Ministri i Shëndetësisë, Rifat Latifi në seancën e jashtëzakonshme të Kuvendit ë Kosovës lidhur me situatën me pandeminë tha se të gjitha vendimet për masat vijnë pas diskutimeve me ekspertë shëndetësorë.

Latifi theksoi se kanë vendosur kufizime në sektorë të caktuar që janë me rrezik të lartë dhe po presin të shohin si zhvillohet situata në spitale.

“Natyrisht se çdo ditë e vlerësojmë këtë dhe do t’i marrim masat konform këtyre zhvillimeve. COVID-i është gjithë andej”, tha ministri.

Ajo që e dallon Kosovën nga vendet tjera është numri i madh i testeve, vendi i dytë në rajon pas Sllovenisë.

Ministri i Shëndetësisë po ashtu tha se sipas trendit aktual shihet se Kosova ka shumë më pak raste të vdekjes se vendet tjera.

“Mesatarja javore deri më tash 0.5 raste në 1 milion banorë me vdekje”, tha ai.

Latifi po ashtu theksoi se sipas të dhënave të djeshme janë 130 mjekë dhe 160 infermierë të infektuar me coronavirus.

Infektologu dhe njëherit deputeti i AAK-së, Shemsedin Dreshaj, gjatë seancës së sotme ka kërkuar nga Qeveria që vaksinimi antiCOVID të bëhet obligativ.

“Vaksinimi masiv është dalja nga situata. Numri aktual i të vaksinuarve brenda 24 orëve vetëm prej disa mijëra dozave është vërtetë brengosëse kur e dimë që kapacitetet i kemi mbi 20 mijë doza vaksinë për 24 orë. Ju rekomandojë që vaksinimin ta bëni obligativ, në veçanti për institucionet publike, gjë që e kanë bërë shumë vende të Bashkësisë Evropiane dhe shumë vende të rajonit tonë, nga sot edhe Shqipëria”, ka deklaruar ai.

Dreshaj ka thënë se ditëve të fundit një numër i madh i punëtorëve shëndetësorë në Klinikën Infektive janë infektuar me virus.

Tutje, Dreshaj ka paralajmëruar edhe rritje të numrit të pacientëve të hospitalizuar në ditët e ardhshme.

“Dihet sëmundja ndërlikohet rrallë para ditës së pestë, zakonisht nga dita e shtatë deri ditën e dhjetë, prandaj numri i rasteve të hospitalizuara pritet të rritet në katër pesë ditët e ardhshme e me to fatkeqësishtë edhe rastet që do të kenë ecuri të pafavorshme. Po thuhet që shumica e rasteve janë nën moshën 19-vjeçare, është e pritshme. Kjo grupmoshë është grupmosha më aktive që ka vendi dhe njëkohësisht nuk ka një shkallë të lartë të vaksinimit. E njëjta vlenë edhe për grupmoshën deri në 12-vjeç, këta as që i kemi pasur në program për t’i vaksinuar”, ka deklaruar ai.

Kujtojmë që dje është shënuar rekord i rasteve të reja me COVID-19 për dy muajt e fundit.

/GazetaSinjali/

Kryeministri Kurti mori pjesë në tryezën e rrumbullakët për Programin e banimit adekuat social për Kosovë

Kurti, në hapje të tryezës së rrumbullakët për Programin e banimit adekuat social për Kosovë tha se banimi social është infrastrukturë kritike për të ngritur mirëqenien dhe sigurinë e qytetarëve, për barazi sociale e për të fuqizuar e zhvilluar komunitetet.

Me ç’rast ai theksoi edhe se funksioni i banimit social shkon përtej strehimit të njerëzve në nevojë, sigurimit të banimit të përballueshëm për komunitetet me të ardhura më të ulëta dhe përmirësimin e mirëqenies së tyre të përgjithshme.

Qeveria është duke punuar në këtë drejtim dhe programi i banimit social parashihet edhe në Programin e Qeverisë së Republikës së Kosovës 2021-2025.

Me këtë rast sipas komunikatës për medie nga zyra e kryeministrit thuhet se Kurti, ta ketë theksuar se brenda mandatit, synojnë ta krijojnë programin për banim social, si dhe të mundësojnë banim të përballueshëm për 4 mijë familje.

“Kjo do të arrihet përmes skemës “120×120” dhe “150×150”, ku familjet përfituese do të bëhen pronarë të banesave me këste mujore prej vetëm 120 respektivisht 150 eurove maksimumi dhe për një periudhë kohore prej jo më shumë se 120, përkatësisht 150 muajve. Kostoja vjetore e këtij projekti është rreth 22 milionë euro, mirëpo kjo shumë gradualisht i kthehet institucionit, i cili do të themelohet dhe ngarkohet me zbatimin e projektit”, thuhet tutje.

Edhe sot një grup i specializantëve kanë protestuar para Ministrisë së Shëndetësisë, kjo pasi që ata vlerësojnë se diskriminimi i tyre veçse është thelluar edhe më shumë.

Kryetari i Këshillit të Specializantëve, Arianit Zajmi ka kërkuar nga Ministria e Shëndetësisë dhe institucionet bartëse që strategjinë e premtimeve ta konvertojnë në strategji të veprimit të realizimit të kërkesave të tyre.

Me këtë rast ata kanë theksuar se kërkesat e tyre do të mund të realizoheshin në një afat të shkurtër kohor por që sipas tyre mungon vullneti politik.

“Kërkesa jonë është që specializantët me subvencione të kenë statusin e specializantit të rregullt me marrë një pagë të dinjitetshme, me marrë në fillim të muajit ashtu siç e marrin të gjithë punëtorët shëndetësorë për shkak që ky grupi i margjinalizuar i specializantëve po diskriminohen dhe nuk po i marrin pagat me kohë, nganjëherë iu vonohen e nganjëherë nuk i iu dalin fare. Ne kërkojmë që çdo kujdestari t’iu paguhet për shkak që sot specializantët kujdestarojnë në vikend dhe ditë feste dhe nuk marrin asnjë cent”, shpjegoi Zajmi.

Ai theksoi se pas takimit që kanë pasur me ministrin e Shëndetësisë kanë pritur që veçse të fillojë realizimi i kërkesave të tyre por që një gjë e tillë nuk ka ndodhur. Madje ai ka theksuar se po tentohet që buxheti i shtetit të kursehet në kurriz të specializantëve.

“Jemi të detyruar me protestu rrugës për të drejtat dhe kushtet elementare të jetesës që nuk po plotësohen tash e një vit pothuajse. Këto kushte për të cilat ne po luftojmë me u plotësu do të mund të mund realizohen brenda një periudhe një ditore apo dy ditore mirëpo po mungon vullneti politik për me i realizu kërkesat tona elementare me një far forme po tentohet që buxheti i shtetit dhe paraja publike me u kursy në kurriz të specializantëve

Kemi kërkuar takim dhe kemi prit nga ministri i Shëndetësisë që të realizoj premtimin e tij i cili ka thënë se në fillim të janarit do të realizojnë kërkesat tona por nuk janë realziu. Dhe mund të them se strategjia kryesore që po përdoret me i relaizu kërkesat tona është strategjia e premtimeve dhe unë u bëjë thirrje institucioneve që me ndërru këtë formë të strategjisë dhe strategjisë së premtimit me konvertu në strategjinë e veprimit drejt realizimit të kërkesave tona”, tha Zajmi, raporton kp.

Kërkesë tjetër ishte edhe se nëntë specializantët që vijnë nga Maqedonia, Mali i Zi dhe Shqipëria të fitojnë të drejtën e pagesës për punë që ata bëjnë.

Specializantët kanë bërë të ditur që nuk do të ndalen së protestuari derisa të plotësohen kërkesat për ata po detyrohen të protestojnë.

Presidentja e vendit, Vjosa Osmani ka përkujtuar sot holokaustin, ndërsa theksoi se në kohët më të errëta për hebrenjtë shqiptarët hapën zemrat dhe dyert, duke demonstruar fisnikëri e humanizëm.

Osmani në një postim në Facebook shkruan se përkujtimi i holokaustit është obligim njerëzor i secilit.

“Përkujtimi i Holokaustit është obligim njerëzor i secilit, jo vetëm për t`i nderuar viktimat, por edhe për ta mbajtur zgjuar ndërgjegjen njerëzore që akte të tilla të mos përsëriten kurrë më.

Në Ditën Ndërkombëtare të Përkujtimit të Holokaustit, nderojmë miliona jetë të humbura të popullit mik hebre.

Në kohët më të errëta për ta, shqiptarët hapën zemrat dhe dyert, duke demonstruar fisnikëri e humanizëm.

Në kujtim të kësaj dite jemi fuqimisht të vendosur kundër urrejtjes e diskriminimit dhe vazhdojmë përkushtimin tonë për promovimin e mesazhit: Holokausti, kurrë më!”, shkruan Osmani.