Ministri i Mbrojtjes, Armend Mehaj, është takuar sot priti sot në takim Komandantin e Gardës Kombëtare të Iowa-s, gjeneralmajor Ben Corell, të shoqëruar edhe nga Ambasadori Amerikan në Kosovë, Jeffrey M. Hovenier.

Me këtë rast, ai falënderoi Gjeneralin Corell dhe Ambasadorin Hovenier dhe u shprehu mirënjohjen e lartë për partneritetin ndërmjet FSK-së dhe Gardës Kombëtare të Iowa-s, si dhe bashkëpunimin, tani në vitin e 11-të, të shkëlqyeshëm bilateral.

Ndër të tjera, Mehaj rikujtoi disa prej sukseseve të përbashkëta, duke u fokusuar në misionin e parë paqeruajtës në Kuvajt, Stërvitjen ” Defender-Europe ’21”, përgatitjet për “Defender-Europe’23”, si dhe misionet tjera paqeruajtëse të radhës në bashkë-zbarkim me trupat amerikane.

Njëkohësisht, ai rikujtoi se këto të arritura janë falë mbështetjes së pakursyer dhe të pazëvendësueshme të SHBA-së si shtet mik, Departamentin Amerikan të Mbrojtjes, përmes Gardës Kombëtare, në funksion të avancimit të aftësive dhe kapaciteteve operacionale dhe profesionale të FSK-së përgjatë dhjetë viteve, e duke besuar fuqishëm se bashkëpunimi në të ardhmen do të thellohet akoma më shumë.

Nga ana e tij, Gjenerali Corell, vlerësoi shumë lartë bashkëpunimin e deritanishëm ndërmjet FSK-së dhe Gardës Kombëtare të Iowa-s, si dhe konfirmoi përkrahjen e plotë, për aktivitetet e tjera të përbashkëta me FSK-në, të cilat tashmë po dëshmojnë nivel të lartë të profesionalizmit, prandaj vlerësoi se mbeten të përkushtuar që bashkëpunimi dhe partneriteti të vazhdojë edhe në të ardhmen.

Nga ana e tij, Ambasadori Hovenier, theksoi se do të vazhdojë angazhimin e tij për mbështetjen e FSK-në në rritjen e aftësive dhe kapaciteteve profesionale dhe operacionale, e sidomos theksoi rëndësinë e aspekteve të ndërveprimit ndërmjet Ushtrisë Amerikane dhe FSK-së për operacione në misionet paqeruajtëse dhe të stabilitetit.

Presidentja e Kosovës, Vjosa Osmani, ka ndarë urimin e Presidentit të Shteteve të Bashkuara të Amerikës, Joe Biden, për ditën pavarësisë së Kosovës, ku është theksuar mbështetja e SHBA-së si partner i palëkundur i Kosovës.

Në letrën e bërë publike nga Osmani, Bideni ka thënë se Kosova ka bërë përparim të jashtëzakonshëm gjatë 14 vjetëve të pavarësisë së saj.

Ai madje ritheksoi mbështetjen e SHBA-së në përpjekjet e vendit për një marrëveshje gjithëpërfshirëse të normalizimit me Serbinë, të përqendruar në njohjen reciproke.

“Jemi të kënaqur që Kosova po vazhdon të ndërtojë dhe të forcojë marrëdhëniet e saj pozitive me vendet fqinje dhe do të vazhdojmë të mbështesim përpjekjet tuaja drejt një marrëveshjeje gjithëpërfshirëse të normalizimit me Serbinë, të përqendruar në njohjen reciproke”.

Presidentja Vjosa Osmani ka pritur sot në takim ambasadorin e Gjermanisë, Jörn Rohde.

Rohde ia ka dorëzuar Osmanit telegramin e urimit të presidentit gjerman, Frank-Walter Steinmeier, për 14-vjetorin e Pavarësisë së Kosovës.

E para e shtetit ka falënderuar ambasadorin gjerman për mbështetjen e vazhdueshme të shtetit gjerman ndaj Kosovës.

Në takim është biseduar për situatën e përgjithshme në vend dhe rajon, derisa palët diskutuan edhe për punën e institucioneve të Kosovës, veçanërisht në fushën e sundimit të ligjit.

Ambasadori gjerman ka vlerësuar përparimin e dukshëm në luftën kundër korrupsionit, derisa në takim u tha se me parametra të tillë, të cilët ndihmojnë në forcimin e rendit dhe të ligjit, krijohen kushte për investitorë të jashtëm.

Është arrestuar me 50 kilogramë marihuanë në Mal të Zi, ish-sekretari i Ministrisë së Tregëtisë dhe Industrisë së Kosovës, Burim Reci, njofton gazeta malazeze “Vijesti”.

Reci është arrestuar në mëngjesin e të martës, në terminalin e daljes. Ai është arrestuar rreth orës 3:30.

Më herët sot, nga Drejtoria e Doganës në Mal të Zi u njoftua se zyrtarët gjatë kontrollit të një veture Audi me targa të Kosovës, të drejtuar nga një shtetas i Kosovës, kanë gjetur shtatë pako me marihuanë.

“Aktivitetet e koordinuara të Drejtorisë së Policisë dhe Drejtorisë së të Ardhurave dhe Doganës në mëngjesin e sotë, rreth orës 3:30 kanë parandaluar kontrabandën e lëndës bimore të dyshuar si drogë narkotike marihuanë me peshë rreth 48.2 kilogramë. Është arrestuar B.R. nën dyshimin se ka kryer veprën penale ‘mbajtje dhe shpërndarje të lëndëve narkotike. Masat dhe veprimet e mëtejme policore – prokuroriale për këtë rast janë nën vazhdim e sipër”, thuhet në njoftim të Policisë.

Reci, si pjesë e Nismës Socialdemokrate, u punësua në pozitën e sekretarit të MTI-së gjatë Qeverisë Haradinaj dhe u largua nga detyra në vitin 2020.

Ministri i Punëve të Brendshme Xhelal Sveçla ka reaguar në lidhje me shkrimet dhe lajmet për draft projektligjin e ri për pagat e zyrtarëve publikë.

Sipas Sveçlës, ende nuk ka draft final të Ligjit për pagat e zyrtarëve publikë.

Ai ka shtuar se nuk ka ndonjë vlerë të koeficientit.

Në media janë publikuar një mori shkrimesh nga propozim projektligjin e ri për vlerën e koeficientit të zyrtarëve publik.

Për shkak të mungesës së vlerës monetare të koeficientit, janë publikuar vetëm numrat në bazë të pozitave të zyrtarëve shtetëror.

“Ministria e Punëve të Brendshme dëshiron të informojë qytetarët se vala e pseudolajmeve që po përhapen me shpejtësi në mediat tona rreth ligjit për pagat e zyrtarëve publik është e pavërtetë dhe qëllimkeqe. As nuk ka draft final të ligjit për pagat e zyrtarëve publik e as nuk ka ndonjë vlerë të koeficientit. Vlera e koeficientit nuk do të jetë pjesë e ligjit për pagat e zyrtarëve publik, meqë e njëjta përcaktohet me ligjin e buxhetit”, thuhet në reagimin e Sveçlës.

Ai shton se lajmet për vlerën e koeficientit e publikuar në media sot është dezinformatë.

“Kjo valë e dezinformatave ka për qëllim krijimin e konfuzionit dhe krijimin artificial të pritjeve me idenë se këto pritje pastaj shumë lehtë mund të keqpërdoren për nxitje të pakënaqësive dhe ngritje të debateve të kota krahasuese. Ju bëjmë me dije që ministria jonë do të ndajë draftin final me publikun në momentin kur i njëjti të finalizohet”, thotë tutje Sveçla.

KALLXO.com raportoi sot se në Ligjin e shfuqizuar për pagat për zyrtarët e sektorit publik, koeficienti më i ulët në Policinë e Kosovës ka qenë për kadetin policor, pozitë kjo që kishte koeficient 1.

Me propozimin e ri për ligjin e ri të pagave koeficienti për kadetin policor është rritur në 2.

Pas shfuqizimit të Ligjit për pagat nga ana e Gjykatës Kushtetuese në vitin 2020, tashmë është hartuar një projektligj i ri ndërsa KALLXO.com ka siguruar draftin në të cilin koeficienti është nga 1 deri në 20.

Në propozimin për ligjin e ri për paga nuk është caktuar vlera e koeficientit.

KALLXO.com për këtë çështje ka kërkuar sqarime edhe nga ana e Ministrisë së Punëve të Brendshme.

Deri në publikim të këtij shkrimi, MPB nuk ka dhënë përgjigje për vlerën e caktuar të koeficientit por edhe se kush ka qenë në grupin punues të këtij drafti të projektligjit të ri për pagat në sektorin publik.

Sipas draft Ligjit të ri për paga thuhet se “për vitet e tjera buxhetore, vlera monetare e koeficientit përcaktohet me ligjin vjetor të buxhetit. Përcaktimi i vlerës së koeficientit bëhet në pajtim me legjislacionin për menaxhimin e financave publike”.

As këtë herë paralajmërimi për bombë në Stacionin e Autobusëve në Prishtinë nuk doli të jetë i vërtetë.

Kështu tha zëdhënësja e Policisë për rajonin e Prishtinës Flora Ahmeti.

Ahmeti tha se informata e pranuar është “lajm i rrejshëm”.

“Informata është trajtuar nga ana e policisë. Pas kontrolleve të kryera nga njësitet kompetente, nuk është gjetë asgjë e dyshimtë. Hetuesit policor në koordinim me prokurorin e shtetit, kanë filluar punën për zbardhjen e të gjitha rrethanave që ndërlidhen me këtë rast i cili është cilësuar si lajmërim i rrejshëm”.

Për disa herë Policia kishte pranuar telefonata anonime se ishte vendosur mjete shpërthyese tek Stacioni i Autobusëve në Prishtinë, por që të gjitha rezultuan të pasakta.

Deputeti i Listës “GUXO”, Haxhi Avdyli, në emisionin DPT te Fidani, ka lënë të kuptohet se partia “GUXO” synon që të krijojë grup parlamentar të veçantë në Kuvendin e Kosovës, ani pse në zgjedhje kanë garuar me një listë me Lëvizjen Vetëvendosje dhe në Kuvend janë në kuadër të GP të Vetëvendosjes.

Avdyli ka thënë se aktualisht s’mund ta formojnë, meqë janë vetëm pesë deputetë, megjithatë shton se në rast se do të bëhen gjashtë, do të synojnë ta krijojnë grupin e tyre parlamentar.

“ Pyetje me vend, e vërteta është qe ne jemi me rregulloret e Kuvendit, duhet të jemi gjashtë deputet, dhe ne jemi pesë deputet, dhe me pesë nuk mundemi të formojmë grup parlamentar, por në momentin që bëhemi gjashtë, tash nuk e di qysh mund të bëhemi gjashtë, a ose hyn naj deputet tjetër, ose shkon naj deputet…apo vjen naj deputet nga një grup tjetër parlamentar, nuk mund ta dimë, ne jemi të interesuar të kemi edhe grup parlamentar”, ka thënë Avdyli në DPT te Fidani.

Më 17 shkurt bëhen 14 vjet që kur Kosova ka shpallur pavarësinë.

Të martën e 15 shkurtit, Qeveria e ka bërë të ditur logon e kësaj date të rëndësishme për shtetësinë.

“Gëzuar dita e pavarësisë Kosovë”, është mesazhi i shkruar në tri gjuhë zyrtare të vendit.

Ndërkohë, ende nuk është prezantuar zyrtarisht protokolli i shtetit për festën e 14 vjetorit të pavarësisë.