I dërguari special amerikan për Ballkanin Perëndimor, Gabriel Escobar, ka deklaruar se Shtetet e Bashkuara të Amerikës presin nga Kosova dhe Serbia të respektojnë marrëveshjet e nënshkruara gjatë dialogut të lehtësuar nga BE-ja.

Në intervistën për Reporterin, Escobar ka thënë se zotimet e mëhershme duhet të zbatohen.

I pyetur nëse krijimi i Asociacionit ka alternativë, zëvendës ndihmës sekretari amerikan Escobar ka theksuar se Qeveria e Kosovës është zotuar që të ketë Asociacion, ani se SHBA-ja nuk do të diktojë për kompetencat e tij.

“Presim që si Kosova, ashtu edhe Serbia, t’i respektojnë zotimet e mëhershme. Qeveria e Kosovës është zotuar që të ketë një Asociacion të Komunave me Shumicë Serbe (AKS). Shtetet e Bashkuara të Amerikës nuk kanë dhe nuk do të diktojnë se çka duhet të bëjë ky asociacion e as cilat duhet të jetë kompetencat e tij. Ky është vendim sovran që duhet ta marrë Qeveria e Kosovës”, tha Escobar.

Tutje Escobar ka deklaruar se SHBA-ja nxit Qeverinë e Kosovës të shqyrtojë modelet e shumta për asociacionin.

“Ka shumë modele që funksionojnë, duke përfshirë modele të shumta që do të lejonin bashkërenditje më të mirë lokale, pa një nivel tjetër të qeverisë ose pushtetit ekzekutiv. E nxisim Qeverinë e Kosovës që t’i shqyrtojë me kujdes këto modele”, deklaroi Escobar.

Ndonëse ishte kritikuar për  “mbipopullim”, Radiotelevizioni i Kosovës në projeksionin buxhetor për vitin 2022 ka parashikuar rekrutimin edhe të 98 punëtorëve, për të cilët do të ndahen 536 mijë e 631 euro.

Ky projeksion, i cili është  miratuar në bordin e RTK-së, ka paraparë që të ketë të hyra 10 milionë e 537 mijë euro. Nga to 8 milionë e 960 mijë euro të ndara nga buxheti i Kosovës.

Në projeksion-buxhetin e RTK-së thuhet se 8 milionë e 854 mijë euro do të shkojnë për paga, kontrata kolektive, mëditje, kontributet dhe tatime.

2 milionë e 240 mijë euro më pak i ka ndarë Qeveria e Kosovës RTK-së për vitin 2022.

RTK-ja për vitin 2021 kishte pasur 11.2 milionë euro buxhet për të shpenzuar.

Më 19 janar bordi i RTK-së kishte shkarkuar drejtorin gjeneral, Ngadhnjim Kastrati. Në arsyetimin e vendimit për shkarkim thuhet se Kastrati kishte dështuar për tre vite rresht të hapë konkurse për të rekrutuar punëtorët e nevojshëm për funksionim siç duhet të RTK-së.

Gjatë vitit të kaluar deputetët kishin kritikuar numrin e madh të punëtorëve në RTK.

Në atë kohë drejtori i RTK-së, Ngadhnjim Kastrati, kishte thënë para Komisionit për buxhet se planifikon të rrisë numrin e të punësuarve në RTK.

Sipas të dhënave nga projeksioni buxhetor për vitin 2022 në RTK janë rreth 760 punëtorë.

KALLXO.com ka kërkuar të dhëna nga mediat vendore në lidhje me numrin e punëtorëve.

Dardan Belegu, drejtor i Radio Televizionit të Dukagjinit, ka thënë për KALLXO.com se në këtë media punojnë 146 persona.

Ndërsa, Eugen Saraqini nga Media 21 ka thënë se kanë 186 punëtorë.

“Në kuadër te Media 21, operojnë 6 kanale televizive, web faqe, portal”, theksoi ai për KALLXO.com

Ndërkaq sipas një publikimi të vitit të kaluar nga ministri i Financave, Hekuran Murati, Grupi Koha ka 253 të punësuar.

Sipas të dhënave nga ARBK, Klan Kosova ka 190 punëtorë ndërsa Rrjeti Ballkanik i Gazetarisë Hulumtuese, (BIRN) ka rreth 70 të punësuar.

Sindikata e Pavarur e Radiotelevizionit të Kosovës ka deklaruar gjatë javës së kaluar se rreth 150 persona janë duke punuar pa kontrata pune në këtë  institucion tash e 21 ditë.

Sipas kësaj Sindikate cilido veprim i bordit të RTK-së do të jetë shkelje ligjore për shkak se nuk ka dhënë përgjigje me kohë për këtë çështje.

Ndërsa KALLXO.com i ka dërguar Radiotelevizionit të Kosovës pyetje nëse të njëjtëve u është vazhduar kontrata por deri në publikimin e këtij artikulli nuk kemi pranuar përgjigje.

Deputetja e Aleancës për Ardhmërinë e Kosovës, Albena Reshitaj ka kërkuar nga Qeveria e Kosovës që të rishikojë masën për hyrjen në Kosovë, për çka propozoi që kjo masë të zëvendësohet me bërjen e testeve rapide falas në kufi.

Reshitaj u shpreh se po të aplikoheshin testet rapide para festave të fundvitit tashmë vendi do të ballafaqohej me një numër më të ulët të rasteve pozitive.

”Nga përvoja e deritanishme kemi kuptuar se individët infektohen dhe bëhen bartës të infeksionit edhe me dy doza të vaksinës që do thotë edhe me dozën e tretë mund të bëhesh bartës i infeksionit. Ata që kanë marrë dozën e dytë apo që kanë kaluar një variant të virusit dhe kanë ende imunitet, kushtimisht nuk mund të marrin dozën e tretë dhe tjetra, ka shumë vende që frekuentojnë vendin tonë dhe nuk kanë arritur të organizohen për marrje masive të dozës së tretë. Prandaj, unë i propozoj Qeverisë së Kosovës që të rishikojë këtë masë dhe në vend të kësaj të vendos në kufijtë tonë tokësorë dhe ajrorë testimet rapid falas për qytetarët që hyjnë në vendin tonë me ç’rast në besueshmëri prej 90% për pak minuta mund të kuptojmë se ndonjë person i infektuar mund të futet në Kosovë. Po të kishte ndodhur një masë e tillë para festave të fundvitit jam e bindur që do të kishim një situatë krejt tjetër pa numër kaq të rritur të të infektuarve dhe me një monitorim më të mirë të situatës”, tha ajo.

Ministri i Financave, Hekuran Murati, ka kritikuar opozitën të cilët kanë thënë fjalë jo të mira sa i përket menaxhimit të situatës me COVID-19 nga Qeveria Kurti.

Në Kuvendin e Kosovës, ai ka theksuar deputetët duhet të jenë të vendosur në kërkesat e tyre ndaj ekzekutivit, pasi sipas tij, ata janë kundër vendosjes së masave anti COVID, por kundër edhe rritjes së numrit të rasteve.

Ai pohon se nëse largohen masat atëherë nuk kanë të drejtë të akuzojnë qeverinë se po rriten numrat e rasteve me koronavirus.

“Një gjë që është dëshmuar është se vaksinat kanë pasur efektin e vet deri me tani. Deri tani nuk dëgjova asnjë deputetë që bën thirrje për vaksinim të qytetarëve, po e shohim se kemi numër të madh të rasteve me koronavirus, por fatmirësisht kemi numër të vogël të fataliteteve. Duhet të bëjmë thirje që të vaksinohen të pavaksinuarit, dhe ata që janë të vaksinuar të marrin dozën e dytë dhe të tretë”.

“Masat funksionojmë e kemi parë nga e kaluara, ato funksionojnë pas një apo dy jave, këto janë metodat e vetme si mundemi t’i përgjigjemi virusit. Vaksinat dhe masat, asnjë qeveri nuk ka mundur të menaxhojë më ndryshe”,ka thënë Murati, njofton Klankosova.tv.

Ai ka potencuar se në deklaratat e deputetëve ka hipokrizi.