Zyra e Rregullatorit të Energjisë nuk i ka përfshirë fare katër komunat veriore të Republikës së Kosovës në raportin e vetë në të cilën u shqyrtuar dhe propozua rritja e çmimit të energjisë elektrike.

Këtë sot e ka konfirmuar Kryesuesi i Bordit të Zyrës së Rregullatorit të Energjisë (ZRRE), Ymer Fejzullahu, teksa ka raportuar në Komisionin e Kuvendit të Kosovës për Ekonomi.

Ai e ka arsyetuar një vendim të tillë, duke thënë se janë në proces gjyqësor me Avokatin e Popullit.

“Edhe ajo pjesë ka qenë e përfshirë në tarifat e energjisë elektrike deri në vitin 2018. Avokati i Popullit ka ngrit një ankesë dhe e ka paditë ZRRE-në për të cilën jemi në proces gjyqësor. Ajo kosto nga viti 2017, dhjetor të vitit 2017 është hequr apo nuk është barrë e konsumatorëve dhe ajo ka kaluar përmes buxhetit të Kosovës, pastaj është mbuluar nga KOSTT-i dhe ZRRE-ja. Meqenëse ia ka ndaluar gjykata që ta përfshijë këtë kosto, ne nuk e kemi marrë parasysh as në kalkulimet e mëhershme meqenëse jemi në proces gjyqësor”, ka thënë Fejzullahu.

Kryeministri Albin Kurti ka thënë se së shpejti Qeveria e Kosovës do të dërgojë komentet tek Zyra e Rregullatorit të Energjisë (ZRRE), lidhur me vendosjen e tarifave të reja të energjisë elektrike.

Kurti tha sot para mediave se ZRRE—ja është institucion i pavarur dhe se ai personalisht nuk e ka as numrin e telefonit të kryesuesit të Bordit të ZRRE-së.

Më tutje, kryeministri deklaroi se ministrat e linjës dhe Kuvendi do t ë dërgojnë komente në mënyrë që ZRRE-ja t’i përfshijë ato në raport.

“Ne do të dërgojmë komentet e tona. ZRRE është institucion i pavarur i shtetit. Ta zëmë unë nuk e kam numrin e telefonit të kryesues të Bordit të ZRRE-së, por ministrat e linjës shpresoj edhe nga Kuvendi i Republikës do t’u dërgojnë sa më parë komentet në mënyrë që Bordi i ZRRE-së bazuar në raportin e vet t’i trajtojë edhe sugjerimet e të tjerat”, ka thënë Kurti.

Propozimi i Zyrës së Rregullatorit për Energji për shtrenjtimin e rrymës ka shkaktuar shumë reagime e debat ditëve të fundit. Kryetari i bordit të ZRRE-së, Ymer Fejzullahu po raporton në Komisionin për Ekonomi, Industri, Ndërmarrësi dhe Tregti, për ta arsyetuar propozimin e këtij institucioni, i cili tha se e di se çmimet e energjisë elektrike janë të papërballueshme për një pjesë të konsumatorëve.

Fejzullahu ka theksuar faktin se kriza energjetike e ka përfshirë gjithë Evropën, duke shtuar se ka qenë e domosdoshme që ZRRE-ja ta shqyrtojë në mënyrë të jashtëzakonshme ndryshimin e tarifave të rrymës.

Duke përmendur çmimet e larta të importit të cilat i ka quajtur të pamundura për t’u përballuar, Fejzullahu ka thënë se situata është bërë e rëndë. Ai e ka theksuar edhe prishjen në termocentralin Kosova B në dhjetor, i cili i ka shkaktuar miliona euro shpenzime për energjinë e importuar.

“Kosto ditore e mungesës së këtij gjeneratori ka qenë rreth 1.5 milion euro me çmimin e tregut”, ka thënë ai. “Prandaj ZRRE-ja ka qenë e obliguar që të hapë shqyrtimin e jashtëzakonshëm.”

Fejzullahu tha se në Kosovë është menduar se mund të prodhojmë vetë rrymë për nevojat tona, por që kjo s’është e vërtetë viteve të fundit.

“Ne gjithë mendojmë që prodhojmë energji për nevojat tona, por në realitet – edhe pse deri tani kemi qenë shumë pak të varur nga importi – që disa vite të fundit, kjo varësi nga importi është rritur”, tha ai.

Si njërën nga arsyet për varësinë nga importi i energjisë elektrike, Fejzullahu e ka përmendur ndryshimin e strukturës tarifore në vitin 2017.

Kryetari i bordit të ZRRE-së tha po ashtu se edhe çmimet aktuale të rrymës mund të jenë të papërballueshme për një pjesë të konsumatorëve. Ai tha se ka kërkuar që të mbështeten disa kategori që nuk mund ta paguajnë rrymën.

“Këto çmime, edhe këto ekzistuese për një kategori të konsumatorëve janë të papërballueshme. Ne kemi qenë të zëshëm. Kam kërkuar edhe vitet e kaluara që të mbështeten konsumatorët që janë rastet sociale. Nuk janë vetëm rastet sociale që duhet të mbështeten, por edhe konsumatorët e cenueshëm që nuk e përballojnë faturën e energjisë elektrike”, tha ai.

Guvernatori i Bankës Qendrore të Kosovës, Fehmi Mehmeti tha se rritja ekonomike në vitin 2021 ishte 9.9 për qind.

Mehmeti ka shtuar se remitencat arritën në mbi 1 miliard euro.

“Me fillimin e pandemisë COVID-19 nga masat e marra nga Qeveria ka bërë që në vitin 2020 ekonomia e Kosovës të ketë rënie prej 5.3 për qind. Me relaksimin e masave kufizuese gjatë 2021-së, kryesisht të ndikuar nga diaspora dhe shumë faktor të tjerë ekonomik bëri që të ketë rritje ekonomike prej 9.9 për qind”, tha Mehmeti për RTK.

Ai ka shtuar se shpenzimet rezidente të diasporës për këtë vit kanë qenë 1.34 miliard euro.

“Me të dhënat e tetorit 2021 që kemi në dispozicion, shpenzimet rezidente të diasporës shënojnë 1.34 miliard euro, me një rritje prej 100 për qind, krahasuar me vitin 2020. Nëse shkojmë te remitencat, ato kanë shënuar një rritje prej 1.05 miliard, me një rritjet prej 18.1 për qind, nëse e krahasojmë me një vit më herët”, ka shtuar ai.

Për sa i përket rritjes ekonomie, Banka Botërore ka parashikuar se për vitin 2021 kjo do të jetë 7.1 për qind.

Sipas BB-së, rritja ekonomike është rikthyer në territor pozitiv gjatë tremujorit të katërt 2020. /Telegrafi/

Komuna e Prizrenit përmes faqes së saj zyrtare, njofton se drejtori Inspektorateve, Islam Ukaj në koordinim me inspektorët e tregut, inspektorët sanitar, inspektorët e veterinarisë dhe inspektorët e bujqësisë, sot gjatë ditës kanë filluar një aksion për inspektimin e qendrave tregtare dhe marketeve të mëdha ushqimore, që veprojnë në komunën e Prizrenit.

Qendrat tregtare dhe marketet ushqimore u inspektuan me qëllim të kontrollimit për zbatueshmërinë e masave anti-covid dhe për respektimin e Ligjit për Mbrojtjen e Konsumatorit dhe Ligjit për Sigurinë e Produkteve.

Gjatë këtij aksioni u realizuan kontrollime për harmonizimin e çmimeve të rafteve me çmimet e arkave, vendosjen e flamujve të origjinës së produkteve, deklaracionet në gjuhën shqipe, afatet e skadencës së produkteve dhe kontrollimi i kualitetit dhe skadencës te produktet e mishit. Inspektorët gjetën produkte me afat të skaduar, të cilat u asgjësuan menjëherë, sipas procedurave të rregullta.

Drejtoria e Inspektorateve do të jetë gjithmonë në krye të detyrës, për mbrojtjen e shëndetit të qytetarëve të komunës së Prizrenit, thuhet në fund të këtij njoftimi.