Kryeprokurori i shtetit, Aleksandër Lumezi, ka numëruar sukseset e këtij Institucioni në konferencën vjetore të prokurorëve.

Ai tha se gjatë vitit të kaluar është bërë një shumë e madhe, duke përmendur aksionet e mëdha që janë bërë, nga të cilat janë arrestuar shumë zyrtarë.

“Gjatë vitit të kaluar kemi pasur shumë sfida, por kemi treguar se jemi të gatshëm dhe në gjendje të reagojmë në mënyrë adekuate në të gjitha situatat. Nuk ka dilema se në periudhën e kaluar është bërë një punë mjaft e madhe që vërtetohet nga rezultatet konkrete. Gjatë vitit të kaluar kemi treguar efikasitet me mbi 50 mijë lëndë penale të natyrave të ndryshme. 793 raste të ndryshme të korrupsionit, të keqpërdorimit të detyrës zyrtare. Janë arrestuar ish ministra të Qeverisë, sekretar ë të ministrave, zyrtarë policorë, kryetarë të komunave dhe shumë zyrtarë të tjerë të lartë shtetërorë”.

“Para disa viteve as nuk është imagjinuar, e lërë më të ndodhë ndjekja penale ndaj zyrtarëve të lartë shtetërorë, kjo është bërë realitet i përditshëm. Gjatë vitit të kaluar, janë ndërmarr masa me zbardhjen e veprave më të rënda penale, janë privuar nga liria shumë pjesëtarë të ndryshme të grupeve kriminale.

Aksioni Subvencioni, aksioni për konfiskimin e 400 kilogramëve kokainë, rasti Call Center, rasti Brezovica dhe të tjera. Kemi vërtetuar se puna e përbashkët ekipore ka dërguar porosi të qarta të të gjithë pjesëtarëve të grupeve kriminale se s’mund të vihen mbi Institucionet e Shtetit”.

Sindikata e Infermierëve të Kosovës ka thënë se sipas një liste të pakonfirmuar që po qarkullon, infermierët janë ranguar me një koeficient shumë të ulët në Ligjin e Pagave.

Për këtë çështje, infermierët po paralajmërojnë edhe veprime sindikaliste, njofton Klan Kosova.

“Gjatë ditë së djeshme në media ka qarkulluar një shtojcë me koeficiente të pagave, e pakonfirmuar, ku komunitetet e infermierëve, mamive dhe profesionistëve shëndetësorë janë ranguar me koeficiente tepër të ulët në krahasim me kategoritë tjera, me ç’rast komunitetet tona janë tronditur nga ky diskriminim i skajshëm”.

Sindikata thotë është pikërisht ky lloj diskriminimi për shkak të të cilit është shfuqizuar ligji i kaluar nga Gjykata Kushtetuese.

“Bazuar në këtë shtojcë mjekët janë të ranguar me koeficient 10.1. Psikologët klinikë 7, logopedët, teknikët e radiologjisë, fizioterapeutët dhe mjekësi sanitare 6, kurse infermierët me koeficient 4.7, 4.6, 3.8 dhe 3.7”.

“Duke mos e ditur vlerën e një koeficienti, sipas kësaj shtojce, mirëpo duke i njohur pagat aktuale me vlerën aktuale të koeficientit për kategoritë e lartpërmendura shihet haptazi diskriminimi, anashkalimi dhe injorimi total i kërkesave të infermierëve. Rritja e pagës për disa kategori deri në 100% , ndërsa për infermierë vetëm deri rreth 15% është në mënyre absolute e papranueshme dhe e konsiderojmë zhvlerësim të profesionit në përgjithësi”.

Sindikata e Infermierëve të Kosovës thotë se duke filluar nga dita e hënë do të mbledhë strukturat e saj dhe do të zhvillojë takime bashkërenduese me të gjitha shoqatat e infermierëve dhe profesionistëve tjerë shëndetësorë për koordinimin e aktiviteteve dhe masave sindikale, të cilat do i ndërmarrim në kundërshtim të këtyre koeficientëve.

Sindikata e Infermierëve të Kosovës shton se do të konsultojë organet e saj drejtuese, shoqata dhe institucionet tjera përfaqësuese dhe secilin infermier, mami dhe profesionist tjerë shëndetësor për organizimin e një marshi protestues ku do ftohen të gjithë infermierët, mamitë dhe profesionistët tjerë shëndetësorë nga e gjithë Kosova, duke vazhduar me protesta ditore, deri në greva dhe bllokim total të sistemit shëndetësor.

“Sindikata e Infermierëve të Kosovës bazuar në këtë shtojcë kërkon koeficientin 7 për të gjithë infermierët, mamitë dhe profesionistë tjerë shëndetësor pa dallim, ndërsa opsionet tjera nuk do pranohen në asnjë mënyrë”.

Kosova sot pranon një donacion prej mbi 500 mijë vaksina Pfizer nga Shtetet e Bashkuara të Amerikës.

Kështu ka bërë të ditur këshilltari i ministrit të Shëndetësisë, Drin Podrimçaku.

“Sot, Kosova pranon kontingjentin prej 515,970 doza të Pfizer, të premtuara nga Presidenti Biden përmes mekanizmit COVAX. Përherë mirënjohës ndaj miqve tanë, Shteteve të Bashkuara të Amerikës!

Vaksinat janë mjeti ynë më i mirë për të shpëtuar jetë, për të mbrojtur ekonominë dhe mënyra jonë më e mirë për t’u kthyer te njerëzit, vendet dhe gjërat që duam. Për punonjësit e kujdesit shëndetësor dhe të tjerët në vijën e parë të përballjes me pandeminë që janë vaksinuar: Faleminderit. Le të ndjekim të gjithë shembullin e tyre”, shkruan ai në Facebook.

Ndërkaq, nga Ministria e Shëndetësisë kanë bërë të ditur se sot do të mbahet ceremonia e pranimit të këtyre dozave.

“Në Institutin Kombëtar të Shëndetësisë Publike të Kosovës do të mbahet sot ceremonia e pranimit të 515, 970 dozave të vaksinës Pfizer, të siguruara nga Presidenti i SHBA, Joe Biden për popullin e Kosovës, të cilët në vendin tonë kanë arritur përmes mekanizmit COVAX”, thuhet në njoftim.

Po ashtu, në ceremoninë  pranimit zyrtar të këtij donacioni nga SHBA-të për Kosovën do të marrin pjesë Presidentja e Republikës së Kosovës, Vjosa Osmani, Kryeministri Albin Kurti, Ambasadori i SHBA në Kosovë, Jeffrey M. Hovenier , shefja e UNKT, Ulrika Richardson dhe Ministri i Shëndetësisë, Rifat Latifi. /Telegrafi/

Ushqimet, që zënë gjysmën e shpenzimeve në buxhetet familjare, udhëhoqën rritjen e çmimeve, duke u rritur me 7.2%, krahasuar me janarin e kaluar.

Familjet shqiptare po përballen me një rritje të mëtejshme të çmimeve në treg edhe këtë fillimvit. Instituti i Statistikave raporton se gjatë muajit janar, inflacioni qëndroi në nivelin 3.7%, rekord për dekadën.

Ushqimet, që zënë gjysmën e shpenzimeve në buxhetet familjare, udhëhoqën rritjen e çmimeve, duke u rritur me 7.2%, krahasuar me janarin e kaluar. Sipas tregtarëve, krahas mallrave që vijnë nga importi, rritje ka edhe për produktet vendase.

Një familjeje i nevojiten mesatarisht 500 euro e më shumë në muaj për të përballuar rritjen e çmimeve. Shtrenjtimi është më i ndjeshëm te familjet me më pak të ardhura, që shpenzojnë më shumë për ushqime. Në këto kushte, qytetarët shprehen se jetesa po bëhet e papërballueshme.

Perimet, frutat, vajrat, mielli dhe buka janë produktet ushqimore me rritjen më të fortë. Ndërsa muajt e fundit, ky shtrenjtim po transferohet edhe te mishi, qumështi dhe nënproduktet. Paralelisht, shtrenjtimi i standardit të jetesës po ndihet edhe te karburantet dhe shërbimet.

Rritja e çmimeve pritet të vijojë deri në qershor. Është ky vlerësimi që bëhet në raportin e fundit të Politikës Monetare.

Në analizën e institucionit mbikëqyrës bankar, në rritjen e deritanishme të inflacionit ka ndikuar kryesisht shtrenjtimi i produkteve ushqimore dhe karburantet. Të dhënat tregojnë se në dy muajt e fundit, inflacioni shënoi 3.7%, niveli më i lartë në një dekadë.

Parashikohet që inflacioni të fillojë të normalizohet në gjysmën e dytë të këtij viti dhe të zbresë pranë objektivit të saj prej 3% vitin e ardhshëm. Megjithatë, kjo do të varet edhe nga ecuria e tregjeve

Në Kosovë ende vazhdon të jetë i lartë numri i rasteve aktive me COVID-19.

Ministria e Shëndetësisë ka njoftuar të enjten se janë shënuar edhe 717 raste të reja me koronavirus.

Aktualisht në vend janë 16 mijë e 849 raste aktive me COVID-19.

Më së shumti raste aktive janë në Komunën e Prishtinës me 3 mijë  e 888 raste, e pasuar nga Peja me 1 mijë e 17 raste,  Gjilani me 1 mijë e 48 raste, Prizreni me 1 mijë e 40, Ferizaj me 993 raste, Fushë Kosova me 808 raste, Lipjani me 803 raste e po ashtu edhe komunat tjera me qindra raste me Covid 19.

Ndërkaq MSH-ja ka bërë tw ditur se përgjatë 24 orëve, si pasojë e infektimit me COVID-19 kanë vdekur katër persona.