Ekspertët e arsimit thonë se për shkak të pandemisë, në një të ardhme të afërt, do të kemi rritje të numrit të analfabetëve funksionalë, që janë persona që dinë të shkruajnë, e të lexojnë, por nuk janë në gjendje të kuptojnë e analizojnë.

“Administrata jonë dhe institucionet kanë shumë analfabetë funksionalë, të cilët në vend të kuptojnë dhe zgjidhin problemet tona, ngatërrohen në to dhe nuk japin rezultatet që ti pret. Problemi qëndron që tek shkolla. Ne po shohim përherë ë më shumë nxënës që veprojnë mekanikisht, nuk kanë një mendim, ide, apo qëndrim kritik. Ekspertët tanë të arsimit thonë se për shkak të pandemisë, ka një rënie të cilësisë dhe nivelit arsimor, në 30-40 %. Ky duhet të jetë një alarm. Pasojat do ia ndjejmë shumë shpejt. Duhet një strategji kombëtare, për ta frenuar qe në banka të shkollës, se po shkoi puna në universitet, nuk mbetet shumë për të bërë”, tha Agim Baçi./T Ch/

Tashmë dihet se Kosova është vendi i vetëm në territorin e Evropës që nuk është anëtare e sistemit të “Kartonit të Gjelbër”.

Duke mos qenë pjesë e “Kartonit të Gjelbër”, sigurimi i veturave në Kosovë nuk vlen për vendet e tjera, si dhe veturat që hyjnë në Kosovë duhet të paguajnë sigurim shtesë, edhe nëse kanë apo jo “Karton të Gjelbër”.

Kjo ka prekur për vite me radhë më së shumti mërgimtarët kosovarë që nuk janë të paktë për nga ardhjet e tyre përmes vijave kufitare me automjete.

Qeveria e Kosovës ka disa vjet që bën plane për të futur në agjendën e saj një zgjidhje për këtë, por kjo nuk ndodhi deri më sot.

Me qëllim të lehtësimit të pritjeve në kufi për diasporën dhe si masë për të motivuar ardhjen e diasporës, institucionet e Kosovës, në krye me kryeministrin Kurti, morën përsipër që të paguajnë policat e sigurimit për pjesëtarët e diasporës dhe të gjithë ata që hyjnë me automjete të huaja përmes rrugëve tokësore në Kosovë.

Të shumta ishin reagimet, pro dhe kundër.

Shumë mërgimtarë vlerësuan këtë vendim si të drejtë dhe motivues për ardhjet e tyre në vendlindje, por kishte edhe kundër këtij vendimi, pasi sipas tyre, nuk kishte ndonjë peshë të madhe për mërgimtarët pagesa e një “Kartoni të Gjelber”.

Pro

Mërgimtari nga Gjermania, Urim Avdyli, tha se pagesa e policave të sigurimit është pozitive dhe përherë të parë nga Qeveria është marrë një vendim në të mirën e diasporës.

“Është pozitive dhe motivuese për ne si mërgimtarë. Ndoshta nuk është gjë e madhe, por ky vendim mua personalisht më ka bërë të ndihem mirë dhe i vlerësuar nga vendi im. Unë vij 2-3 herë në vit në Kosovë dhe vendimi për “Karton të Gjelbër” është motivues për mua, ani pse kam mundësi të paguaj atë”, tregon Urimi për albinfo.ch.

Edhe mërgimtari Eduart Haliti e përgëzon Qeverinë lidhur me vendimin për pagesa, duke u shprehur se ndihet krenar që për herë të parë Qeveria Kurti u kujtua për të mirën e diasporës.

“Unë jam i kënaqur me vendimin e Qeverisë Kurti, sepse për herë të parë ajo u kujtua për mërgimtarët. Kjo është një ndihmesë për ne, edhe pse ne si mërgimtarë besoj që e shpaguajmë 100 herë këtë të mirë në forma të tjera në vendlindje”, tha ai.

Në fakt, para pak javësh Qeveria e Kosovës u ka vazhduar mërgimtarëve deri më 31 dhjetor të 2022-ës mbulimin e policave kufitare.

Lidhur me këtë, ministri i Financave, Hekuran Murati, tha se ky vendim i takon pakos së ringjalljes ekonomike dhe duhet të vazhdohet, meqë është vit i ri fiskal.

“Ky mbulim pritet të ndodhë deri në gjetjen e një zgjidhjeje përfundimtare për këtë çështje dhe deri atëherë nuk kemi një propozim të ri”.

Kundër

E lidhur me këtë çështje, ka edhe mendime kundër vendimit të policës së sigurimit.

Hektor Lata nga Zvicra nuk e sheh si zgjidhje të mirë vendimin që Qeveria e Kosovës të paguajë policat e sigurimit, pasiqë sipas tij, kjo do të jetë në dëm të buxhetit të Kosovës.

“Nuk është zgjidhja më e mirë, sepse ndikon direkt në buxhetin e shtetit të Kosovës. E vlerësoj qëllimin e mirë, por duhet kërkuar një zgjidhje që nuk i dëmton direkt të ardhurat e shtetit”, tha ai.

Njëjtë mendon edhe mërgimtari nga Franca, Naim Salihu, sipas të cilit, çdo mërgimtar ka mundësi të paguajë një “Karton të Gjelbër” në kufi.

“Nuk mendoj se është vendim më i mirë, sepse të gjithë mërgimtarët besoj që kemi aq të holla sa për ta paguar një shumë të caktuar në kufijtë e Kosovës. Pavarësisht se ky vendim është qëllimmirë dhe duhet duartrokitur, kur e di se nuk i bëjmë mirë shtetit, nuk kam si të mendoj ndryshe”, shprehet ai.

Lidhur me shpenzimet, Albinfo.ch ka hulumtuar të hyrat dhe shpenzimet nga policat kufitare, sipas së cilës nga viti 2002 deri në vitin 2020 të hyrat e kompanive të sigurimeve nga policat kufitare sillen mesatarisht nëntë milionë euro në vit.

“Të hyrat nga policat kufitare përbëjnë në mesatare rreth 8% të të hyrave vjetore të kompanive të sigurimeve. Që nga viti 2002 kompanitë e sigurimeve shesin mesatarisht 260 mijë polica kufitare në vit. Ndërkohë në një vit ky numër ka shkuar deri në mbi 480 mijë polica kufitare të shitura, apo më shumë se sa vetura të regjistruara brenda vendit”, thuhet në raportin e GAP-it, bazuar në seritë kohore të BQK-së dhe të dhënat e BKS-së për muajin gusht 2021. /Albinfo.ch

Në ditët e fundit në Kosovë ka pasur një rënie të lehtë të rasteve me coronavirus, krahasuar me muajin janar të 2022-së, ku shifrat e të infektuarve brenda 24 orëve kanë shkuar edhe mbi katër mijë.

Infektologu Hamdi Ramadani në një deklaratë për Telegrafin, ka thënë se vala e COVID-19, u arrit të ndalet në shkurt pasi në janar kishte numër të madh të personave që e kaluan virusin.

Gjithashtu, Ramadani thotë se edhe masat kufizuese kanë ndikuar që të ketë rënie të rasteve.

“Një rënie e ndjeshme e të sëmurëve me COVID-19 është evidente dhe mendoj që kjo është një gjë e mirë, kjo ka ndodhë për shkak të dy arsyeve. Për shkak se në janar ishte një numër i madh i qytetarëve që u infektuan me coronavirus, dhe shumica e tyre kanë manifestu simptoma ta quajmë të vogla, të cilat mendoj se nuk janë regjistruar në protokolle, pasi sëmundjen e kanë kaluar më lehtë në shtëpi. E dyta është numri i madh i qytetarëve që janë shëruar nga coronavirusi, ata kanë imunitet të mirë për disa muaj, këtu duhet shtuar edhe masat që janë marrë, të cilat janë ende në fuqi ku përfshihet ora policore, mendoj se ka kanë ndikuar që të shtypet vala e coronavirusit”, ka pohuar ai.

Ramadani theksoi se kjo situatë do të vazhdojë edhe për disa javë, ndërsa shtoi se mbetet për tu parë nëse do të ketë valë të re të virusit pas pesë muajsh.

“Kjo situatë do të vazhdojë edhe për disa javë e muaj dhe vendi do të jetë në një situatë me të qëndrueshme, dhe të shohim diku pas 5 muajve a do të na shfaqet edhe një variant i ri i COVID-19, dhe të shohim a do të kemi një përsëritje apo valë të re të coronavirusit, por tash për tash situata ka filluar të normalizohet. Mendoj që edhe masat që tash janë në fuqi, e kanë arrit efektin dhe mendoj që organet përkatëse do ta analizojnë dhe do t’i heqin”, potencoi ai.

Ramadani mes tjerash tha se tani u mbetet qytetarëve që të vaksinohen kundër coronavirusit dhe të marrin edhe dozën e tretë, po ashtu ai tha se tani duhet të fillojë vaksinimi edhe i fëmijëve mbi moshën 5 vjeç.

“Ata që e marrin dozën e tretë mbrohen nga të gjitha variantet e coronavirusit. Mendoj që edhe në Kosovë mosha nga 5 vjeç të fillojë vaksinimi, ky vit do të jetë fillimi i fundit të pandemisë, por nuk do të zhduket coronavirus, dhe ai mund të paraqet efektet e tij një herë ose dy në vit”, theksoi Ramadani.

Ndryshe, prej fillimit të vaksinimit në Kosovë janë dhënë 1.8 milionë vaksina, rreth 63 për qind e popullatës tonë e moshës mbi 12 vjeçare kanë marrë nga një dozë të vaksinës kundër COVID-19 dhe 57 për qind të dy dozat.

Në total numri i rasteve aktive është 16.028. Prishtina prin me numrin me të madh të rasteve aktive, gjithsej 3,484 raste. Pastaj, Peja me 1,153 raste aktive. Gjilan, 1,064 raste aktive, komunat tjera kanë numër më të vogël të rasteve aktive./FrontOnline