Kreu i PDK-së, Memli Krasniqi, deklaron se nuk do të marrin pjesë në protestën kundër rritjes së çmimit të energjisë elektrike, e cila organizohet këtë të shtunë nga PSD-ja.

Por, Krasniqi, në Rubikon, deklaroi se subjekti që drejton nuk është kundër organizimit të këtyre protestave.

“Ne kemi vlerësuar të drejtën e protestimit edhe në kohën kur Lëvizja Vetëvendosje ka thirrur protesta. Por, normalisht jo të drejtën e dhunës në protesta dhe të krejt atyre veprimeve që zakonisht i kanë përcjellë ato protesta të tyre, është një prej shprehjeve më demokratike protesta dhe marrja pjesë në protesta, por, protestë ka pasur më duket edhe dje, e ka organizuar një organizatë joqeveritare, nesër apo kur është një proteste tjetër. Mund të ketë edhe ndonjë tjetër më vonë, kjo nuk do të thotë që ne duhet ta mbështesim atë protestë, por nuk jemi as kundër saj”.

“Pjesëmarrja në protestë është e drejtë për secilin qytetar, jo vetëm për ata që i mbështesin partitë opozitare, por edhe partinë në pushtet Vetëvendosjen, bile ata e dinë edhe ma mirë qysh me protestu, kanë përvojë”.

“Besoj që secili i ri e secili i vjetër, secili qytetar që ndjehet që është duke iu cenuar e drejta ose mirëqenia e tij në rastin e ngritjes së tarifave të energjisë është absolutisht e drejtë që me dalë e me protestu, por ne si PDK nuk do ta bëjmë këtë punë, pra të jemi pjesë e kësaj proteste,” tha Krasniqi.

Shefi i Grupit Parlamentar të Aleancës për Ardhmërinë e Kosovës, Besnik Tahiri ka thënë se Qeveria aktuale e drejtuar nga kryeministri Albin Kurti nuk është e interesuar që ta shtyjë përpara Ligjin e Pagave.

Tahiri duke folur në një intervistë për Telegrafin është shprehur se ky Ligj krijon një hierarki të pagave në sektorin publik.

“Duhet të shtyhet Ligji i Pagave. Nuk ka vullnet të shtyhet Ligji i Pagave, por pa marr parasysh ne e mbështesim dhe kërkojmë që të shtyhet. Ky Ligj e krijon një hierarki të pagave, i rrit pagat në disa sektorë, në veçanti për policët, mjekët e shumë të tjera”, tha Tahiri.

Ai ka theksuar se pagat në sektorin publik janë në një gjendje të tmerrshme.

“Sektori privat është në gjendje të tmerrshme. Rrogat janë minimale, ka paga 200 euro. Ka një vit që kryeministri Kurti nuk është marr me këtë çështje”, ka theksuar ai.

Në këtë intervistë, Tahiri po ashtu ka folur për krizën energjetike në vend, politikën e jashtme dhe dialogun me Serbinë.

Faton Peci, nga Lista “Guxo” ka thënë se kjo listë do të formalizohet gjatë muajit shkurt.

Peci këtë deklaratë e ka bërë në “DESKU” të KTV-së, duke thënë se planifikohet që të kryhen të gjitha procedurat e nevojshme dhe pas gjashtë muajsh të mbahet edhe Kuvendi zgjedhor i partisë.

“Lista Guxo do të formalizohet gjatë muajit shkurt, ne aplikojmë për formalizim pastaj është një afat 30 ditor kur do të jemi edhe formalisht si subjekt politik dhe mandej do të ndjekim procedurat. Ne kemi një pjesë të konsolidimit në shumicën e qyteteve kryesore të Kosovës, mirëpo gjatë gjashtë mujorit pas shkurtit synojmë një konsolidim më masiv, duke organizuar kuvende zgjedhore në shumicën e komunave, duke e finalizuar me një kuvend zgjedhor pas gjashtë muajsh”, ka thënë Peci.

Ai ka shtuar se janë duke punuar intensivisht në platformën politike por edhe në statusin dhe rregullat e brendshme.

Lista “Guxo” sipas tij do të mbetet ideologjikisht e djathtë.