Çmimi për një litër naftë në Kosovë sillet nga 1.25 deri në 1.34 cent kurse i benzinës nga 1.27 deri në 1.35 cent.

Por, gjatë muajit shkurt është paralajmëruar që çmimi i naftës të shkojë deri në 1.60 euro.

Për kryetarin e Shoqatës së Naftëtarëve të Kosovës Fadil Berjani, ky pritet të jetë refleksion i tregjeve botërore.

Berjani tha për Klankosova.tv se është pritur që çmimi i naftës të stabilizohet nga Organizata Botërore e Tregtisë deri në fund të janarit por kjo nuk ka ndodhur.

“Çmimi është i lartë për qytetarët duke pasur parasysh se në çfarë gjendje ekonomike janë”.

“Sipas njoftimeve që kemi pasur nga organizata OPEC, është dashur që në fund të janarit të ketë stabilizim të çmimeve, por kjo nuk ndodhi. E kemi rastin Ukrainë-Rusi dhe edhe kjo e ka tensionuar dhe ka dhënë shtytje që të rriten çmimet e derivateve. Kemi rritje të derivateve çdo ditë, brenda 24 orëve 25 euro në ton. Nuk pritet që për një kohë të stabilizohet. Kjo rritje do të vazhdojë”.

Njohësi i çështjeve ekonomike Jakup Bellaqa konsideron se rritja e çmimeve të derivateve e rëndon xhepin e qytetarëve.

Bellaqa tha për Klankosova.tv se kjo rritje ndikon edhe në artikujt e shportës elementare sepse sipas tij këto artikuj importohen nga jashtë.

“Ngritja e çmimit sipas paralajmërimeve se do te shkojë deri në 1.60 për liter, kjo për xhepin e qytetarit është e papërballueshme dhe ndikon direkt negativisht edhe në rrjedhat dhe proceset e tjera ekonomike sepse rritet kostoja e transportit multimodal që e përkeqëson jo veq jetën e ekonomive familiare por edhe sektorin privat, dhe strukturen ekonomike të lëmive tjera si prodhuese, tregtare, sherbyese”.

“Gjithashtu ndikon edhe në rritjen e çmimeve të artikujve të shportës së produkteve elementare, sepse kur dihet se këto produkte importohen nga jashtë Kosovës, dhe do të rritet kostoja e transportit, por duhet të shtohet në perspektivë se për t’u frenuar çmimet e derivative shteti do te duhej në ditëve në vijim që ta themelon një rregullator për rregullimin dhe monitorim të çmimeve të derivative, ku nuk do te lejoheshin që të ketë çmime diskriminuese dhe jo konkuruese dhe të jenë çmime konkurruese dhe sipas rajonit”.

Ndërkaq në Shqipëri çmimi për një litër naftë arrin deri në 1.52 euro, ndërsa benzina kap shifrën prej 1.54 euro.

Gjykata Apelit ka hedhur si të pabazuar ankesën e Prokurorisë Themelore në Prishtinë dhe ka mbajtur në fuqi aktvendimin e Gjykatës Themelore në Prishtinë për ministrin Liburn Aliu dhe pesë të tjerë.

Më herët, Themelorja kishte hedhur poshtë aktakuzën për Aliun dhe pesë zyrtarë të tjerë për kohën sa ishin zyrtarë të Komunës së Prishtinës. Rasti ka të bëjë me lagjen “Prishtina e Re”.

“Departamenti i Krimeve të Rënda i Gjykatës së Apelit të Kosovës, pas shqyrtimit të të gjitha shkresave të lëndës dhe vlerësimit të pretendimeve ankimore, ka vendosur që të refuzojë si të pabazuar ankesën e Prokurorisë Themelore në Prishtinë, ndërsa është vërtetuar aktvendimi i Gjykatës Themelore në Prishtinë, i datës 23.08.2021. Me aktvendimin e lartcekur të Gjykatës Themelore në Prishtinë, janë aprovuar kërkesat për hedhje të aktakuzës dhe kundërshtim të provave të paraqitura nga ana e mbrojtësve të të pandehurve dhe ndaj të pandehurve L.A., A.O., Z.R., N.K., B.U. dhe M.B.P., është hedhur aktakuza si dhe është pushuar procedura penale”, thuhet në njoftimin e Apelit të hënën.

Të pandehurit kanë qenë të akuzuar për shkak të veprave penale “keqpërdorimi i pozitës apo autoritetit” dhe “mosekzekutimi i vendimeve gjyqësore”.

Ministri Aliu ka dalë për herë të parë para Gjykatës më 6 prill 2021.

Partia Socialdemokrate e drejtuar nga Dardan Molliqaj ka vazhduar edhe sot me aktivitetin e radhës.

Në sheshin “Skenderbeu”, saktësisht në njërin prej parkingjeve në këtë zonë kanë vendosur disa shkrime të tilla si “Kesco” dh “KEDS”, në veturat e shumta zyrtare në kuadër të Qeverisë Kurti.

Ky aktivitet nga PSD po bëhet pas zhvillimeve të fundit në vend, ku ZRRE ka propozuar shtrenjtimin e faturave të energjisë elektrike për qytetarët.

Lidhur me këtë PSD ditë më parë protestoi në sheshet e kryeqytetit, ku më pas u arrestua edhe vetë Molliqaj.

Kryetari i Kuvendit të Kosovës, Glauk Konjufca, ka paralajmëruar masa ndaj shefit të Grupit Parlamentar të LDK-së, Arben Gashi, për siç tha ai, sharjet dhe mësymjen fizike ndaj shefit të stafit të tij, Ilir Kërçelit, raporton Gazeta Sinjali.

Sipas tij, më e pakta që Gashi mund të bëjë në këtë rast është t’i kërkojë falje Kërçelit për atë që ndodhi në mbledhjen e Kryesisë së Kuvendit.

“Do të shohim masat që do t’i marrim, edhe me masat disiplinore që i kemi në Kuvendin e Republikës së Kosovës dhe me një kërkimfalje që mendoj se është më e pakta që duhet të ndodh në këtë rast”, ka deklaruar Konjurfca.

Konjufca tha se mbledhja e Kryesisë së Kuvendit u ndërpre për shkak të sjelljes së papërshtatshme të deputetit Gashi.

“Mbledhja e sotme e Kryesisë me vendim timin nuk do të mbahet, për shkak të kërcënimeve të shefit të Gruipit Parlamentar të Lidhjes Demokratike të Kosovës, z.Arben Gashi, drejtuar stafit tim. Kjo gjuhë është e papranueshme për Kuvendin e Kosovës, shprehjet të cilat i përmendi z.Gashi në mbledhjen e Kryesisë dhe duke e mësyrë edhe fizikisht shefin e stafit tim janë të papranueshme. Këto sjellje duhet t’i luftojmë dhe të mos i pranojmë në Kuvendin e Kosovës”, tha Konjufca./GazetaSinjali/