Instituti Kombëtar i Shëndetit Publik u ka bërë thirrje qytetarëve që të vazhdojnë t’i respektojnë masat antiCOVID pasi situata epidemiologjike vazhdon të jetë e rëndë.

IKSHPK u bën thirrje qytetarëve që kanë kokëdhembje, kollitje, dhembje fyti, vështirësi në frymëmarrje, rrjedhje hundësh, temperaturë, plogështi, humbje e shijes të testohen.

Lexoni të plotë njoftimin e IKSHPK-së:

“Të nderuar qytetarë!

Ju lutemi bartni maskat në çdo vend dhe  vaksinohuni!

Omicron (B.1.1.529) po vazhdon të përhapet me shtim të rasteve fatale dhe është varianti dominues në qarkullim duke rënduar akoma situatën epidemiologjike me pasoja të rënda për shëndetin e qytetarëve.

Virusi është kudo andaj mos neglizhoni rekomandimet themelore: maska, distanca, higjiena. Shmangni udhëtimet, qëndroni në shtëpi dhe ajrosni ambientet e mbyllura.

IKSHPK është duke vazhduar pandërprerë me testimin dhe gjurmimin e të gjitha rasteve, kontakteve të rasteve në komunitet dhe diagnostikimin laboratorik andaj të gjithë personat me kokëdhembje, kollitje, dhembje fyti, vështirësi në frymëmarrje, rrjedhje hundësh, temperaturë, plogështi, humbje e shijes, rekomandohen të testohen.

Situata epidemiologjike akoma është e rëndë, andaj IKSHPK apelon tek të gjithë qytetarët që të respektohen masat e Qeverisë së Republikës së Kosovës. Na ndihmoni që të ju ndihmojmë!

Për shkak të rrezikshmërisë së lartë të përhapjes së COVID-19, bëjmë thirrje në veçanti për kujdes dhe mosgrumbullim. Ndërsa, rekomandojmë institucionet përgjegjëse të mbikëqyrin me përpikëri dhe të ndërmarrin të gjitha veprimet e nevojshme për zbatimin e masave për parandalimin dhe luftimin e pandemisë.

Është i domosdoshëm kujdesi i shtuar i të gjithëve që në mënyrë strikte të respektohet distanca fizike, të përdoren maskat, të bëhet dezinfektimi dhe ajrosja e hapësirave, duke pamundësuar dhe shmangur përhapjen eventuale të mëtejme të infeksionit të COVID-19.

Omicron është tejet ngjitës, andaj mbani maskat në çdo vend, mbani distancën mbi dy metra edhe në mjedise të hapura edhe po qe se të gjithë bartin maska!

Duke qenë se vaksinimi është mënyra më e mirë dhe më e sigurt për të parandaluar COVID-19, veçanërisht format e rënda të sëmundjes dhe vdekjet, ne vazhdojmë të apelojmë fuqishëm për vaksinim sa më gjithëpërfshirës, sa më të gjerë dhe sa më të shpejtë të popullatës nga mosha 12 vjeçare.

Vaksinat mund të merren çdo ditë në të gjitha institucionet e kujdesit parësor në komunën tuaj.

Gjithashtu apelojmë për vaksinimin me dozën përforcuese dhe dozën e tretë që mund ta marrin të gjithë qytetarët e moshës mbi 18 vjeçare.

Vaksinohuni dhe ftoni të tjerët të vaksinohen!

Duke u vaksinuar vetë, ju mbroni veten, mbroni edhe njerëzit për rreth jush, në rend të parë familjen.

Të gjitha të dhënat nga vendet tjera dëshmojnë qartë dhe pa asnjë dyshim, se ky variant mund të shkaktojë sëmundje të rëndë dhe humbje jete, sidomos mes personave të pavaksinuar dhe, deri diku, edhe mes atyre që nuk kanë marrë dozën përforcuese. Andaj, Vaksinimi mbetet arma më e fortë për të parandaluar hospitalizimin dhe rastet e rënda klinike.

Të gjithë pa dallim dhe domosdoshmërish duhet të vazhdojmë të zbatojmë masat parandaluese kundër COVID-19 dhe rekomandimet e profesionistëve shëndetësor!

Prandaj, në vazhdimësi vlen për secilin person dhe më tej vazhdojmë të bëjmë thirrje:

Mbulo gojën dhe hundën me maskë!

Mbaj higjienën!

Respekto distancën!

Një rast i dhunës në familje ka ndodhur në qytetin e Mitrovicës.

Policia ka njoftuar se ka arrestuar të dyshuarin mashkull kosovar nën dyshimin se, i njëjti për shkak të një mosmarrëveshje me viktimën femër kosovare-bashkëshorten e tij, janë përfshirë në rrahje në mes veti.

Të njëjtit kanë pranuar tretman mjekësor, dhe pas intervistimit, në konsultim me prokurorin janë liruar në procedurë të rregullt. Rasti duke u hetuar.

Po shohim policë pothuajse në çdo rrugë, e me prezencën e shtuar të tyre në trafik është rritur edhe numri i gjobave. Nëse llogarisim gjobën më të ulët në trafik, atë prej 30 eurosh, i bie se muajin e kaluar në buxhetin e shtetit janë derdhur 1 milion e 407 mijë euro. Nuk dihet nëse të gjithë qytetarët i kanë paguar gjobat, por gjithsesi ato do të paguhen dikur.

Policia e Kosovës ka thyer rekord sa i përket shqiptimit të gjobave në trafik në muajin janar të këtij viti. Në statistikat e policisë dhënë Gazetës Express, bëhet e ditur se në janar janë shqiptuar 46 mijë e 904 gjoba për kundërvajtje të ndryshme në trafik. Apo rreth 20 mijë gjoba më shumë sesa në janar të vitit 2021. Në total në janar të vitit 2021 ishin shqiptuar 27 mijë e 115 gjoba të trafikut.

Statistikat e Policisë së Kosovës
Nëse këto gjoba i përkthejmë në euro, duke llogaritur gjobën më të ulët 30 euro, i bie se në janar të këtij viti janë përfituar 1.407,120 euro nga gjobat, ndërsa në janarin e vitit 2021 janë grumbulluar të paktën 813,450 euro nga gjobat. Por, siç e kemi parë shumica e gjobave janë shqiptuar për tejkalim të shpejtësisë, ku për këtë kundërvajtje në trafik shoferi mund të gjobitet me qindra euro.

Policia e Kosovës nuk ka qenë kurrë më aktive në trafik sesa në këta muajt e fundit, por këtë e sheh si siguri rrugore dhe masë preventive për uljen e numrit të aksidenteve, Nol Deda, ekspert i çështjeve rrugore.

“Shtimin e policëve në trafik e shikoj si siguri rrugore, si masë preventive për sigurinë rrugore. Policia duhet me pas edhe planin e veprimit në secilën ditë dhe secilën muaj. E dimë se rripi i sigurisë, shpejtësia, janë disa elementge që duhet të jenë në planin e policisë për 12 muaj…Janë shenja se policia është kative në rrugë dhe është duke marrë masa preventive për parandalimin e aksidenteve”, tha Deda për Gazetën Express.

Sipas tij, nga rreth 47 mijë gjoba të shqiptuara në janar të këtij viti, rreth 80% janë për tejkalim të shpejtësisë.

“Nga këto 47 mijë gjoba, rreth 80% janë për tejkalim të shpejtësisë, kjo i bie se kemi shpëtu edhe aksidente me fatalitet”, tha tutje Deda.

Ai tha se gjoba më e ultë është ajo prej 30 eurosh për parkim të automjeteve në vendet ku ndalohet parkimi i tyre, teksa më e larta shkon 500-600 euro, por edhe deri në 900 euro për tejkalim të shpejtësisë nën ndikim të alkoolit.

“Gjoba më e ultë është për parkim 30 euro dhe më e larta për tejkalimin e shpejtësisë diku deri në 300-500 euro. Po edhe gjoba për tejkalim nën ndikim të alkoolit është më e larta, por ligji mbi rregullat e trafikut ka pësu ndryshime sa i përket dhënies së gjobave”, u shpreh Deda më tej.

I pyetur se pse këtë muaj ka gati dyfish më shumë gjoba të shqiptuara sesa në muajin janar 2021, ai tha se kjo gjë ka ndodhur për shkak të pandemisë. Pasi thotë se vitin e kaluar masat kanë qenë më të rrepta dhe qarkullimi i automjeteve ka qenë më i vogël.

“Janë kundërvajtje të ndryshme dhe policia ka qenë më aktive. Vitin e kaluar kemi qenë në pandemi, ky është elementi kryezor. Ne kemi numër më të madh të aksidenteve për shkak se lëvizja e automjeteve nuk ka qenë e sanksionuar sikur vitin e kaluar në janar. Numri i aksidenteve varet nga numri i qarkullimit të automjeteve. Nëse e bëjmë krahasimin e statistikave, është absurde sepse pandemia ka ndiku direkt, pandemia e ka ulë numrin e aksidenteve dhe kufizimi i lëvizjes së automjeteve”.

Policia e Kosovës tha për Express se kemi numër më të madh të gjobave të cilat janë të ndryshme dhe shqiptohen varësisht kundërvatjeve që bëhen.

“Vërehet se ka shtim të angazhimeve policore në teren dhe numër më të madh të gjobave, të cilat janë të ndryshme varesisht nga shkeljet/kundervajtjet e kryera”, thuhet në përgjigjen e policisë.

Policia e Kosovës ka bërë të ditur se komplet vitin 2020 janë shqiptuar 359 mijë e 956 gjoba për kundërvajtje të ndryshme në trafik, teksa komplet vitin 2021 janë shqiptuar 483 mijë e 477 gjoba, apo mbi 123 mijë gjoba më shumë sesa në 2020-ën.

Statistikat e Policisë së Kosovës
Policia e Kosovës apelon te shoferët e automjeteve që të respektojnë shenjat dhe rregullat e komunikacionit dhe fton qytetarët të bashkëpunojnë me policinë.

“Për të gjitha kundërvajtjet që mund të shkaktohen në komunikacion, të njoftojnë menjëherë policinë, stacionin më të afërt, apo përmes aplikacionit digjital ‘’Lajmëro Policinë ‘’ dhe në numrat kujdestarë : 192 ,0290/326-250 & 0290/322-406”, thuhet në apelin e policisë.

Kosovës të hënën iu shtua zyrtarisht edhe një parti politike. Së shpejti do të mësohet emri i kryetarit apo kryetares së këtij subjekti politik. Deri atëherë, Donika Gërvalla qëndron në krye të partisë.

Lista Guxo u regjistrua para dy ditësh në KQZ, një vit pas krijimit dhe bashkimit me Lëvizjn Vetëvendosje, i fituan zgjedhjet e 14 shkurtit 2021, për të ardhur në pushtet. Lidhja Demokratike e Kosovës, partia nga e cila u largua tash presidentja Vjosa Osmani dhe disa të tjerë, atë ditë e regjistroi rezultatin më të dobët në histori të subjektit më të vjetër politik në vend.

“Është e pashmangshme që Guxo ka pasur peshë të konsiderueshme në rezultatin e zgjedhjeve të 14 shkurtit”, mendon Faton Peci, ministër i Bujqësisë.

Guxo-n tash për tash do ta udhëheqë ministrja e Punëve të Jashtme, Donika Gërvalla, ndërsa u tha se shpejt do ta kenë një proces të brendshëm zgjedhor, ku do të përzgjidhet kryetari ose kryetarja dhe strukturat tjera udhëheqëse.

Gërvalla është e vetëdijshme se, siç tha vetë të hënën në një konferencë për media, “nuk do të jetë si me Vjosa Osmanin, sikur pa Vjosa Osmanin”, por tha se Lista Guxo do të jetë parti serioze.

Edhe pse, nisur nga fjalët e ministrit Peci, Guxo do t’u hyjë zgjedhjeve me rrënjë, kjo parti konsiderohet si e vogël. Në fakt, nuk njihen shumë figura prej saj. Në radhët e saj ka 5 deputetë, që nuk mjafton as të themelojë grupin e vet parlamentar.

Në atë pesëshe hyn edhe deputetja Doarsa Kica Xhelili, e cila është një prej me të zëshmeve të krejt Grupit Parlamentar të LVV-së. Ajo gëzon edhe një admirim të veçantë nga presidentja Vjosa Osmani, e cila ia devijoi rrugën e avokates për ta futur kah politika.

“E gëzuar që në këtë rrugëtim më është bashkuar Doarsa, dikur bashkëpunëtore e imja në profesion e njëherit një avokate e shkëlqyeshme”, pati shkruar Osmani para zgjedhjeve të fundit parlamentare.

E meqenëse deputetja shpejt u bë prej figurave kyçe afër presidentes Osmani, Express e ka pyetur rreth mundësisë së kandidimit të saj për kryetare, por Kica Xhelili nuk është përgjigjur.

Prononcimin për këtë çështje e evitoi edhe ministri Faton Peci. Ai thjesht tha në konferencën e djeshme se do t’i organizojnë zgjedhjet e brendshme.

“Pashmangshëm që ne tash do të futemi në një proces të zgjedhjeve të brendshme, duke filluar nga niveli më i ulët, nëndegëve”, tha Peci.

Ministri i Bujqësisë tha se i kanë përfshirë format më të mira të garës në statutin e partisë. Ai u bëri thirrje të gjithë qytetarëve dhe personaliteteve me integritet e kredibilitet që t’i bashkangjiten procesit zgjedhor të Guxo-s, duke ‘premtuar’ se “gara do të jetë e hapur”.

Vjosa Osmani, si bartëse e listës zgjedhore nën logon e LVV-së së Albin Kurtit, arriti t’i mblidhte më shumë se 300 mijë vota më 14 shkurt 2021, duke u bërë njeriu më i votuar ndonjëherë në Kosovë. Ajo e kishte parë rezultatin e mirë të vendimit të saj për ta përplasur derën e LDK-së, kur kjo parti e shkarkoi nga çdo funksion brenda saj. Kësisoj, Osmani u rreshtua bashkë me Albin Kurtin, të cilin e kishte kundër në vitin 2019, kur garonte për kryeministre.

Ministri Faton Peci, njëri nga njerëzit më të afërt të Vjosa Osmanit, tregoi të hënën në Kanal10 se Kurtin e kanë ftuar në konventën e partisë, që megjithatë s’dihet se kur do ta organizojnë. Ai tha se personalisht nuk ka marrë ndonjë urim nga Kurti për zyrtarizimin e subjektit politik.

“Të paktën unë personalisht nuk kam marrë diçka të tillë, por e di që është diskutu dhe Z. Kurti ka shprehë gatishmërinë që kurdo që ne e organizojmë konventën, që të jetë pjesë si mysafir i nderit në proces të formalizimit tonë si subjekt politik”, tha Peci.

Lista Guxo, e deklaruar si parti e qendrës së djathtë, aktualisht nuk sheh mundësi bashkëpunimi me partitë e orientimit të njëjtë ideologjik që aktualisht janë në opozitë. Udhëheqësja e partisë, Donika Gërvalla, tha dje se do ta vazhdojnë bashkëpunimin me LVV-në.

“Ne do ta thellojmë bashkëpumin me Lëvizjen Vetëvendosje. Nuk shohim momentalisht në skenën politike një partner serioz me të cilin do të mund t’i hynim sfidave që kërkohen”, tha kryediplomatja.

Me rastin e 17 Shkurtit- Ditës së Pavarësisë, të enjten në kuadër të aktiviteteve festive shtetërore, bëhet edhe parakalimi i kuadrateve të Forcës së Sigurisë së Kosovës së bashku me ato të Policisë së Kosovës.

Ministria e Mbrojtjes njofton se parakalimi do të realizohet më 17 shkurt, nga ora 12 deri në ora 13, në Bulevardin “Nëna Terezë” në Prishtinë.

“Me këtë rast, Ministria e Mbrojtjes dhe FSK, ju ftojmë të gjithëve pa dallim, që të merrni pjesë në këtë ngjarje të veçantë, ku prania juaj sa më masive do të bëjë shumë më madhështore Festën tonë të Pavarësisë.

Forca e Sigurisë së Kosovës është e juaja, andaj ejani të festojmë së bashku!”, thuhet në njoftimin e Ministrisë së Mbrojtjes.

Në kuadër të shënimit të kësaj dite, janë paraparë një sërë aktivitetesh shtetërore.
Sipas agjendës të dërguar nga Zyra e Kryeministrit, aktivitetet për shënimin e 14 vjetorit të pavarësisë do të nisin qysh në orën 08:00 me ngritjen e flamurit në oborrin e Qeverisë së Kosovës.

Pas kësaj në orën 09:10-09:30 do të vendosen kurora lulesh tek kompleksi “Adem Jashari” në Prekaz. Kurora lulesh do të vendosen edhe te varri i presidentit Ibrahim Rugova dhe veprimtarit Adem Demaçi.

Kurse në orën 11:00 do të nis seanca solemne e Kuvendit të Kosovës. Për shënimin e këtij përvjetori do të parakalojë edhe FSK-ja dhe Policia e Kosovës nga ora 12:00 deri në ora 13:00.

Aktivitetet për shënimin e 14 vjetorit të pavarësisë do të mbyllen në orën 20:00 me një koncert që do të mbahen të Kino Armata në Prishtinë. /Telegrafi/