KESCO ka pranuar vendimin e ZRRE-së për tarifat e reja të energjisë që hyjnë në fuqi nga data 9 shkurt deri me 31 mars të vitit të ardhshëm. ZRRE ka prezantuar aplikimin e bllok tarifave për konsumatorët familjarë.

KESCO është e përgatitur për implementimin e këtyre tarifave.

Për konsumin deri në 800  kWh nuk ka rritje. Pra, kjo vlen për të gjithë konsumatorët dhe të gjithë do të vazhdojnë të paguajnë njëjtë për 800 kWh e parë. Bllok tarifa që fillon nga shpenzimi mbi 800 kWh e tutje do të afektojë rreth 22 për qind të konsumatorëve. Pra, për 78 për qind të konsumatorëve nuk do të ketë fare rritje.

Por, konsumatorët duhet të kenë kujdes pas kalimit të pragut ku është vendosur bllok tarifa. Kjo, pasi kilovatët e shpenzuar nga 801 e tutje kanë çmim të ndryshuar, që nxit kursimin e energjisë elektrike.

KESCO njofton që është duke punuar në përditësimin e tarifave në aplikacionin e-KESCO, prandaj disa të dhëna nuk mund të shfaqen për momentin.

Për vendimin e ZRRE-së dhe të dhënat shtesë lidhur me tarifat ju lutem referojuni linkut të mëposhtëm: https://www.ero-ks.org/zrre/sq/eshte-mbajtur-seanca-e-iv-e-bordit-te-zrre

Zëdhënësi i Policisë së Kosovës, Daut Hoxha, ka dhënë detaje për vetaksidentin që ka ndodhur sonte në rrugën nacionale Prishtinë – Pejë, në Bresje.

Për Klankosova.tv, ai ka shtuar se dyshohet se drejtuesi i veturës e kishte humbur kontrollin dhe më pas vetura i kishte goditur mbrojtëset e rrugës.

“Ndihmë mjekësore në QKUK kanë kërkuar dy persona. Njësitë patrulluese policore si dhe hetuesit kujdestar janë duke e trajtuar rastin”, ka thënë Hoxha, njofton Klankosova.tv.

Ministria e Shëndetësisë njoftoi dje se në Kosovë janë regjistruar pesë viktima dhe 1 mijë e 140 raste të reja me koronavirus.

Sipas njoftimit, rastet dolën pas testimit të 6,767 mostrave, që i bie se 16.84 për qind e të testuarve kanë rezultuar pozitivë me sëmundjen COVID-19.

Në 24 orët paraprake 3,624 persona janë shëruar nga koronavirusi.

Raste aktive janë 18,506.

Ndërkaq, sa i përket vaksinimit, autoritetet shëndetësore kanë administruar edhe 1,312 doza të vaksinës kundër koronavirusit.

Deri më tani, në Kosovë me dy doza të vaksinës janë imunizuar 809,228 persona.

Në Kosovë të drejtë vaksinimi kanë të gjithë personat nga mosha 12-vjeçare. Ndërkaq, dozën përforcuese dhe atë të tretë mund ta marrin të gjithë personat nga mosha 18-vjeçare, të cilët para tre muajsh janë imunizuar me dy doza të vaksinës.

I dërguari special i Britanisë së Madhe për Ballkanin Perëndimor, Stuart Peach, gjatë ditës së sotme do të jetë për vizitë zyrtare në Kosovë

Peach do të zhvillojë takime me liderët e vendit, duke filluar paradite me presidenten Vjosa Osmani, nga ora 11:00.

Ndërsa, dikur pasdite, Peach do të zhvillojë takim edhe me kryeministrin Albin Kurti.

Peach gjatë dy ditëve të kaluara qëndroi për vizitë në Beograd, ku u takua me presidentin serb Aleksandar Vuçiq dhe drejtorin e Zyrës për Kosovë, Petrar Petkoviq.
Tema e bisedës ishte situata e përgjithshme në rajon, por edhe dialogu ndërmjet Beogradit dhe Prishtinës.

Vizita e tij në Beograd pasoi menjëherë pas vizitës së të dërguarve specialë të BE-së dhe SHBA-së, Miroslav Lajçak dhe Gabriel Escobar.

Kjo do të jetë vizita e tij e parë zyrtare në vendin tonë si i dërguar në Ballkanin Perëndimor, që nga marrja e detyrës në fund të vitit të kaluar.

Orëve të mëngjesit ngrica dhe mundësi për mjegull. Në fundjavë kryesisht me vransira, të shtunën më ftohtë.

9.02.2022 – Mot më stabil do të dominoj në ditët vijuese mbi vendin tonë. Do të ketë më shumë kthjellime e diell, derisa edhe temperaturat gjatë ditës do të jenë pothuajse pranverore. Orëve të mëngjesit edhe do të ketë ngrica, e përgjatë ultësirave me mundësi edhe për mjegull apo mjegullinë.
Nga fundjava do të ketë shtim të vransirave, me pak gjasa për reshje të dobëta bore përreth viseve malore ditën e shtunë, kur edhe pritet një rënie e temperaturave përreth vlerave mesatare.
Java e tretë e shkurtit fillon me mot të butë dhe pjesërisht të vranët, me mundësi për riga lokale shiu apo bore në vise malore.
Paraqitja e inverzionit të temperaturës dhe qarkullimi jo i mjaftueshëm ajror mbanë ndotësit ajror të rritur pranë sipërfaqes, e cilësia e ajrit fillon të përkeqësohet, ku indeksi mund të kaloj në vlera edhe shumë të dobëta, por edhe jashtëzakonisht të dobëta vende-vende.

10.02 – Mot i ngrohtë e kryesisht me diell. Në mëngjes ngrica, e përgjatë ultësirave me mundësi për mjegull/mjegullinë.
11.02 – Pas mëngjesit me ngrica, e ultësirave me mjegull/mjegullinë, ditën do të mbajë mot i ngrohtë, me kthjellime e diell.
12.02 – Më ftohtë, e kryesisht me vransira. Ditën edhe intervale të shkurta me diell. Përreth viseve malore mundësi për reshje të dobëta bore
13.02 – Kryesisht me vransira, e ditën edhe intervale me diell.
14.02 – Pjesërisht vranët dhe me intervale më të gjata me diell gjatë ditës.

Temperaturat në rritje ditëve të ardhshme, e në fundjavë në rënie. Minimalet luhaten nga -3C deri 1C, e maksimalet kapin vlerat deri në 12C e 14C të premten, e të shtunën zbresin në 5C, e deri të hënën sërish në rritje në 9C.
Erërat frynë lehtë nga juglindja 1-4m/s, e ditën e shtunë ndryshojnë drejtimin nga verilindja dhe frynë edhe mesatare 3-7m/s.
Shtypja atmosferike mbetet lartë mbi vlera normale, megjithë një tendencë të rënies ditën e premte.