Kryetari i Partisë Demokratike Progresive, Nenad Rashiq, beson se qëllimi i vizitës së të dërguarit amerikan për Ballkanin Perëndimor, Gabriel Escobar dhe emisarit të Bashkimit Evropian për dialogun, Miroslav Lajçak, është për ta bindur kryeministrin e Kosovës Albin Kurtin, për ta formuar Asociacionin e komunave me shumicë serbe.

Rashiq mendon se Albin Kurti duhet të largohet nga qasja aktuale në raport me dialogun e të ofrojë ide e iniciativa të reja sa i përket marrëveshjes ndërmjet Kosovës dhe Serbisë.

Politikani serb vlerëson se dy diplomantët perëndimorë gjatë qëndrimit në Prishtinë ia kanë bërë të qartë kreut të ekzekutivit kosovar se duhet të lëvizjet në drejtim të krijimit të Asociacionit.

“Vërtet mendoj se është shumë shqetësuese dhe irrituese që kryeministri Kurti është bunkerizuar politikisht dhe nuk tregon gatishmëri për asnjë ide, ndonjë risi dhe iniciativë që mund të rezultojë në një mirëkuptim të përbashkët, apo nga fusha e bunkerizimit të kalojë në një fushë tjetër të dialogut real që mund të rezultojë me ndryshime, ose së paku ofrim të ideve se si duhet të duket ai Asociacion i komunave serbe. Mendoj se kjo nuk i bënë dobi askujt, veçanërisht serbëve të Kosovës në planin afatgjatë”, ka thënë Rashiq për Ksp-në.

Në të vërtetë, Gjykata Kushtetuese ka rrëzuar një mori pikash të marrëveshjes për Asociacionin si antikushtetuese.

Politikani i moderuar serb theksoi se nuk ka vullnet që Asociacioni të krijohet brenda normave të Kushtetutës së Kosovës.

Escobari dhe Lajçaku qëndruan në Prishtinë për tri ditë ku kishin takime me liderët institucionalë dhe ata opozitarë.

Temë kryesore e diskutimeve ishte dialogu me Serbinë, ku përfaqësuesit e SHBA-së dhe BE-së ishin në një linjë se nuk do të ketë “Republikë Serbe në Kosovë”.

Ata kërkuan konstruktivitet në çështjen e dialogut, pasi thonë se është tejet e rëndësishme për stabilitetin në rajon.

Zyra e Kryeministrit ka njoftuar për dy vendimet që mori në mbledhjen e sotme të Qeverisë së Kosovës.

Bëhet fjalë për emërimin e bordit të ndërmarrjes publike “Trepça” dhe bordin e drejtorëve në ndërmarrjen publike KEK.

Qeveria ka emëruar drejtorë në Bordin Mbikëqyrës në Trepça Sh.A.: Bahri Hyseni, kryesues, Ibrahim Krasniqi, anëtar, Muharrem Peci, anëtar, Bujar Bilalli, anëtar dhe Xhevdet Tahiri, anëtar me mandat katërvjeçar.

Ndërkaq, në KEK Skender Haziri u zgjodh kryesues, Merita Kasapolli, anëtar, Begzad Halilaj, anëtar, Valbona Raifi – Deshishku, anëtar, Mustafa Pllana, anëtar dhe Valdrin Krasniqi, anëtar me mandat tre vjeçar.

Njoftimi i plotë:

Qeveria e Republikës së Kosovës ka zhvilluar mbledhje të rregullt, të 58-tën, në të cilën ka emëruar Bordin Mbikëqyrës të Drejtorëve në Ndërmarrjen Publike “Trepça” dhe Bordin e Drejtorëve të Ndërmarrjes Publike “Korporata Energjetike e Kosovës/KEK” Sh.A.

Vendimi për emërimin e Bordit në Ndërmarrjen Publike “Trepça” është miratuar nga Qeveria në pajtim të Ligjit për Trepçën dhe të Ligjit për Ndërmarrje Publike. Pas zbatimit të të gjitha procedurave të nevojshme të përzgjedhjes së kandidatëve, Qeveria ka emëruar drejtorë në Bordin Mbikëqyrës në Trepça Sh.A.:

1. Bahri Hyseni, kryesues

2. Ibrahim Krasniqi, anëtar

3. Muharrem Peci, anëtar

4. Bujar Bilalli, anëtar

5. Xhevdet Tahiri, anëtar

Mandati i anëtarëve të Bordit Mbikëqyrës të Trepça Sh.A. zgjat katër (4) vite dhe pjesë e Bordit do të jenë edhe dy përfaqësues të zgjedhur nga punëtorët e Ndërmarrjes.

Edhe vendimi për emërimin e Bordit të Ndërmarrjes Publike Korporata Energjetike e Kosovës Sh.A. ka marrë miratimin pas përfundimit dhe plotësimit të të gjitha kushteve në pajtim me Ligjin për Ndërmarrjet Publike dhe sipas rekomandimit të Komisionit Rekomandues për përzgjedhjen e kandidatëve për drejtorë të bordit, në këtë përbërje:

1. Skender Haziri, kryesues

2. Merita Kasapolli, anëtar

3. Begzad Halilaj, anëtar

4. Valbona Raifi – Deshishku, anëtar

5. Mustafa Pllana, anëtar

6. Valdrin Krasniqi, anëtar

Mandati i anëtarëve të Bordit të emëruar zgjatë tri (3) vite.

Komuna e Graçanicës për herë të parë ka zgjedhur një nënkryetar nga komuniteti shqiptar.

Leutrim Ajeti, i cili ka zënë vend në asamblenë komunale nga “Aleanca Shqiptare”, ka marrë besimin për të qenë nënkryetar për komunitete i Komunës së Graçanicës.

Ajeti në një prononcim për KOHËN ka treguar se propozimi për të marrë pozitën e nënkryetarit të kësaj komune me shumicë serbe, ka ardhur nga kryetarja e zgjedhur e Graçanicës, Ljiljana Subaric, në mbledhjen e mbajtur me kryesuesin e Kuvendit dhe një këshilltar të kryetares.

Ai thotë se për të marrë përgjegjësinë që i është besuar, fillimisht i është dukur e vështirë, por se planet e tij për t’i përmbushur objektivat që i kanë paraqitur si Aleancë.

“Në takimin e parë me kryetarin pas marrjes së detyrës, u pranua propozimi që unë të jem kandidat për nënkryetar për komunitete, pasi edhe isha më i votuari në zgjedhjet e 17 tetorit. Unë, kryesuesi i Kuvendit dhe një këshilltar i kryetares. Duke e parë që nuk kemi pasur asnjëherë deri tash nënkryetar për komunitete, në fillim mu duk mision i vështirë, por kryetarja që nga fillimi i mandatit ishte mjaft bashkëpunuese”, ka thënë ai.

Nënkryetari i sapo-zgjedhur i Graçanicës ka njoftuar se gjatë mandatit të tij do të punojë për prioritetet të cilat i ka paraqitur kur ka garuar për të zënë ulëse në asamble komunale e që ato janë asfaltimi, ndriçimi dhe trotuaret, të cilat paraqesin problem për fshatrat e populluara me komunitete jo-shumicë.

Linja e autobusëve Prishtinë-Kishnicë dhe shëndetësia janë dy çështje të tjera për të cilat synohet të punohet bashkërisht me komunën e Prishtinës.

“Planet e mia gjatë këtij mandati janë që të punoj dhe t’i përmbushi objektivat që bashkërisht me Aleancën tonë i kemi pasur prioritete. Edhe kryetarja ka shprehur gatishmëri që bashkërisht t’i realizojmë këto prioritete. Prioritetet tona si Aleancë kanë qenë dhe vazhdojnë të jenë asfaltimi, ndriçimi dhe trotuaret, të cilat mungojnë në fshatrat ku kemi komunitete jo-shumicë. Linja e autobusit Prishtinë-Kishnicë. Dhe shëndetësia, për të cilën duhet të punojmë bashkërisht edhe me Komunën e Prishtinës”, ka shtuar ai.

Komuniteti shqiptar përbën rreth 15 për qind të popullsisë së kësaj komune, andaj Ajeti thotë se bashkërisht me kryetaren e re do të punojë për mirëqenien e të gjithë qytetarëve pa dallim etnie dhe se do të marrin epilog edhe punët e mbetura nga mandate i kaluar.

“Komuniteti shqiptar përbën rreth 15 për qind të komunës, por për të qenë më të saktë këtë vit do të bëhet regjistrimi i popullsisë dhe do të kemi shifrën e saktë. Do ta shikoj po sa ta marr detyrën edhe zyrtarisht dhe së bashku me kryetaren e re dhe nëse ka nevojë edhe me nivelin qendror do t’i kryejmë edhe punët që kanë mbetur nga mandati i kaluar”, ka përfunduar ai.

Ajeti nga “Aleanca Shqiptare” fillimisht u zgjodh zëvendëskryesues i Kuvendit Komunal të Graçanicës. Aleanca Shqiptare në Graçanicë ka garuar në një listë të përbashkët në zgjedhjet e fundit lokale.

Në postin të cilin tashmë ka pranuar Ajeti, para tij ishte Sebastijan Sherifoviq nga komuniteti rom, i cili mbajti këtë mandate për katër vjet, nga 2013 deri më 2017.

Pas qëndrimit dy ditor në Kosovë, Përfaqësuesi Special i Bashkimit Evropian, Miroslav Lajçak është nisur drejt Beogradit.

Në vizitën e tij në Beograd, Lajçak pritet të takoj presidentin serb, Aleksandar Vuçiq.

Përmes një publikimi në Twitter, Lajçak tha se gjatë rrugës për në Beograd është ndaluar edhe në pikë kalimin në Mutivodë.

“Gjatë rrugës nga Prishtina për në Beograd, vizitova objektet e ndërtuara nga Bashkimi Evropian në pikë kalimin në Mutivodë. Është një rezultat konkret i dialogut të ndërmjetësuar nga BE-ja, i dobishëm për të gjitha komunitetet dhe lirinë e tyre të lëvizjes. Shpresojmë që së shpejti do ta shohim plotësisht funksional dhe të përdorur nga të dyja palët”, tha ai.

Gjatë qëndrimit në Prishtinë, Lajçak bashkë me emisarin amerikan, Gabriel Escobar kanë takuar presidenten Vjosa Osmani, kryeministrin Albin Kurti si dhe përfaqësuesit e opozitës.

Kreu i Aleancës për Shqiptarët në Maqedoninë e Veriut, Ziadin Sela, ka thënë se Qeveria e Kosovës do të lehtësojë masat për hyrje në Kosovë nga qytetarët jashtë Kosovës.

Sela këtë e bëri të ditur pas takimit që ka zhvilluar me kryeministrin e Kosovës, Albin Kurti.

“Këto takime janë në funksion të një rivendosjeje të komunikimit më se të nevojshëm. Rajoni ka zhvillime dhe për këtë na duhet bashkëbisedim në mes njerëzve që duhet të kenë një urë që i bashkon që të marrin vendime të rëndësishme”.

“Diskutuam edhe për pandeminë dhe masat, të cilat janë vënë nga Qeveria e Kosovës, për të cilat morëm lajmin se do të lehtësohen”, tha Sela.

Presidenti i SHBA-së, Joe Biden, ka miratuar dërgimin e trupave shtesë ushtarake në lindje të Evropës, ndërkohë që Pentagoni pritet ta bëjë të ditur sot se këto trupa do të dërgohet në Evropë “në ditët në vijim”, kanë bërë të ditur për CNN, zyrtarë amerikanë.

Dërgesa e këtyre trupave po shihet si mbështetje për aleatët e NATO-s, të cilët po ndihen të kërcënuar nga lëvizjet e ushtrisë ruse në kufi me Ukrainën, kanë bërë të ditur të njëjtit zyrtarë.

Pentagoni pritet të njoftoj se mijëra trupa shtesë do të dërgohen në vende të ndryshme të Evropës.

Dislokimet do të përfshijnë afërsisht 2,000 trupa të SHBA-së në Poloni, dhe disa mijëra shtesë në vendet juglindore të NATO-s, duke përfshirë Rumaninë, thanë burimet.

SHBA-ja ka vënë 8,500 trupa në gatishmëri, t’i shtuar në rast se një Forcë Reaguese e NATO-s thirret dhe forcat e SHBA-së nevojiten shpejt. Por SHBA-ja dhe NATO-ja kanë dhjetëra mijëra trupa të tjera tashmë në Evropë për të tërhequr çdo dislokim shtesë tek aleatët e Evropës Lindore. Disa nga trupat që do të vendosen së shpejti janë tashmë të stacionuara në Evropë, thanë burimet, ndërsa të tjerat do të vijnë nga ato në SHBA që janë tashmë në gatishmëri të shtuar.

Trupat do të operojnë në një bazë dypalëshe me vendet e tyre pritëse, pasi NATO-ja nuk ka aktivizuar ende një forcë reagimi shumëkombëshe.

CNN raportoi javën e kaluar se SHBA-ja dhe një pjesë e vogël e aleatëve kishin qenë në diskutime për të vendosur mijëra trupa të tjera në vendet e NATO-s të Evropës Lindore përpara çdo pushtimi të mundshëm rus të Ukrainës, si një shfaqje mbështetjeje përballë agresionit të vazhdueshëm të Moskës.