Zyra e Presidentit të Kosovës ka bërë të ditur se Zyra e Rregullatorit të Energjisë (ZRRE) ka marrë parasysh pjesërisht komentet E dërguara nga kjo zyrë për tarifat e energjisë elektrike.

“Zyra e Presidentes së Republikës së Kosovës shpreh shqetësimin e saj për faktin se vendimi final i Zyrës së Rregullatorit të Energjisë për tarifat e energjisë elektrike për vitin tarifor 2022 ka marrë parasysh vetëm pjesërisht komentet e dërguara nga ZPRK-ja në Raportin Konsultativ të Zyrës së Rregullatorit për Energji mbi Shqyrtimin e Strukturës Tarifore për Konsumatorët e Rregulluar të Amvisërisë të Shërbyer nën FSHU”, është thënë në njoftim.

Kjo zyrë shpreh shqetësimin se vendimi i ZRRE-së është një vendim kundër shpërndarjes akoma më të drejtë e më të barabartë të barrës së gjithmbarshme të shtrenjtimit të rrymës.

“Edhe pse rritja e tavanit të bllok tarifës nga 600 kWh në 800 kWh paraqet progres ne krahasim me propozimin fillestar, pasi që do të lehtësoj pjesërisht barrën e rritjes së çmimit të energjisë elektrike për qytetarët e Kosovës, hezitimi për të rikthyer 3 bllok tarifa siç ka qenë praktika deri më vitin 2017, është një vendim kundër shpërndarjes akoma më të drejtë e më të barabartë të barrës së gjithmbarshme të shtrenjtimit të rrymës. Për më tepër, një vendim i tillë do të kontribuonte drejtpërdrejt edhe në krijimin e incentivave shtesë për investim në masa të efiçiencës se energjisë, e që përfundimisht do të duhej.Vendimmarrja inkluzive dhe vendosja e konsultimit publik në qendër të politikave rregullatore efektive duhet të jetë gjithnjë parimi i marrjes së vendimeve strategjike të cilat ndikojnë drejtpërdrejt në mirëqenien qytetarëve”, thuhet tutje.

Sipas ZPRK-së, synimi kryesor mbetet respektimi i parimit të përballueshmërisë, qasjes së barabartë, dhe furnizimit të rregullt me energji elektrike.

“Ritheksojmë që për ZPRK, objektiv kryesor mbetet respektimi i parimit të përballueshmërisë, qasjes së barabartë, dhe furnizimit të rregullt me energji elektrike. Nisur nga kjo, i bëjmë thirrje institucioneve relevante të prioritizojnë angazhimin strategjik në këtë drejtim. Përfundimisht, pavarësisht cilitdo skenar final të shqyrtimit të jashtëzakonshëm të tarifave, ZRRE-së i bëjmë thirrje që shqyrtimin e radhës të rregullt të tarifave ta bazoj duke u thirr në strukturën e deritashme tarifore dhe jo në rezultatet e rishikimit të jashtëzakonshëm tarifor”, theksohet në njoftim.

Ndryshe, nga sot do të hyjnë në fuqi tarifat e reja të energjisë elektrike të cilat u miratuan të martën në mbledhjen e Bordit të Zyrës së Rregullatorit të Energjisë (ZRRE).

Bordi i ZRRE-së ka aprovuar dje rritjen e çmimit të rrymës për konsumatorët që tejkalojnë konsumin mbi 800 kilovat.

Këto tarifa do mbesin deri në vitin 2023.

Konsumatorët e tarifës mbi 800 kilovat në orë do të kenë tarifën e lartë prej 12.5 cent për kilovat dhe 5.9 cent për tarifën e ulët.

Për konsumatorët që shpenzojnë deri në 800 kilovat në orë, tarifa e lartë do të jetë 7 cent, ndërsa ajo e ulët, 3 cent.

Nga data 1 tetor deri më 31 mars, në Kosovë aplikohet tarifa e ulët e rrymës, prej orës 22:00 deri në 07:00. Ndërsa, nga data 1 prill deri më 30 shtator, tarifa e ulët vlen nga ora 23:00 deri në 08:00.

Sipas ZRRE-së, bllok-tarifa nuk është diskriminuese pasi “zbatohet njëtrajtësisht për të gjithë konsumatorët”.

Për bizneset nuk do të ketë blloqe tarifore.

Kryetari i AAK-së, Ramush Haradinaj, ka thënë se qeveria ka hapësirë për ta shfuqizuar vendimin e ZRrE-së për rritjen e çmimit të energjisë elektrike.

Haradinaj në seancën e jashtëzakonshme të thirrur nga opozita tha se tani është afër stina e pranverës prandaj edhe do të bie shpenzimi i energjisë.

“Në ditën kur kanë filluar tarifat e reja, edhe pse vendimi është marrë, është detyrë e deputetëve që të diskutojnë. Ekzistojnë praktikat kur vendimet e institucioneve si rasti i ZRRE-së të shfuqizohen vendimet. Unë mendoj se sot ja vlen me ia bë një kërkesë qeverisë që ta shfuqizon vendimin e ZRRE-së për një kohë të caktume sepse jemi duke hyrë në pranverë dhe në dimrin që vjen ta diskutojmë se si do të veprojmë. Besoj se ka hapësirë për një vendim të tillë”, tha Haradinaj.

Haradinaj tha se qeveria Kurti është mashtrim.

“Jo vec për faktin që i ka marrë 50%, por e vërtetë që ne i kemi do të drejta edhe kur i kemi më pak përqind. Qeveria Kurti është mashtrim, nuk pres prej juve me pranu nga deputetët e VV-së.Në vazhdimësi e dëgjojmë duke iu thënë përkrahëse po më shpërthejnë minat e qeverive të kaluara a e dini se cka do të thotë kjo, sikur një komandant që iu thotë ushtarëve të vet po biem në mina që i kanë lënë të tjerët dhe po vdesim të gjithë”, tha ai.

Tutje deputeti i AAK-së pyeti qeverinë nëse janë duke krijuar fonde të zeza për ata që blejnë e shesin energjinë.

“Kryeministri që i ka premtu popullit të vet që po vjen me e nxjerr vendin nga e keqja pse ky njeri po i shkel këto mina dhe po bjen në këtë gabime. Ky e ka ditë kush ka qeverisë me Kosovën qe 20 vjet, dhe ky ia ka bërë analizën gjendjen e energjisë dhe ka deklaruar se duhet të ulet çmimi. 100 milionë para të Kosovës shkuan në subvencion dhe po hymë në pranverë, pse po ngritët çmimi pse ky kryeministër nuk po duron deri në dimrin tjetër. Mos jeni duke kriju fonde të zeza sepse jeni duke i përkrahur ata që importojnë energji dhe që shesin, tregonani kush janë ato kompani, tregonani sepse ne e kemi dëgju prej juve kur ka pasë situata të tilla”, tha ai.