Në bazë të raporteve të datës 21 janar 2022 nga klinikat COVID-19 në QKUK, por edhe spitalet e përgjithshme, të spitalizuar janë 120 pacientë, prej tyre 80 të konfirmuar me COVID-19 pozitivë dhe 40 të tjerë post-COVID19.

Me oksigjeno-terapi janë 48 pacientë, kurse në Mjekimin Intensiv të Klinikës Infektive janë 4 pacientë.

Raporti sipas klinikave dhe spitaleve të përgjithshme:

Klinika Infektive, 30 pacientë

Klinika e Pulmologjisë, 34 pacientë post-COVID

Mjekimi Intensiv i Klinikës Infektive, 4 pacientë

Klinika e Pediatrisë, 5 pacientë

Klinika e Gjinekologjisë, 15 pacientë

Spitali i Prizrenit, 4 pacientë

Spitali i Pejës, 7 pacientë

Spitali i Gjakovës, 8 pacientë

Spitalit Mitrovicës, 8 pacientë

Sindikata e pavarur e RTK përmes një njoftimi për media kanë shprehur shqetësimin se prej fillimit të janarit rreth 150 persona janë duke kryer detyra të punës në RTK pa kontrata pune.

Në reagim thuhet se do t’i drejtohen edhe Inspektoratit të Punës dhe Avokatit të Popullit.

Lexoni të plotë reagimin:

Prej një janarit të këtij viti, rreth 150 persona janë duke kryer detyra të punës në RTK pa kontrata pune.

Kjo që po ndodhë për tash e 21 ditë në RTK përveç që është e paligjshme është edhe jo humane. Ata janë duke ardhur në punë nën ethet se a do të marrin kontratë pune apo do të largohen.

Në mesin e tyre ka nëna e gra. Cilin do veprim që do ta ndërmarrë Bordi i RTK-së në raport me ta për muajin janar do të bëjë shkelje ligjore, për arsye se nuk ka dhënë përgjigje për këtë çështje me kohë.

Nëse vendos t’ju jap kontrata atëherë këtë do të duhej ta bëjë retroaktivisht e që është e kundërligjshme. Nëse vendos të mos u jap kontrata , që do të thotë të mos i paguaj për punën që po e bëjnë prapë do të bëjë shkelje për shkak se ata kanë punuar për këto 21 ditë.

Jo gjithherë gabimet ndodhin nga veprimi. Shpeshherë ato ndodhin nga mosveprimi, si në këtë rast.

Ju bëjmë me dije se si Sindikatë, qysh të hënën rastin do ta drejtojmë në Inspektoriat të Punës dhe te Avokati i Popullit.

Po ashtu shqetësuese për Sindikatën është edhe mosmiratimi i buxhetit të RTK-së, kur dihet se sot jemi me datë 21 janar.

Ashtu siç e kemi dëshmuar edhe në të kaluarën, si Sindikatë nuk do të heshtim asnjëherë që para syve tanë të ketë shkelje të të drejtave elementare të punës si dhe veprime johumane. /Telegrafi/

Zyrtari i IT-së në Shërbimin Spitalor, Klinik dhe Universitar të Kosovës (ShSKUK), Leotrim Jahja ka përfunduar dje në prangat e Policisë, pasi dyshohet se ka keqpërdorur detyrën e tij në rastin e ‘avullimit’ të afër 105 mijë eurove në këtë institucion. Burimet e Sinjalit brenda Prokurorisë kanë bërë të ditur se pas kallëzimin penal dhe provave të siguruara, prokurori i çështjes ka hartuar kërkesën për paraburgim, e cila së shpejti do të dorëzohet në Gjykatën Themelore në Prshtinë.

Si u ‘avulluan’ afër 105 mijë euro brenda SHSKUK-së?

Të njëjtat burime kanë dhënë detaje se si për këtë rast të keqpërdorimit, ku Jahja si kryertar i komisionit kishte nënshkruar se ka pranuar pajisje, të cilat nuk u gjetën në depon e këtij institucione, ani pse u paguan afër 105 mijë euro.

Sipas burimeve të Sinjalit, Jahja dyshohet se më 22 dhjetor të vitit 2020, duke e shfrytëzuar pozitën e tij, në cilës të menaxherit të kontratës nuk i ka përmbushur detyrat e tij zyrtare, me qëllim të përftimit të kundërligjshëm të dobisë pasurore.

Ai dyshohet se ka përpiluar dhe nënshkruar një raport, në të cilin ka cekur se materiali i pranuar nga komisioni ka qenë në përputhshmëri me kontratën dhe të gjitha pajisjet janë montuar dhe janë në funksion të plotë, edhe pse ky raport ka qenë në kundërshtim me gjendjen faktike.

Kjo për shkak se projekti nuk ishte përfunduar dhe asnjë nga pajisjet nuk ka qenë funksionale. Kështu zyrtari Jahja buxhetit të QKUK-së i ka shkaktuar dëm material në shumën prej 104 mijë e 751 euro.

Burimet e Gazetës Sinjali po ashtu kanë njoftuar se tashmë Prokuroria Themelore në Prishtinë ka nxjerrë aktvendim për fillimin e hetimeve ndaj të dyshuarit Leotrim Jahaj dhe Egzon Hajzerajt e Ylber Krasniqit, që ishin pjesë e komisionit, që nënshkroi raportin në fjalë dhe i shkaktoi dëm buxhetit të këtij institucioni shëndetësor.

Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.

/GazetaSinjali/

Ish-bashkëpunëtorja e afërt e presidentit Ibrahim Rugova, Nekibe Kelmendi, gjatë homazheve për vdekjen e Presidentit Ibrahim Rugova ishte gjunjëzuar para arkivolit të tij në shenjë nderimi për presidentin e ndjerë.

Arkivoli i presidentit Rugova ishte ekspozuar në hollin e Parlamentit të Kosovës dhe qytetarët e shumtë kishin pasur mundësi që të bënin homazhe.

Ndërkaq një fotografi e veçantë tregon ish-bashkëpunëtoren e afërt të Presidentit Rugova, dhe anëtaren e LDK-së, Nekibe Kelmendin duke u gjunjëzuar para arkivolit të tij.

Presidenti i parë i Kosovës ka vdekur para 16 vjetëve dhe populli i Kosovës kishte marrë pjesë masivisht në nderim të veprës së presidentit Ibrahim Rugova dhe kontributit të tij për lirinë e Kosovës.

Gjashtëmbëdhjetë vjet më parë, shumë qytetarë patën pritur me orë të tëra për të bërë homazhe pranë trupit të pajetë të Ibrahim Rugovës, edhe përkundër temperaturave tejet të ulëta që kishin shkuar deri në -15 gradë Celsius.

Në varrimin e Ibrahim Rugovës kishin marrë pjesë me dhjetëra burrështetas, nga shtetet më të fuqishme në botë, duke e konsideruar këtë, si lamtumirën më të madhe në rajon.

Për shkak se nuk përkrahjen e deputetëve të Lidhjes Demokratike të Kosovës për të grumbulluar 2/3 e nevojshme, marrëveshja për “Projektin e Reformës së Sistemit të Ndihmës Sociale në Kosovë”, nuk u miratua në Kuvendin e Kosovës.
Kjo marrëveshje nuk është miratuar pasi mori 75 vota për, 8 vota kundër dhe asnjë abstenim.Ministri i Financave, Hekuran Murati, tha se vlera totale e kësaj marrëveshje pritet ta kap shumën deri në 47 milionë euro.Murati tha se kjo do t’ia mundësojë qeverisë që të përmirësojë efikasitetin e sistemit të asistencës sociale.

“Përmes testit të varfërisë do të targetohen më mirë shpenzimet e qeverisë të cilat shkojnë drejt familjeve në nevojë si dhe avancimin e sistemeve të integruara sociale në mënyrë që të krijohet mundësia që të krijohet mundësia që në të ardhmen të zgjerohet baza e asistencës sociale në raport me nevojat e qytetarëve”, tha Murati.
Partitë opozitare përveç Lidhjes Demokratike të Kosovës e kanë mbështetur këtë marrëveshje.

Avdullah Hoti, deputet i Lidhjes Demokratike të Kosovës, tha se kjo marrëveshje lidhet me rishikimin e skemave sociale, por sipas tij nuk ka ndodhur asnjëherë të merret kredi për skema sociale.Hoti tha se nuk do ta mbështesin këtë marrëveshje edhe pse sipas tij skemat sociale në Kosovë duhet të rishikohen, pasi Hoti thotë se ka qytetarë që i plotësojnë kushtet e nuk janë në skema sociale dhe anasjelltas.

“Të merret kredi për skema sociale nuk ka ndodh asnjëherë…. Çfarë shteti jemi ne që me të hyrat që mbledhim mos të arrijmë t’i paguajmë skema sociale e shpenzime elementare në arsim, e shëndetësi”, tha Hoti.Deputeti i PDK-së, Mërgim Lushtaku tha se grupi i tij parlamentar e mbështet këtë marrëveshje.

Besnik Tahiri kryetar i grupit parlamentar të Aleancës për Ardhmërinë e Kosovës tha se e mbështesin këtë marrëveshje. Por Tahiri tha se në të dhënat e vitit të kaluar, ka pasur rritje të madhe të numrit të familjeve që i janë shtuar skemës sociale.

“Ne si grup parlamentar propozojmë që mos të ketë pozicion uniform me komunat duke e ditur se qyteti me më së shumti familje që janë në skemë sociale sipas Agjencisë të Statistikave të Kosovës është Mitrovica me 2 mijë e 438 ndërsa më e vogla është Mamusha me 18 sosh”, shtoi Tahiri.

Prokuroria Themelore në Gjakovë ka njoftuar se është caktuar masa e paraburgimit për gruan që ka ushtruar dhunë fizike ndaj bashkëshortit të saj, në Spitalin e Gjakovës.

Në njoftim thuhet e pandehura i ka shkaktuar lëndime të rënda bashkëshortit të saj, transmeton Telegrafi.

“Prokuroria Themelore në Gjakovë, ka kërkuar caktimin e masës së paraburgimit nga Gjykata kompetente në Gjakovë, ndaj të pandehurës V.N., për shkak të dyshimit të bazuar se ka kryer veprat penale “Lëndim i rëndë trupor”, dhe “Dhuna në familje”.

Prokuroria njofton se, rasti ka ndodhur më 14 janar 2021, në Spitalin Rajonal “Isa Grezda”, në Gjakovë, pikërisht në repartin e neurologjisë, ku e pandehura me dashje i shkakton lëndime të rënda viktimës së ndjeshme, të dëmtuarit, bashkëshortit të saj A.N”, thuhet në njoftim.
Prokuroria bën të ditur se, i dëmtuari përderisa ishte duke u trajtuar në spital, e pandehura e revoltuar se duhej të kujdeset për të, e sulmon fizikisht të dëmtuarin dhe e godet me shuplakë në regjionin e fytyrës, e në pjesë të ndryshme të trupit.

“Gjithashtu nga kohë e pacaktuar e deri më 18 janar 2022, në shtëpinë e tyre të përbashkët, e pandehura shkakton dhunë në familje, keqtrajtim fizik dhe psikik, të dëmtuarit, bashkëshortit të saj A.N, duke e ofenduar ne mënyrë të vazhdueshme, kanosur dhe duke e goditur fizikisht, ku tek i dëmtuari ka shkaktuar dhembje fizike dhe shqetësim të madh emocional”, njofton Prokuroria.

Prokurori i rastit ndaj të pandehurës V.N., ka kërkuar masën e paraburgimit në afat prej 30 ditësh, e cila është aprovuar nga Gjykata kompetente.

E pandehura, me urdhër të prokurorit gjendet në ndalim nga data 18 janar 2022. /Telegrafi/