Forcës së Sigurisë së Kosovës (FSK) i kanë ikur 50 pjesëtarë nga puna në vitin 2021.

Ndërkaq si shkak i presioneve të vazhdueshme nga Serbia, ka vazhduar edhe këtë vit braktisja e vendit të punës nga pjesëtarët e komunitetit serb.

Nga ky komunitet, vendin e punës e lanë 3 pjesëtarë të FSK-së.

Kështu kanë bërë të ditur për Front Online nga Ministra e Mbrojtjes.

“Gjatë viti 2021 e kanë lëshuar (janë demobilizuar) FSK-në 50 pjesëtarë. Kurse nga radhët e komunitetit serb 3 pjesëtarë e kanë lëshuar (janë demobilizuar) FSK-në. Këta persona për arsyet nga më të ndryshmet, sipas procedurave në fuqi kanë shkëputur kontratën e shërbimit me FSK-në. Kjo dukuri nuk bënë përjashtim as për ushtarët e komunitetit serb, por te kjo kategori duhet të theksojmë presionin e vazhdueshëm nga Serbia që pjesëtarët e këtij komuniteti të lëshojnë FSK-në”, kanë thënë nga Ministria e Mbrojtjes.

Nga kjo ministri kanë bërë të ditur se lëvizja të tilla ka pasur çdoherë ngase shërbimi në FSK është vullnetar dhe profesional.

Megjithatë, ata thonë se numri i pjesëtarëve të FSK-së është duke u rritur nga viti në vit me anë të rekrutimeve të rregullta vjetore.

“Shërbimi në FSK është profesional dhe vullnetar. Në kuadër të këtij raporti ka çdo herë lëvizje të numrit të personelit. Fakti kryesor është se në bazë të Planit gjithëpërfshirës të tranzicionit të FSK-së përmes rekrutimeve të rregullta vjetore është duke u rritur numri i pjesëtarëve të FSK-së, që çon drejtë plotësimit të kuotave të planifikuara dhe të përcaktuara me Ligjin për FSK-në”, kanë thënë nga Ministria e Mbrojtjes.

Ish-ministri i Punëve të Brendshme, Agim Veliu, e ka quajtur lajm të mirë njohjen e patentë shoferëve të Kosovës nga Gjermania.

Veliu ka thënë se në kohën derisa ishte ministër i Punwve tw Brendshme ka punuar shumë që ky proces të finalizohet.

Ai përmes një postimi në Facebook, ka falënderuar Qeverinë e Gjermanisë, ish kancelaren Merkel dhe Kancelarin Scholz për këtë angazhim dhe përmbyllje të kësaj marrëveshjeje.

“Një falënderim i veçantë shkon edhe për homologun tim Ministrin e Brendshëm Seehofer dhe atë të Transportit Scheuer”, ka shkruar Veliu.

Postimi i plotë i Veliut:

“Të dashur qytetarë,

Dua t’ju përgëzoj për njohjen e patent shoferëve nga Gjermania. Ky lajm është i rëndësishëm për të gjithë neve dhe nuk kam asnjë dyshim që nga sot, afria e Kosovës dhe e Gjermanisë shënon një hap të ri në marrëdhëniet tona.

Dua me këtë rast të falenderoj Qeverinë e Gjermanisë, Kancelaren Merkel dhe Kancelarin Scholz për këtë angazhim dhe përmbyllje të kësaj marrëveshjeje. Një falenderim i veçantë shkon edhe për homologun tim Ministrin e Brendshëm Seehofer dhe atë të Transportit Scheuer. Nuk kam këtu si të mos falenderoj sidomos Drejtorin e Marrëdhënieve Ndërkombëtare të Ministrisë së Transprortit në Gjermani, Z. Guido Zielke me të cilin kam bashkëpunuar ngushtë të përmbushim sugjerimet për të përmbyllur këtë proces. Falenderoj edhe Ambasadorin Beqë Cufaj dhe Drejtorin e ARC Bekim Hoxha.

Kosova nga sot është edhe më afër Gjermanisë. Danke!”, ka shkruar Veliu.

Ambasada e Kosovës në Gjermani ka njoftuar se Bundesrati sapo votoi me shumicë votash pro nënshkrimit të marrëveshjes së njohjes së patentë shoferëve të Republikës së Kosovës.

Kryetari i Aleancës për Ardhmërinë e Kosovës, Ramush Haradinaj ka reaguar edhe një herë pas vendimit të Zyrës së Rregullatorit të Energjisë – ZRrE, për bllok tarifat e reja, ku nga data 9 shkurt, qytetarët të cilët do të shpenzojnë më shumë se 800kWh në muaj, do të paguajnë faturat e energjisë elektrike me çmim më të lartë.

Haradinaj ka pyetur se si do të bëhet llogaritja e faturave të KESCO, kur nga data 9 shkurt asnjë vizitë nuk është bërë nga ekipet e tyre.

Kreu i AAK-së thotë se Avokati i Popullit duhet të vihet në funksion pas vendimit të ZRRE-së.

“Si do të bëhet llogaritja e faturave të KESCO nga data 9 shkurt, kur asnjë vizitë nuk është bërë me datën 8 shkurt nga ekipet e tyre (e kam fjalën për njehsorët që nuk mund të lexohen nga distanca). ZRRE për 800 kilovatët nuk specifikon se sa do të mirren nga tarifa e ulët e sa nga tarifa e lartë. Nëse vërtetë ekziston Avokati i Popullit në funksion të popullit, do të duhej të vihej në funksion menjëherë për këtë vendim arbitrar në dëm të qytetarëve e pa kurrfarë baze ligjore”, ka thënë ai.

Partia Socialdemokrate ka dalë me një njoftim për media pas takimit me partitë opozitare në Kosovë.

Nga PSD-ja është konfirmuar se me partitë opozitare dhe me përfaqësuesit e sindikatave kanë rënë dakord që vendimi Zyrës së Rregullatorit të Energjisë për rritjen e tarifës për qytetarët që shpenzojnë 800 kWh është i papranueshëm.

Nga kjo parti treguan edhe për disa nga çështjet me të cilat janë dakorduar me partitë opozitare.

“Në takim u dakorduam si në vijim: Të kërkohet nga partitë opozitare parlamentare që ta bëjnë betejën ligjore dhe ta dërgojnë vendimin deri tek instanca e Gjykatës Kushtetuese.Propozimi i ZRrE-së, përkatësisht propozimet e VV-së, për rritje të çmimit të energjisë ishte 26 faqe, ndërsa vendimi për rritje vetëm tre paragrafë. Kjo është e çudishtme dhe e papranueshme. Kërkojmë që vendimi të publikohet menjëherë. Deri të shtunën pasdite (12 shkurt) të shpallën hapat e ardhshëm. Organizimi përmes aksionit opozitar, që ka në qendër ndërthurjen e problemeve të shumta është rruga përpara. Zgjidhja është e përbashkët”, thuhet në njoftim.

Këto qëndrime i paraqiti edhe kryetari i kësaj partie, Dardan Molliqaj përmes një konference për media.

Njoftimi i plotë:

Nga takimi i përbashkët me disa nga partitë opozitare dhe përfaqësues të sindikatave u konfirmua që vendimi i ZRrE-së është i papranueshëm. Kundërshtimi i tij i domosdoshëm.

Vendi ynë po përballet me problem sociale prej më të ndryshmeve, siç është rritja e çmimeve të shportës ushqimore, paga minimale tejet e vogël dhe problemet me koeficent që duket t’i ketë drafti i ri i ligjit për paga. Shto rritjen 100% të çmimit të energjisë, jeta bëhet e papërballueshme. Kjo e shpjegon edhe faktin shqetësues të ikjes nga Kosova në kërkim të një jete më të mirë.

Në takim u dakorduam si në vijim:

– Të kërkohet nga partitë opozitare parlamentare që ta bëjnë betejën ligjore dhe ta dërgojnë vendimin deri tek instanca e Gjykatës Kushtetuese.

– Propozimi i ZRrE-së, përkatësisht propozimet e VV-së, për rritje të çmimit të energjisë ishte 26 faqe, ndërsa vendimi për rritje vetëm tre paragrafë. Kjo është e çudishtme dhe e papranueshme. Kërkojmë që vendimi të publikohet menjëherë.

– Deri të shtunën pasdite (12 shkurt) të shpallën hapat e ardhshëm.

Organizimi përmes aksionit opozitar, që ka në qendër ndërthurjen e problemeve të shumta është rruga përpara. Zgjidhja është e përbashkët.

Ideatori i monumentit NEWBORN, Fisnik Ismaili, ka dhënë një informacion se si do të duket ky monument në përvjetorin e 14-të të pavarësisë së Kosovës.

Ai njoftoi se në këtë 17 shkurt, NEWBORN do t’i dedikohet fuqisë së vajzave.

“NEWBORN14 është për fuqinë e vajzave”, ka shkruar shkurt në Facebook Ismaili duke mos dhënë detaje tjera.

Kujtojmë që në vitet e fundit, flamurin e Kosovës lart e kanë ngrit shpesh vajzat tona. Distria Krasniqi e Nora Gjakova i kanë sjellë dy medalje të arta Kosovës.

Përveç në xhudo, vajzat kosovare korrën sukses edhe në botën e filmit. Aktorja Yllka Gashi dhe regjisorja Blerta Basholli arritën që me filmin “Zgjoi” t’i afrohen nominimit në Oscar, ndërsa morën disa shpërblime të vlerësuara në botën e filmit.

E të padiskutueshmet, Rita Ora e Dua Lipa nuk e kanë ndalur vazhdën e sukseseve.

Ylli më i ri kosovar, është Kiana Kryeziu, e cila u bë skitarja e parë që përfaqësoi Kosovën në Lojërat Olimpike Dimërore.

Kryeministri i Shqipërisë, Edi Rama, ka uruar shqiptarët për njohjen e lejeve shqiptare të drejtimit në Gjermani.

Kreu i qeverisë shqiptare thotë se ky lajm i mirë vjen pasi vendimi është kaluar fillimisht në parlamentin e çdo landi.

Tutje, Rama, thotë se ky është një konfirmim kuptimplotë i transformimit rrënjësor të këtij sektori në Shqipëri.

“Lajm i mirë! Më në fund, pas kalimit në parlamentin e çdo landi, Bundesrati gjerman votoi njohjen e lejeve shqiptare të drejtimit, një konfirmim kuptimplotë i transformimit rrënjësor të sektorit, nga rrumpalla totale e 8 vjetëve më parë, në një sistem me standarde europiane të certifikuara de facto nga misionet e inspektimit të qeverisë gjermane”, ka shkruar Rama.