Gjykata Themelore në Gjakovë, këtë të premte ka shpallur aktgjykim lirues ndaj katër personave, ku në mesin e tyre është edhe ish-kryetari i Gjakovës, tani deputeti i AAK-së, Pal Lekaj.

Sipas Gjykatës Themelore në Gjakovë, i pandehuri G.R., lirohet ga aktakuza për veprën penale “Keqpërdorim i pozitës apo autoritetit zyrtar”, P.L dhe I.L të cilët akuzoheshin se në bashkëkryerje dhe në vazhdimësi kanë kryer veprën penale “Keqpërdorim i pozitës apo autoritetit zyrat” si dhe V.H i cili akuzohej për veprën penale “Mashtrim lidhur me subvencionet”, tashmë janë liruar nga aktakuza

“Trupi gjykues, pas mbajtjes së shqyrtimit gjyqësor, dëgjimit të palëve, administrimit dhe analizimit të të gjitha provave, si dhe rekomandimeve të Gjykatës së Apelit, ka ardhur në përfundim se nuk është vërtetuar se të akuzuarit kanë kryer veprat penale si në aktakuzë”, thuhet në njoftimi e gjykatës.

Pal Lekaj, dhe i dyshuari tjetër me iniciale I.I, akuzoheshin se kanë keqpërdorur pozitat e tyre zyrtare gjatë shpërndarjes së subvencioneve gjatë periudhës 2008-2014, ku Lekaj në atë kohë ishte kryetar i Gjakovës, ndërsa personi tjetër me iniciale I.I ishte drejtor i Drejtorisë së Bujqësisë.

“Të pandehurit P.L. dhe I.I., akuzohej se kanë keqpërdorur pozitat e tyre zyrtare gjatë shpërndarjes së subvencioneve gjatë periudhës 2008-2014, duke vepruar në cilësinë e personave zyrtarë, i pari në cilësinë e kryetarit të Komunës së Gjakovës, ndërsa i dyti si drejtor i Drejtorisë për Bujqësi, kanë shpërndarë subvencione, përmes kompanisë “U.-V.”, në kundërshtim me Ligjin për Menaxhimin e Financave Publike”.

“Ndërsa i pandehuri V.H., akuzohej se në cilësinë e përgjegjësit kryesor të biznesit “U.-V.”, me seli në Gjakovë, në periudhën kohore 2008-2014, ka dhënë informacione të pasakta se kinse të gjithë aplikuesit për subvencione kanë pranuar subvencionet dhe se ka lejuar që në vend të fermerëve që kanë qenë në lista për të marrë subvencione, të marrin persona tjerë që nuk kanë pasur të drejtë”, thuhet në komunikatë, përcjell Klankosova.tv..

Ndërsa, i pandehru G.R, akuzohej se gjatë periudhës 2008-2012 në cilësinë e personit financiar në komunën e Gjakovës, kishte bërë alokimin dhe aprovimin e mjeteve monetare me qëllim të përfitimit për vete ose për personin tjetër.

“I pandehuri G.R., akuzohej se gjatë periudhës kohore 2008 – 2012, në cilësinë e personit zyrtar, financiar në Komunën e Gjakovës, me qëllim të përfitimit të dobisë pasurore për vete ose për personin tjetër, apo që t’i shkaktojë dëme personit tjetër, kishte lejuar alokimin dhe aprovimin e mjeteve monetare. Sipas aktakuzës, kjo kishte të bënte me pagesat që i janë bërë biznesit “DPT U.-V.”, me pronar V. H., për shpërndarjen e subvencioneve pa asnjë procedurë, pa kontratë si dhe pa pasur fatura të rregullta”, thuhet në komunikatën e Gjykatës Themelore në Gjakovë.

Policia e Kosovës ka vazhduar aksionet për sekuestrimin e pajisjeve për mihje të kriptovalutave.

Sipas njoftimit, Policia sot ka arritur të sekuestrojë “një numër të madh” pajisjesh për kriptovaluta në një lagje të Prishtinës, mirëpo nuk e ka bërë të ditur numrin e saktë.

“Operacioni është realizuar në një lagje të Prishtinës, ndërkohë që zyrtarët doganorë kanë proceduar më tej me rastin”, thuhet në njoftim.

Qeveria e Kosovës ditë më parë mori vendim për ndalimin e prodhimit të kriptovalutave për shkak të krizës energjetike.

Zëdhënësi i Ministrisë së Shëndetësisë, Faik Hoti ka folur edhe për vijimin e mësimit në shkolla.

Hoti u shpreh se sistemi arsimor do të vazhdojë sipas skenarëve të paraparë më herët për vijueshmërinë e mësimit.

“Sa i përket sektorit të arsimit ekziston udhëzuesi për masat e përkohshme sa i përket COVID-19 i cili zbatohet në fushën e arsimit dhe vendimmarrja nëse një shkollë do të vazhdojë me prani fizike të nxënësve apo me cilindo prej skenarëve që janë në funksion i takon task-forcave të shkollave në bashkëpunim me Drejtoritë Komunale të Arsimit dhe MASHT, dhe do të jenë edhe më tutje në funksion të tri opsionet të cilat janë zbatuar deri më tani”, u shpreh Hoti.

Instituti Kombëtar i Shëndetësisë Publike ka bërë thirrje për bartje të maskës dhe vaksinim, në mesin e rritjes së rasteve me koronavirus.

“Omicron po shton intensitetin dhe është varianti dominues në qarkullim. Virusi është kudo andaj mos neglizhoni rekomandimet themelore: maska, distanca, higjiena. Shmangni udhëtimet, qëndroni në shtëpi dhe ajrosni ambientet e mbyllura”, thuhet në apelin e IKSHP-së.

IKSHP alarmoi se situata epidemiologjike mund të përkeqësohet edhe më shumë ditët në vazhdim.

“Duke qenë se vaksinimi është mënyra më e mirë dhe më e sigurt për të parandaluar COVID-19, veçanërisht format e rënda të sëmundjes dhe vdekjet, ne vazhdojmë të apelojmë fuqishëm për vaksinim sa më gjithëpërfshirës, sa më të gjerë dhe sa më të shpejtë të popullatës nga mosha 12 vjeçare”, thuhet tutje në postimin e institutit në Facebook.

Instituti gjithashtu apeloi për vaksinimin me dozën përforcuese.

“Të gjitha të dhënat nga vendet tjera dëshmojnë qartë dhe pa asnjë dyshim, se ky variant mund të shkaktojë sëmundje të rëndë dhe humbje jete, sidomos mes personave të pavaksinuar dhe, deri diku, edhe mes atyre që nuk kanë marrë dozën përforcuese. Andaj, Vaksinimi mbetet arma më e fortë për të parandaluar hospitalizimin dhe rastet e rënda klinike”.

Shërbimi Spitalor Klinik dhe Universitar i Kosovës përmes një postimi në rrjetin social Facebook, ka treguar se sa operacione janë kryer për 12 muaj në Klinikën e ORL-së në QKUK.

“Përkundër vështirësive dhe telashve me Pandeminë COVID-19, Klinika e ORL-së në Qendrën Klinike Universitare të Kosovës gjatë vitit 2021 ka ofruar mjëra shërbime mjekësore për pacientët. Për 12 muaj, sipas raportit vjetor të punës, janë kryer 1 mijë e 521 operacione”, thuhet në njoftimin e SHSKUK-së.

Në njoftimin e tyre, bëhet e ditur se gjatë kësaj periudhe janë realizuar 5 mijë e 347 vizita specialistike ambulantore.

“Brenda periudhës janar-dhjetor të vitit të kaluar, 12 mijë e 476 pacientë ishin shtrirë në repartet e Klinikës së ORL-së për tretman të nevojshëm mjekësor”, thuhet në njoftim.

Punimet në bllokun B2 në termocentralin Kosova B janë përfunduar. Burime brenda korporatës i kanë thënë Klan Kosovës se tani procesi është në fazën e testimit, ndërsa pritet që prodhimi të fillojë të shtunën.

Ky informacion ende nuk është konfirmuar zyrtarisht nga menaxhmenti i KEK-ut.

Turbina në njësinë B2 është prishur rreth një muaj më parë, në një periudhë të rëndë të krizës energjetike, që uli kapacitetet prodhuese në KEK.

Teksa rregullimet duket se u bënë pak më vonë se afati i parashikuar, pasi asokohe u tha që punimet do të përfundonin deri më 20 janar.

Për ta riparuar B2-shin është angazhuar edhe një ekspert gjerman.