Ditëve të fundit, rritja e çmimit të rrymës ka qenë tema kryesore. Madje kundër shtrenjtimit të saj të mërkurën do të organizohet protestë.

Nga ora 12:00 janë ftuar të gjithë qytetarët që të marrin pjesë në protestën që do të mbahet në sheshin “Zahir Pajaziti” në Prishtinë.

Kjo protestë ka dy kërkesa, të mos aprovohet bllok tarifa e propozuar nga ZRrE-ja dhe të nacionalizohet KEDS-i.

Njoftimi i plotë:

Të dashur/a qytetarë/e të Kosovës,

Ftoheni të merrni pjesë në protestën kundër shtrenjtimit të rrymës në Kosovë më datën 26 janar 2022 nga ora 12:00 në Prishtinë.

Me 28 janar 2022 Qeveria e Kosovës pritet ta miratojë propozimin e ZRrE-së për vendosjen e bllok tarifës dhe rritjen prej 9% për të gjithë konsumatorët/et që shpenzojnë deri në 600 kWh, ndërsa rreth 200% rritje të çmimit për konsumatorët/et që e tejkalojnë 600 kW

Vendosja e bllok tarifës do ta afektojë jetën dhe buxhetin e secilit/ës prej nesh. Gjatë sezonës së dimrit konsumi energjetik i një familje mesatare në Kosovë e kalon në çdo formë 600 kWh. Kjo do të thotë që nëse ne e kemi paguar një faturë prej 58 eurove me tarifën e re do të paguajmë rreth 108 euro.

Përveç që i palogjikshëm, ky propozim do t’i pasurojë edhe më tej bizneset, në kurrizin tonë. Sipas propozimit, çmimi i energjisë për bizneset nuk rritet fare. Kjo i bie se një familje mesatare në Kosovë që synim e ka jetesën apo edhe mbijetesën, paguan edhe për bizneset që synim e kanë qarkullimin e fitimin.

KEDS-it nuk i mjaftojnë 17 milion euro fitim në vit por e ka bërë argat ZRrE-në dhe Qeverinë e Kosovës që nga ky vit kësaj kompanie private t’i shumëfishohet fitimi. E gjithë kjo nga buxheti, edhe ashtu i dërrmuar, i qytetarëve/eve të Kosovës.

Këto shantazhe, ne qytetarët e këtij vendi nuk do i lejojmë kurrsesi. Në këto kushte, protesta mbetet e vetmja rrugë që ta parandalojmë barrën që mundohen të na ngarkojnë Qeveria e Kosovës përmes ZRrE-së e me KEDS-in.Andaj, ju ftojmë që të mërkurën, duke filluar nga ora 12:00, të mlidhemi e ta kundërshtojmë e ta parandalojmë këtë padrejtësi të rradhës ndaj nesh. Protesta nisë tek sheshi “Zahir Pajaziti” dhe përfundon tek ndërtesa e Qeverisë dhe ka dy kërkesa kryesore:

1.Mos-aprovimi i bllok tarifës së propozuar nga ZRre-ja;
2. Nacionalizimi i KEDS-it

Deputeti i LDK-së, Driton Selmanaj, ka thënë se Qeveria mund të shtrenjtojë faturat e energjisë elektrike. Porse do të përballet me reagimet pas një muaji, kur qytetarëve t’u vijnë faturat.

Selmanaj ka thënë se gjitha partitë politike pajtohen me diçka, se kanë dështuar këto 20 vjetë.

“Kam bindjen se gjitha partitë politike pajtohen me diçka, kemi dështuar. E faji është i secilit prej nesh. Nëse sot pas 20 vjetëve flasim për termoncentrale të ndërtuara viteve 60-a e 70-a, e i kemi edukuar njerëzit e Kosovës çfarë është kazani a ka rrjedhje, e së fundi çfarë është bojleri, është tmerri i politikbërjes 20-vjeçare në Kosovë. Ka dështuar projekti Bilfinger, i Kosovës së Re, Contur Globalit, po e dështoni edhe gazin. S’jeni pa faj ju Vetëvendosja. Pasi pothuajse gjitha këto me orë të tëra keni organizuar konferenca e kundërshtuar ato”, ka thënë Selmanaj në Kuvend.

Ai ka thënë se kryeministri i Kosovës, Albin Kurti, po bën thirrje të zbritet në tokë.

“Ne i themi kryeministrit mirë se vjen në realitet. Ky është realiteti në Kosovë. Kërkoj të gjejmë zgjidhje kreative. Të ndalojmë vendimin që është i dëmshëm për njerëzit në Kosovë. Vetëm në dhjetor 57 mijë aplikues të rinj kanë qenë për viza gjermane. E me shtrentju rrymën i thuni qytetarëve se jetë këtu nuk ka. A mos po doni krizë sociale me rrëzu veten si rezultat i krizave. Logjikë tjetër s’ka. Logjika e shëndosh se kupton këtë”, ka thënë Selmanaj.

IKSHPK ka dalë serish me thirrje për qytetarët e Kosovës në kohën kur numri i rasteve me koronavirus vazhdon të jetë i lartë.

Në një postim në Facebook, IKSHPK kërkon respektimin e masave antiCOVID-19 si mbajtja e maskës, ruajtja e distancës sociale, mbajtja e higjienës, shmangia e udhëtimeve, të qëndrohet në shtëpi dhe të ajrosen ambientet e mbyllura.

“Të gjitha të dhënat nga vendet tjera dëshmojnë qartë dhe pa asnjë dyshim, se ky variant mund të shkaktojë sëmundje të rëndë dhe humbje jete, sidomos mes personave të pa vaksinuar dhe, deri diku, edhe mes atyre që nuk kanë marrë dozën përforcuese. Andaj, vaksinimi mbetet arma më e fortë për të parandaluar hospitalizimin dhe rastet e rënda klinike”, thuhet në komunikatë.

Për shkak të rrezikshmërisë së lartë të përhapjes së COVID-19, IKSHPK bën thirrje në veçanti për kujdes dhe mos grumbullim. Ndërsa, rekomandojnë institucionet përgjegjëse të mbikëqyrin me përpikëri dhe të ndërmarrin të gjitha veprimet e nevojshme për zbatimin e masave për parandalimin dhe luftimin e pandemisë.

“Duke qenë se vaksinimi është mënyra më e mirë dhe më e sigurt për të parandaluar COVID-19, veçanërisht format e rënda të sëmundjes dhe vdekjet, ne vazhdojmë të apelojmë fuqishëm për vaksinim sa më gjithëpërfshirës, sa më të gjerë dhe sa më të shpejtë të popullatës nga mosha 12-vjeçare.

Agjencia kundër Korrupsionit në Kosovë ka nisur procedurat hetimore kundër zyrtarëve të Listës Serbe, parti udhëheqëse e serbëve të Kosovës, e cila ka mbështetjen e Beogradit zyrtar.

Arsyeja e fillimit të procedurës është se zyrtarët e Listës Serbe, të cilët mbajnë pozita të ndryshme në nivel qendror dhe lokal në institucionet e Kosovës, nuk i kanë raportuar rregullisht pasuritë apo të ardhurat e tyre, konfirmuan për Radion Evropa e Lirë, më 24 janar, nga Agjencia kundër Korrupsionit.

Procedura është iniciuar kundër kryetarit të Listës Serbe, Goran Rakiq, nënkryetarit të Kuvendit të Kosovës nga Lista Serbe, Sllavko Simiq, shefit të Grupit Parlamentar të Listës Serbe në Kuvendin e Kosovës, Igor Simiq, deputetëve Zoran Mojsilloviq dhe Verica Ceraniq, ish-deputetit Ivan Todosijeviq, kryetarit të Komunës së Mitrovicës së Veriut, Millan Radojeviq, kryetarit të Komunës së Leposaviqit, Zoran Todiq dhe këshilltarit në Kuvendin Komunal të Mitrovicës së Veriut, Alleksandar Spiriq.

Po ashtu, Agjencia kundër Korrupsionit e Kosovës ka iniciuar hetim kundër Zllatko Miniqit, Miodrag Ralliqit, Verolub Stankoviqit, Millorad Jovanoviqit, Millan Ivanoviqit dhe Sërgjan Nikolliqit.

Nga Agjencia thonë se janë duke u ndërmarrë të gjitha veprimet hetimore lidhur me mbledhjen dhe analizimin e dokumentacionit përkatës.

Për rastin e Lubinko Karaxhiqit, ish-deputet i Kuvendit të Kosovës dhe nënkryetar i Komunës së Graçanicës, Prokuroria Themelore e Prishtinës ka pezulluar hetimet.

Në sistemin serb, Karaxhiq ishte kryetar i Autoritetit të Përkohshëm Komunal të Prishtinës, institucion ky që nga autoritetet e Kosovës konsiderohet jolegal dhe paralel.

Në rastin e ish-kryetarit të Komunës së Shtërpcës, Bratisllav Nikolliq, Prokuroria Themelore në Prishtinë ka hedhur poshtë kallëzimin penal të Agjencisë.

Nikolliq është edhe koordinator i organit të përkohshëm komunal të Shtërpcës, sipas sistemit serb. Ai është arrestuar në fund të dhjetorit të vitit të kaluar, për shkak të dhënies së paligjshme të lejeve të ndërtimit në Brezovicë, pas së cilës i është caktuar masa e paraburgimit për një muaj.

Radio Evropa e Lirë, në gusht të vitit të kaluar ka raportuar për “pagat e dyfishta”, sepse shumica e zyrtarëve të Listës Serbe kanë të paktën një vend pune në sistemin kosovar dhe një në atë serb.

Kjo parti është themeluar në vitin 2013 me mbështetjen e Beogradit dhe presidentit serb, Aleksandar Vuçiq.

Ndonëse zyrtarët e Listës Serbe obligohen me ligj që të raportojnë të gjitha të ardhurat në Agjencinë Kundër Korrupsionit të Kosovës, por edhe në agjencinë e ngjashme në Serbi, ata e bëjnë këtë në mënyrë selektive.

Çfarë funksionesh të dyfishta kryejnë zyrtarët e Listës Serbe?

Kryetari i Listës Serbe, Goran Rakiq, nuk ka raportuar në Agjencinë kundër Korrupsionit në Kosovë se në kuadër të sistemit të Serbisë i kryen edhe dy funksione të tjera.

Ai është drejtor i Ndërmarrjes Publike “Standard” në Mitrovicën e Veriut dhe asistent për mësimdhënie në Shkollën e lartë ekonomike të studimeve profesionale në Pejë, e cila funksionon në kuadër të sistemit serb dhe është zhvendosur në Leposaviq, komunë kjo e banuar me shumicë serbe në veri të Kosovës.

Për këto dy pozita, Rakiq paguhet me rreth 92.000 dinarë, ose rreth 750 euro.

Rakiq nuk ka raportuar as agjencisë serbe për të ardhurat që merr në institucionet e Kosovës.

Igor Simiq është deputet i Kuvendit të Kosovës, por ka marrë të ardhura edhe për funksionet që kryen në sistemin serb, nga Sigurimi pensional dhe invalidor, si dhe nga Fakulteti Ekonomik në Mitrovicën e Veriut.

Zoran Todiq është kryetar i Komunës së Leposaviqit sipas sistemit të Kosovës dhe kryetar i komunës së Leposaviqit sipas sistemit të Serbisë.

Millan Radojeviq është kryetar i Mitrovicës së Veriut dhe merr pagë nga buxheti i Qeverisë së Kosovës, por është edhe drejtor i Fondit të sigurimit pensional dhe invalidor të Serbisë në Mitrovicën e Veriut.

Situata është e ngjashme edhe me zyrtarët e tjerë të Listës Serbe, pasi shumica prej tyre kryejnë funksione në sistemin kosovar dhe në atë serb dhe nuk i raportojnë as Agjencisë Kundër Korrupsionit të Kosovës e as Agjencisë Kundër Korrupsionit të Serbisë.

Deputeti i Partisë Demokratike të Kosovës, Bekim Haxhiu, ka thënë që qeveria Kurti ka premtuar lirimin e çmimeve, por po e promovon dhe e përkrah të kundërtën.

“Prandaj edhe ai [Albin Kurti] nuk po ka dëshirë me ia përmendë premtimet që i ka bërë si opozitar, mirëpo është e pashmangshme sepse ia premtoi për lirimin e TVSH-së për produktet elementare ushqimore, nga ai premtimi kur thoshte se buka nga 36 cent do të bëhej 31 cent ndërsa sot buka është 42 deri në 50 cent”, ka thënë Haxhiu në Foltoren e Kuvendit, duke përmendur edhe rritjen e çmimeve të tjera të produkteve bazike ushqimore.

“Është premtu edhe lirimi i energjisë elektrike dhe për këtë ka pasë besim të qytetarëve me 50 për qind bazu në ato zotime dhe në ato premtime”.

“Me shtrenjtimin e energjisë elektrike sot po plaçkiten qytetarët e Kosovës direkt në buxhetet e tyre familjare”.

Sipas Haxhiut, kjo qeveri po karakterizohet nga shtrenjtimi rrjedhimisht vështirësimi i jetës së qytetarëve dhe jo trajtimit të tyre të drejtë siç mëtonte motoja e Lëvizjes Vetëvendosje në zgjedhjet e përgjithshme të vitit të kaluar.

“Të mos shtrenjtohet energjia elektrike sepse nga premtimi ‘krejt dhe drejt’ po del ‘krejt dhe shtrenjtë’ bazu edhe në çmimin e konsumit të përditshëm ditor dhe konsumin e energjisë elektrike të propozuar”.

Deputeti i Vetëvendosjes, Burim Karameta, ka thënë se vota e tij do të jetë kundër rritjes së faturave të energjisë elektrike.

Ai në Kuvendin e Kosovës, ka thënë se mendimi i tij është ndryshe, jo për t’u përbashkuar me opozitën, por se do të jetë gjithmonë kundër gjërave që shkojnë në dëm të qytetarëve të Kosovës.

“Gjatë gjithë kohës fushatën e kemi udhëhequr duke thënë se deri tash është bërë politikë me qytetarët, tanë do të bëjmë politikën bashkë me qytetarët. Po bëjë thirrje të bëjmë me qytetarët politikën tani e tutje, të fokusohemi te ta. Deputetë e qytetarë, do të ndajë një mendim ndryshe, jo për t’u përbashkuar me opozitën. Nuk do të jem kundër asnjë dokumenti e asnjë vendimi shqip, ku përfitues janë familjarët tanë. Do të jetë vota ime kundër rritjes eventuale të rrymës”, tha Karameta.