Mikrobiologu Lul Raka ka bërë të ditur se vaksinimi antiCOVID mbetet një komponent kyç për të ulur ndikimin e Omicronit, që ka shënuar rritje masive në Kosovë dhe botë.

Kështu ka shkruar mikrobiologu Lul Raka në një postim në Facebook.

Raka më tej thekson infeksionet me Omicron kanë pasqyrë më të lehtë klinike, pasi që virusi lokalizohet kryesisht në rrugët e sipërme të frymëmarrjes dhe se inkubacioni mesatar është shkurtuar në 3 ditë.

Lexoni të plotë postimin e tij:

Varianti Omicron ka shënuar rritje masive në Kosovë dhe botë. Ky variant mund të shmangë pjesërisht veprimin mbrojtës të antitrupave të krijuar nga vaksinimi ose nga infeksioni natyror duke rezultuar në përhapje masive të rasteve me COVID-19 në komunitet.

Në raportin e fundit të ECDC (European Center for Disease Control), që përfshin periudhën kohore 10-23 Janar 2022, Kosova ka incidencë prej 1157 rasteve në 100.000 banorë. Nga shtetet e rajonit, Shqipëria ka 997 raste, Maqedonia 1099, Serbia 2805 e Mali i Zi 3798.

Në Evropë prijnë Danimarka me 7554 raste në 100.000 banorë, Franca 6661, Portugalia 5773, Sllovenia 5661, Zvicrra 4783, etj. Incidencën më të ulët e kanë Azerbejxhani dhe Bellorusia me 120, respektivisht 210 raste në 100.000 banorë.

Shkalla aktuale mesatare e rasteve në BE është 2.621 raste për 100 000 banorë. Prej tyre janë shtrirë në spital 1.14% , për kujdes intensiv kanë pasur nevojë 0.16% dhe kanë vdekur 0.06% e pacientëve. Në disa raste pacientët e shtrirë në spitale janë diagnostikuar rastësisht me Covid-19; d.m.th. janë pranuar për shkaqe të tjera në spital.

Gjatë kësaj periudhe shkallën më të ulët të vdekjeve në 1 milionë banorë e kanë Kosova (5.01) dhe Gjermania (5.13). Shtetet e rajonit kanë këtë shkallë vdekshmërie në 1 milionë banorë: Shqipëria 23, Serbia 52, Maqedonia 89, Mali i Zi 132 dhe Bosnja 146. Në Evropë, prinë Bullgaria me 161 vdekje/1 milion banorë.

Infeksionet me Omicron kanë pasqyrë më të lehtë klinike, pasi që virusi lokalizohet kryesisht në rrugët e sipërme të frymëmarrjes. Inkubacioni mesatar është shkurtuar në 3 ditë.

Shkalla e shtrimit në spital dhe vdekshmëria janë më të ulëta sesa në valët e mëparshme pandemike. Një rol të rëndësishëm këtu ka luajtur edhe vaksinimi.

Por, përhapja masive në komunitet ka shkaktuar mbingarkesë të konsiderueshme në sistemin shëndetësor dhe në kategoritë e tjera esenciale të shoqërisë për shkak të mungesave masive në punë dhe mësim.

MASAT KUFIZUESE

Masat kufizuese varen nga faktorët shëndetësorë (numri i rasteve, spitalizimet, vdekjet, shkalla e vaksinimit), ekonomia, kapaciteti i shtetit për subvencione, shëndeti mental dhe të drejtat e njeriut.

Balancimi i gjithë këtyre faktorëve është i vështirë dhe nuk është i njëjtë askund. Vendimet duhet të merren duke u bazuar në të dhënat epidemiologjike në kohë reale.

Masat kufizuese në Evropë- https://covid-statistics.jrc.ec.europa.eu/RMeasures

(Rumania dhe Austria kanë pasur orë policore për të pavaksinuarit).

ÇKA DUHET TË BËJMË?

VAKSINOHUNI!

Personat e pavaksinuar ose pjesërisht të vaksinuar kanë rrezik më të lartë për sëmundje të rëndë dhe spitalizim. Prandaj, vaksinimi mbetet një komponent kyç për të ulur ndikimin e Omicronit.

ZBATONI MASAT PARANDALUESE- mos humbni kohë duke e kërkuar fajtorin kujdestar për gjendjen e sotme, sepse atë mund ta gjesh kudo, duke filluar prej vetes tënde e deri te Paria e vendit.

Fuqizoni INSPEKTIMET e zbatimit të masave parandaluese dhe vendimeve në terren bashkë me KOMUNAT!

Stimuloni të vaksinuarit kudo dhe kurdo!

Stop politizimit të COVID-it!. /Telegrafi/

Nga 1 shkurti qytetarëve të Kosovës faturat e energjisë elektrike është paralajmëruar që do t’iu vijnë më shtrenjtë.

Kjo për shkak që Zyra e Rregullatorit të Energjisë (ZRrE), ka propozuar që të ketë tarifa ndryshe nga ato që kanë qenë më parë, raporton FrontOnline.

E, në këto tarifa do të ketë dallime.

Derisa, një familje që konsumon energji deri në 600 KWh, nuk do të paguajë me rritje të tjerat do të preken nga ky vendim.

Por, një “privilegj” për këtë do t’i bëhet pjesës veriore të vendit.

Zyra e Rregullatorit të Energjisë nuk i ka përfshirë fare katër komunat veriore të Republikës së Kosovës në raportin e vetë në të cilën u shqyrtua dhe propozua rritja e çmimit të energjisë elektrike.

Kryesuesi i Bordit të ZRRE-së, Ymer Fejzullahu, teksa ka raportuar në Komisionin për Ekonomi, e ka arsyetuar një vendim të tillë, duke thënë se janë në proces gjyqësor me Avokatin e Popullit.

“Edhe ajo pjesë ka qenë e përfshirë në tarifat e energjisë elektrike deri në vitin 2018. Avokati i Popullit ka ngrit një ankesë dhe e ka paditë ZRRE-në për të cilën jemi në proces gjyqësor. Ajo kosto nga viti 2017, dhjetor të vitit 2017 është hequr apo nuk është barrë e konsumatorëve dhe ajo ka kaluar përmes buxhetit të Kosovës, pastaj është mbuluar nga KOSTT-i dhe ZRRE-ja. Meqenëse ia ka ndaluar gjykata që ta përfshijë këtë kosto, ne nuk e kemi marrë parasysh as në kalkulimet e mëhershme meqenëse jemi në proces gjyqësor”, ka thënë Fejzullahu.

Përjashtimin e katër komunave veriore në raportin e ZRrE-së, nuk e kanë komentuar nga Qeveria e Kosovës.

Ata nuk kanë kthyer përgjigje për FrontOnline, kur janë pyetur se a do të pranojnë propozimin, që katër komunat veriore të përjashtohen nga ky vendim.

Por, një gjë të tillë ashpër po e kundërshtojnë opozita.

Deputeti i PDK-së: Përjashtimi i komunave veriore nga shtrenjtimi i energjisë shkelje e rëndë ligjore dhe pabarazi

Shkelje të rëndë ligjore dhe ndërhyrje po e konsideron përjashtimin e katër komunave veriore nga shtrenjtimi i energjisë elektrik, deputeti i PDK-së, Ferat Shala.

Shala, në një prononcim për FrontOnline, thotë se kjo nuk duhet të pranohet pasi që është diskriminim.

“Kushtetuta është e qartë, ligjet janë të qarta se kjo është ndërhyrje, ne e kemi thënë edhe atë ditë në Komision edhe sot që këtu po bëhet shkelje, është pabarazi, është diskriminim dhe nuk guxojmë të pranojmë që territorialisht t’i largojmë katër komunat nga planifikimet tona strategjike e as nga një lloj planifiku tjetër, jo vetëm energjetik por as social, as ekonomik e as arsimor”, ka deklaruar Shala për FrontOnline.

Ndërsa, ka treguar se çfarë do të ndërmarrin në rast se merret ky vendim.

“Tani për tani kemi një rast të paprecedent, të paraparë deri më tani ku raporti i ZRrE-së në koordinim me Qeverinë del jashtë ndikimit institucional, jashtë ndikimit social, ekonomik në ato katër komuna, pra është një shkelje e rëndë ligjore dhe pabarazi. Ditëve në vijim do t’i bashkërendojmë të gjithë hapat institucional dhe të shohim e të presim sepse është draft raport dhe të presim vendimin final”, është shprehur ai, për FrontOnline.

Bunjaku e LDK-së: Nëse katër komunat s’përfshihen në shtrenjtim të energjisë, Qeveria po e ndanë Kosovën

Deputetja e Lidhjes Demokratike të Kosovës, Valentina Bunjaku në një prononcim për FrontOnline ka deklaruar se nëse katër komunat veriore nuk përfshihen në raport të ZRrE-së, e cila ka propozuar shtrenjtim të energjisë atëherë Qeveria po e bën vet ndarjen e Kosovës.

“Edhe pjesa veriore është Kosovë dhe nëse ata e ndajnë kështu atëherë e kemi nda Kosovën. Këta vetvetiu po e ndajnë Kosovën. Ne jemi kundër dhe e kemi thënë mendimin tonë. Realisht ne jemi kundër shtrenjtimit të rrymës”, ka thënë ajo për FrontOnline.

Kurse, thotë se të gjitha institucionet janë kapur nga Qeveria dhe i kanë bërë pronë të tyre.

“Realisht kjo Qeveri u ardhë me atë kauzën që do ta bëjë lirimin e rrymës dhe është ardh me atë kauzën që qeveritë e kaluara nuk e kanë pas qasjen e duhur me veriun, po e ndajnë Kosovën. Tash këta janë në Qeveri dhe i kanë krejt edhe le ti bëjnë të gjitha punët sepse të gjitha institucionet i kanë kap dhe i kanë të vetat. Për Lidhjen Demokratike të Kosovës kjo është e papranueshme”, është shprehur Bunjaku.

Duda Balje: S’duhet të ketë diskriminim në faturat e energjisë

Deputetja e grupit multietnik, Duda Balje po ndihet e diskriminuar pasi që katër komunat në veri të vendit nuk do të përfshihen në shtrenjtim të energjisë elektrike në rast se pranohet propozimi i ZRrE-së.

Balje, në një prononcim për FrontOnline, thotë se përpos kësaj është edhe kundër shtrenjtimit të energjisë.

“Nuk mund të ketë diskriminim në bazë të një regjioni të Kosovës, do të thotë nuk kam parë arsye që të ndodhë kjo, ZRrE-ja e ka dhënë këtë informatë dhe në momentin që kam dëgju kam reaguar menjëherë do të thotë unë mendoj që duhet me gjet zgjidhje mos me pas tarifa më të larta se tash të rrymës. Po bëhet shkelje e Kushtetutës, është shkelje e të drejtave të njeriut, është një mendim jo normal ndaj kësaj sepse edhe nëse ndodhë kjo unë dua të di pse kjo, po ndodhë”, ka deklaruar ajo.

Deputetja e AAK-së: Qeveria t’i përdorë ligjet edhe në pjesën veriore

Deputetja e AAK-së, Time Kadrijaj, ka kërkuar nga Qeveria e Kosovës që të përdor ligjet njëjtë edhe në pjesën veriore, edhe sa i përket energjisë elektrike.

“Me këtë tarifë që po e propozon Qeveria me rritjen e çmimit të energjisë elektrike të lirohen serbët e pjesës veriore të lirohen edhe komunitetet tjera sepse duhet të ketë një superkomunikim mes komuniteteve dhe këtu po bëhen dy lloj diskriminimesh edhe ndaj komuniteteve tjera jo shumicë por edhe ndaj pjesës tjetër. Ne duhet të paguajmë të gjithë dhe Qeveria duhet ta përdorë të drejtën e vet edhe ligjet dhe Kushtetutën e Kosovës dhe ta shtrijë ndikimin e vet edhe në pjesën veriore”, ka deklaruar Kadrijaj për FrontOnline.

Sipas saj, është pikërisht Lëvizja Vetëvendosje partia në pushtet e cila ë kohën sa ishte në opozitë kishte kundërshtuar në masë të madhe mospagesën e rrymës në pjesën veriore.

Sipas propozimit të ZRRE-së, tarifa për konsumatorët me 800 kËh rrymë të shpenzuar në muaj do të rritet në vlerë prej 13.31 eurosh, derisa konsumatorët që shpenzojnë 1000 kËh rrymë në muaj, do të përballen me një rritje prej 24.62 euro të çmimit të rrymës.

Ndaj, shtrenjtimit të energjisë elektrike dje në Kosovë është organizuar një protestë nga qytetarët të cilët kanë kundërshtuar këtë, duke i kërkuar kryeministrit Albin Kurti që të ndalojë një gjë të tillë.

Në protestë qytetarët kanë kërkuar të mos aprovohet bllok tarifa e propozuar nga Zyra e Rregullatorit të Energjisë (ZRRE) dhe që të nacionalizohet Kompania Kosovare për Distribuim të Energjisë Elektrike (KEDS).

Kurse, një protestë tjetër e thirrur nga Partia Socialdemokrate do të mbahet këtë të shtunë.

Pjesëmarrjen në këtë protestë e kanë konfirmuar edhe partitë opozitare./FrontOnline

Prokuroria Themelore në Prizren në një komunikatë për media ka njoftuar se , Departamenti i Krimeve të Rënda, ka kërkuar caktimin e masës së paraburgimit nga Gjykata Themelore në Prizren ndaj të pandehurit I.O., i cili me vendim të Prokurorit të Shtetit gjendet nën masën e ndalimit 48 orësh.

Sipas kërkesës, i dyshuari I.O me datë 27.01.2022 në cilësinë e personit zyrtar – si përgjegjës, përkatësisht inxhinier i pylltarisë pranë Autoritetit Pyjor në kuadër të Komunës së Prizrenit vepron në kundërshtim me kërkesën e Drejtorisë së Shërbimeve Publike të kësaj komune, e cila kishte kërkuar që drunjtë e prerë në parkun e qytetit të Prizrenit, duhej të dërgoheshin në hapësirat e Shërbimit të Pylltarisë, por i njejti nuk e përfill kërkesën në fjalë me ç’rast vëllimin prej 60 metër kub të drunjëve ia jep një kompanie private.

Duke vepruar në këtë mënyrë, i njejti dyshohet të jetë përfshirë në kryerjen e veprës penale “Keqpërdorimi i pozitës apo autoritetit zyrtar” nga neni 414, paragrafi 1 të Kodit Penal të Republikës së Kosovës (KPRK), thuhet në njoftim.

Kryetari i PDK-së, Memli Krasniqi, e ka kritikuar Qeverinë Kurti se nuk po vepron në mënyrë proaktive për të parandaluar rritjen e çmimeve. Krasniqi tha se në rast të përshkallëzimit të konfliktit mes Rusisë dhe Ukrainës, vendi ynë do të përballet me kriza të reja, duke përfshirë edhe rritjen e çmimit të miellit.

“Nëse vërtet përshkallëzohet konflikti Rusi-Ukrainë, situata le që do të përkeqësohet për energjinë, ne do të kemi situata të reja të përkeqësimit të situatës, po e marr një shembull, do të ngritët çmimi i miellit dhe si pasojë çmimi i bukës. Unë besoj deri në 1 euro ka me u bo buka në Kosovë nëse kjo situatë ndodh, qeveria duhet të blejë rezerva, por ata nuk merren me këtë punë, nuk ua pret mendja, kjo është temë që edhe në nivel të Bashkimit Evropian diskutohet,” tha Krasniqi në Klan Kosova.

Duke folur për rritjen e çmimit të energjisë elektrike në vend, Krasniqi tha se opozita nuk mund ta ndalë ZRRE-në, por në rast të rritjes do t’i drejtohen edhe Gjykatës Kushtetuese.

“Çmimi i rrymës është shumë problematik, opozita nuk mund ta ndalë ZRRE-në, ne kemi kërkuar edhe shkarkimin e tyre nëse vjen deri te kjo, por ne votat s’i kemi shkarkuar. E dyta, nëse ndodh vendimi, ne do ta atakojmë përmes gjykatave deri në momentin kur ta çojmë në Gjykatën Kushtetuese, sepse instrumentet këto janë”, tha Krasniqi.

Ministria e Financave, Punës dhe Transfereve njofton se më 4 shkurt të këtij muaj do të mbahet ankandi i parë për vitin 2022.

Në këtë ankand, do të emetohen Obligacione me maturitet 3 vjeçar në shumën prej 25 milionë euro.

“Investimi në Obligacione është investim i sigurt, i garantuar me Ligjin për Borxhin Publik, ku interesi i përcaktuar nga tregu ju garantohet për të gjithë kohëzgjatjen 3 vite dhe është tërësisht i liruar nga tatimi. Për detaje rreth pjesëmarrjes në ankande për blerjen e letrave me vlerë, ju lutem kontaktoni ndonjërën nga Bankat Komerciale që operojnë në Republikën e Kosovës”, thuhet në komunikatë, transmeton Klankosova.tv.