Gjendja në Kosovë tani është shumë më e qetë se sa ishte, por ndonjëherë ka ende tensione, njoftojnë NATO dhe KFOR-i në rrjetet sociale. Ata shtuan se “forcat e Kosovës të udhëhequra nga NATO dhe KFOR mbeten kyçe për stabilitetin në rajon”.
Ky mesazh është publikuar gjatë vizitës së dyshes euro-amerikane Miroslav Lajçak dhe Gabriel Escobar, të cilët po tentojnë të rifillojnë dialogun e nivelit të lartë ndërmjet Beogradit dhe Prishtinës.
Ende nuk është konfirmuar nëse Lajçak dhe Escobar do të takohen me dikë nga ky mision ushtarak sot, para nisjes për në Beograd. NATO-ja e ka publikuar këtë mesazh me një video të shkurtër nga veriu i Kosovës dhe përkujtim se deri vonë ka pasur barrikada të serbëve vendas pas mosmarrëveshjes mes Prishtinës dhe Beogradit për targat.
Mesazhi përkujton se KFOR-i është i treti në zinxhirin e reagimit në situata të tilla, pas Policisë së Kosovës dhe EULEX-it, që do të thotë se “gjendja është e rëndë” kur KFOR-i thirret për ndihmë.
“Detyra jonë nuk është të vendosim se kush ka të drejtë dhe kush ka gabuar, por të ndihmojmë në ruajtjen e paqes këtu”, përfundon mesazhi.
