duhet të bëjmë shumë ta mbyllim këtë lloj hapësire. Sukseset që i kemi mbërri janë rezultat i një pune vetmohuese të artistëve e filmbërësve”, tha tutje.

Çeku potencoi se sukseset e arritura vitin e kaluar shpreson të vijojnë edhe sivjet.

Banorët në Veriun e Kosovës thonë se nuk paguajnë rrymë, ndërsa tregojnë se për çfarë e përdorin.

Tabelë që tregon që po hyn në veri të Mitrovicës nuk ka.

Por nga dritat rrugore mund të vërehet lehtë që ke hyrë në këtë pjesë të Kosovës.

Dikush madje me fuqitë e veta, po u ndihmon këtyre dritave ta ndriqojnë rrugën kryesore.

Por llampat e kësaj shtëpie nuk do të jenë të vetmet që qëndrojnë ndezur edhe gjatë ditës në pjesën veriore të vendit.

Madje ato drita që nuk ndriçojnë gjatë ditës mund të kenë ndonjë defekt, andaj po bëhet sanimi i tyre.

E sanim nuk u duhet këtyre orëve të rrymës të cilat ani pse janë të rralla në Zveçan, nuk kanë edhe pse të përdoren.

Një banor i kësaj komune me shumicë serbe thotë se edhe pse nuk e paguajnë rrymën, ditë pas dite ka edhe reduktime.

Lidhshmëria e tyre me rrymën është shumë e madhe, andaj reduktimet po u shkaktojnë nervozizëm.

Reduktimet e rrymës po u shkaktojnë probleme edhe bizneseve që gjenden në këtë pjesë.

E për një banor të nacionalitetit shqiptar, përfitimet prej mospagimit të rrymës janë të shumta.

E gjithë ndërtesa ku ky banon thotë se ngrohen me rrymë, ndërsa askush nuk shkon për të dërguar fatura të rrymës.

Rryma për ngrohje përveç ambienteve të brendshme përdoret edhe në ato të jashtmet.

Në këtë qendër të vaksinimit, këto nxehmje lëshohen për t’i ngrohur ata që presin jashtë kur temperaturat janë më të ulta.

Ministria e Shëndetësisë po shqyrton masat e reja anticovid.

Në mesin e këtyre masave do të jetë edhe shkurtimi i orarit të lëvizjes së lirë të qytetarëve, apo siç njihet ora policore.

Por që ajo të kthehet nga ora 22.00 deri në mëngjes po e sheh të panevojshme ish-drejtori i Policisë, njëherësh deputet i PDK-së, Rashit Qalaj, që shton se tash kur është dimër ashtu-kështu qytetarët nuk dalin jashtë pas orës 22.00, njofton Klan Kosova.

Ndërsa edhe qytetarët po theksojnë se kufizimi i lëvizjes së lirë është i pakuptueshëm meqë tashmë janë mësuar të bashkëjetojnë me pandeminë.

Një dekadë është bërë nga fillimi i negociatave për liberalizimin e vizave ndërmjet Kosovës e Komisionit Evropian, e kosovarët vazhdojnë të mbesin jashtë zonës shengen. Përderisa pushteti aktual fajësojnë ish-kryeministrat e kaluar për dështimin, opozita e konsiderojnë si të politizuar procesin, e njohës të marrëdhënieve ndërkombëtare si padrejtësi për Kosovën.

Kur Komisioni Evropian kishte propozuar Këshillit të BE-së dhe Parlamentit Evropian që Kosovës t’i hiqeshin vizat në Kosovë ishin hapur shampanjat.

Një dekadë më vonë Kosovarët ende nuk mund të lëvizin lirshëm në Evropë.

Tërë këtë proces ish-zëvendësministri i Jashtëm Ibrahim Gashi e sheh të tej zgjatur dhe të padrejtë.

“Kur flasim për 4-5 vitet e fundit është proces i tej zgjatur që në disa raste i kemi kontribuar edhe vet me disa vendime politike. Por dihet se vende të caktuara të BE-së e kanë frenuar këtë proces”, deklaroi për RTV Dukagjinin, Ibrahim Gashi.

Në anën tjetër Agon Batusha nga Lëvizja Vetëvendosje fajin për mosliberalizimin e vizave ua lë qeverive të kaluara.

“Procesi i liberalizimit të vizave për Kosovën para 10 viteve kishte filluar me hapa të shpejtë, por që u devalvu nga deklaratat e ish-kryeministrave apo ish-ministrave që kanë dhënë deklarata të paqena për qytetarët e Kosovës”, deklaroi Agon Batusha.

Deputeti i AAK-së Pal Lekaj thotë se çështja e liberalizimit të vizave është kthyer në çështje politike.

“Mendoj se procesi më shumë lidhet me çështjet politike përfshirë dialogun. Vizat i kanë si adut për dialogun dhe ta kushtëzojnë Kosovën”, deklaroi Lekaj.

Kosova është vendi i vetëm në Evropa që nuk ka liberalizim të vizave. Shqipërisë e Bosnjës i janë dashur nga tre vjet për liberalizim të vizave, derisa Malit të Zi e Maqedonisë e Serbisë nga dy vjet.

Franca e cila kryeson presidencën e BE-së për gjashtë muajt e parë të këtij viti, nuk ka dhënë shumë shpresë se mund të ketë lëvizje në atë drejtim që Kosovës t’i jepen vizat.

Infektologu Hamdi Ramadani po ia lë fajin mosrespektimit të masave për rritjen e madhe të rasteve me COVID-19 në Kosovë.

Ai tha se nga viti i ri vendi ynë ka hyrë në një situatë të rëndë dhe se varianti Omicron veçse e shtoi përkeqësimin, njofton Klan Kosova.

Ramadani u ankua se sugjerimet dhe opinionet e tyre s’janë marrë me seriozitet.

”Masat që quhen anti-COVID nuk u zbatuan nga qytetarët dhe as institucionet kompetente s’ishin në nivelin e duhur për t’i shikuar rishqyrtuar ato. Maska që duhej të mbahej brenda dhe jashtë nuk u respektua, distanca s’u zbatua fare, e gjithashtu edhe higjiena”.

”Ardhja e Omicron ishte shqetësuese”.

Ndërkaq, Ramadani në Info Magazine propozoi që të shtrëngohen masat për të përmirësuar situatën epidemiologjike.

”Në këtë situatë të rëndë me pandeminë nuk duhet të shihet gastronomia nëse dëmtohet për një javë ose dy, por duhet shikuar se si të kufizohet dhe lokalizohet dhe si të shtypet pandemia sikur që kanë bërë vendet e tjera”.

Qeveria e Kosovës ka paralajmëruar masa të reja pas rritjes së rasteve me COVID-19.

Kjo është thënë nga vet Qeveria me anë të një komunikate për media pas takimit që ka pasur Komiteti për Koordinim dhe Vlerësim të Situatës me Pandeminë.

“Ky variant i ri kërkon edhe përditësim të masave, me qëllim kryesor ngadalësimin e rritjes së rasteve. Kështu u tha edhe në mbledhjen e sotme të Komitetit për koordinim dhe vlerësim të situatës me pandeminë COVID-19”, thuhet në komunikatën e Qeverisë.

“Masat kanë për qëllim primar ruajtjen e shëndetit si dhe sigurimin e funksionimit të sistemit shëndetësor, që të mos rrezikohet nga një fluks i madh dhe i përnjëhershëm i pacientëve nëpër spitale, apo nga mungesa e punonjësve shëndetësorë të infektuar”, thuhet tutje në komunikatë.

Njoftimi i plotë i Qeverisë:

Gjatë ditëve të fundit ka rritje të ndjeshme të rasteve pozitive të Covid-19 në vendin tonë.

Instituti Kombëtar i Shëndetësisë Publike ka konfirmuar se pothuajse të gjitha këto raste janë të variantit Omicron, i cili përhapet jashtëzakonisht shpejt.

U bëjmë thirrje që të mos nënvlerësohet varianti Omicron.

Të gjitha informatat nga vendet e tjera dëshmojnë qartë, se ky variant mund të shkaktojë sëmundje të rëndë dhe humbje jete.

Si gjithmonë, mjeti më i fortë dhe më efikas për të mbrojtur vetveten dhe të tjerët përreth nesh, mbetet vaksinimi masiv.

Prandaj vaksinohuni sa më shpejt dhe, në veçanti, merrni dozën përforcuese posa të kalojnë tre muaj pas marrjes së dozës së dytë.

Ky variant i ri kërkon edhe përditësim të masave, me qëllim kryesor ngadalësimin e rritjes së rasteve. Kështu u tha edhe në mbledhjen e sotme të Komitetit për koordinim dhe vlerësim të situatës me pandeminë COVID-19.

Masat kanë për qëllim primar ruajtjen e shëndetit si dhe sigurimin e funksionimit të sistemit shëndetësor, që të mos rrezikohet nga një fluks i madh dhe i përnjëhershëm i pacientëve nëpër spitale, apo nga mungesa e punonjësve shëndetësorë të infektuar.

Po ashtu, një ngadalësim i tillë do t’u japë kohë për t’u vaksinuar sa më masivisht, qoftë me dy dozat e para, qoftë me dozën përforcuese.

Respektimi i masave dhe vaksinimi do të na ndihmojë që të kalojmë sa më shpejt valën aktuale dhe me sa më pak pasoja.