Pagat për mësimdhënësit e shkollës fillore do të rriten 13 deri në 40 euro bruto, në bazë të draft-ligjit të pagave të publikuar në media. Sipas këtij draft-ligji, mësimdhënësit do ta kenë koeficientin 4.6 e i cili nënkupton se paga e tyre bruto do të jetë 552 euro, raporton Ekonomia Online.

Por kryetari i Sindikatave të Bashkuara të Arsimit (SBASHK), Rrahman Jashari, ka thënë për Ekonomia Online se pagat e mësimdhënësve në Kosovë janë nën mesatare, e se pavarësisht punës që kanë bërë nuk ka lëvizje pozitive ne këtë aspekt.

“Pagat e mësimdhënësve në Kosovë nëse i marrim si mesatare të pagave, janë nën mesataren e pagave në sistemin publik. Domethënë nën mesatare, që nënkupton as mesatarja e pagave që janë të shërbyesve civil në Kosovë. Janë të ulëta dhe po them edhe me koeficientët që i kishim arritur me grevë atëherë kishte një lëvizje por jo shumë të madhe ndërsa tash, e tërë ajo punë i tërë ai mund që e kemi bërë edhe me greva kthehet disi në pikën zero dhe në vend rritjes, të lëvizjeve pozitive të koeficienteve në arsim kemi edhe zbritje të tyre”, ka thënë Jashari.

Krahas koeficientit të lartë që po kërkon SBASHKU, ata duan që deri në implementimin e tërësishëm të këtij Ligji, mësimdhënësit të marrin një ngritje të pagës deri në 100 euro.

“Kërkesë e jona që doli nga Këshilli Drejtues është pasi që ligji edhe po u pajtuan sindikatat dhe qeveria në fund të marsit nëse shkon procedura atëherë deri në qershor as që mund të flitet se do të votohet në Parlament. Dhe pastaj në version thuhet se ky ligj do të hyjë në fuqi gjashtë muaj pas botimit në gazetën zyrtare, që domethënë këtë vit nuk do të kemi fare ligj. Prandaj ne kemi dalë dhe e kemi bërë publike dhe me shkresat që do t’ua dorëzojmë institucioneve, do të kërkojmë që nga prilli e deri sa të bëhet ligji dhe të hyjë në funksion në sistemin arsimor në mënyrë lineare që nga punëtorët ndihmës e deri në universitet ta kenë një ngritje page prej 100 euro secili. Kur bëhet ligji pastaj veprojnë sipas ligjit, deri atëherë le të ketë një ngritje dhe këtë kërkesë do t’ia dërgojmë edhe kryeministrit edhe qeverisë Kurti”, ka thënë Jashari.

Pagë të dinjitetshme për mësimdhënësit po kërkon njohësi i Arsimit, Rinor Qehaja. Për Ekonomia Online, ai ka thënë se mësimdhënësit duhet të marrin paga në bazë të përkushtimit dhe performances së tyre, e jo të gjithë të paguhen njëjtë.

“Ne vlerësojmë që mësimdhënësit meritojnë paga më të mëdha, mirëpo paga më të mëdha si subjekt i vlerësimit të performancës. Pra, mësimdhënësi i mirë dhe performuesi i mirë të shpërblehet për punën e tij dhe e kundërta për ata mësimdhënës që mungojnë në përkushtim në përkushtim dhe vullnet në punën e tyre. Pra, për neve me të vërtetë është e papranueshme rritja gjithherë e njëtrajtshme e pagës për të gjithë mësimdhënësit pa përjashtim. Pagat e mësimdhënësve vlerësohen që janë përafërsisht të ngjashme me pagat mesatare të mësimdhënësve duke pasur parasysh edhe shportën e konsumatorit në vendet e rajonit nëse ky është pikësynimi jonë pra që të bëjmë një krahasim të tillë me vendet e rajonit mirëpo pastaj të njëjtën duhet ta kontekstualizojmë edhe me shpenzimet e shportës në Kosovë”, ka thënë Qehaja.

Ai vlerëson se një pagë e dinjitetshme ndikon edhe në zhvillimin socio-ekonomik të vendit. Ai thotë se puna e mësimdhënësit është shumë e ndjeshme, teksa shton, se kërkon shumë përkushtim e dinjitet./EO

PDK pro tërheqjes së Trustit, kundërshtohet nga VV-ja e LDK-ja
Partia Demokratike e Kosovës siç duket do të jetë e vetme karshi propozimit që ua mundëson qytetarëve tërheqjen e mjeteve financiare nga Trusti Pensional deri në 30 për qind.

Kësisoj, Lëvizja Vetëvendosje dhe partia në opozitë Lidhja Demokratike e Kosovës, po e konsiderojnë si të panevojshme një hap të tillë. Nga LDK-ja thonë se ekonomia po funksionon shumë mirë, ndërsa VV-ja e sheh si propagandë të PDK-së këtë propozim.

Teksa ka folur për një propozim të tillë, deputeti i Partisë Demokratike të Kosovës, Bekim Haxhiu theksoi se me kërkesë të qytetarëve ka kërkuar që të riprocedohet në kuvend tërheqja nga trusti pensional dhe atë deri në 30 për qind.

“Në kohën kur është diskutuar ligji për rimëkëmbjen ekonomike në vitin 2020 kam bërë një amendament ku kam kërkuar që të kategorizohet tërheqja nga trusti pensional dhe atë deri në 30 për qind. Kjo rezulton që qytetarët që kanë të ardhura më të vogla të mbështeten më shumë sepse ka pasur kërkesa të qytetarëve të riprocedohet një kërkesë e tillë dhe po besoj që për shkak të krizës ekonomike edhe rritja e energjisë elektrike dhe rritja e çmimeve të konsumit ditor do të duhet të ketë mbështetje për qytetarët”, tha Haxhiu.

Po ashtu, deputeti i PDK-së ka kërkuar edhe uljen e TVSh-së, në mënyrë që të ndihmohen qytetarët në zvogëlimin e çmimeve.

“Bazuar në kërkesën e qytetarëve ka dy mënyra njëra që të bëhet me iniciativë ligjore me 6 nënshkrime të deputetëve dhe e dyta është që po këta qytetarë kanë kërkuar që të bëhet përmes mbledhjes së 10 mijë nënshkrimeve. Njërën ose tjetrën do ta procedojmë në kuvend në mënyrë që qytetarët të tërheqin mjetet e tyre nga trusti. Sa më shumë mjete në qarkullim do të ketë rritje ekonomike dhe do ndihmoheshin qytetarët. Kam pranuar me dhjetëra mesazhe që kanë kërkuar qytetarët të mbështeten. Ulja e TVSh do të kishte ndihmuar në zvogëlimin e çmimeve”, ka thënë Haxhiu.

Si arsye kryesore e tij për këto propozime janë rritja e çmimeve të produkteve ushqimore në Kosovë, teksa thotë se ato janë më shtrenjtë se në Gjermani.

Mirëpo me këto propozime nuk po pajtohet partia më e madhe në pushtet Lëvizja Vetëvendosje dhe as partia në opozitë Lidhja Demokratike e Kosovës.

Deputeti i Lëvizjes Vetëvendosje, Armend Muja në një intervistë për Ekonomia Online po e konsideron propozimin e PDK-së të varfër intelektualisht.

Muja tha se qëndrimi i VV-së edhe në të kaluarën edhe tash është i njëjtë që kjo praktikë nuk duhet të lejohet.

“Nëse ka ardhur ky propozim nga PDK unë mendoj që është një propozim i varfër intelektualisht. Demonstron mos njohuri konceptuale siç e karakterizon PDK qe një kohë të gjatë. E vërteta është që qytetarët e Kosovës kanë vështirësi në këtë kohë. Mirëpo qeveria duhet të përdorë mekanizma të tjerë të politikës fiskale jo të ngritën pritje në formë të propagandës që i mundëson ose të krijojë përshtypje sikurse ajo lejohet. Trusti pensional është i dizajnuar në atë mënyrë që të kursejnë qytetarët që të përballojnë konsumin pas moshës 65 vjeçare. Nëse i shikoni të gjitha raportet ndërkombëtare kjo është bërë një herë por që nuk duhet të lejohet në të ardhmen dhe e kuptoj që çfarëdo që kanë nevojë qytetarët është mirë që qeveria ti adresojë ato përmes transfereve sociale jo domosdoshmërish duke abuzuar me trustin pensional”.

Teksa foli për kritikat që janë shpeshtuar në opinion, Muja tha se këto janë propaganda të PDK-së, me ç’rast i ftoi edhe të tjerët të mos bëhen pjesë e saj ndaj Qeverisë Kurti.

“Qëndrimi i VV-së edhe në të kaluarën edhe tash është i njëjtë që kjo praktikë nuk duhet të lejohet. Çdo mungesë e likuiditeti është trajtuar nga qeveria Kurti përmes shtimit të plus 200 milion eurove transfereve sociale dhe subvencioneve dhe nëse ka nevojë ajo do të adresohet në të ardhmen edhe përmes shtesave të tjera por jo duke ngritur pritje për tërheqjen e trustit pensional. Nuk duhet të jeni pjesë e propagandës së PDK kundër qeverisë Kurti”.

“Ne e kuptojmë që ka vështirësi në Kosovë dhe qeveria Kurti ka filluar ti adresojë. Qeveria Kurti ka ardhur në pushtet të ofrojë perspektivë për të rinj. Gjatë qeverisjes së PDK-së dhe LDK-së mbi gjysma e të rinjve kanë shprehur dëshirë që të largohen jashtë vendit. Dhe kjo vështirësi vazhdon të jetë, por qeveria Kurti ka marrë masa se nga viti i ardhshëm ti adresojë këto problematika si punësimin e të rinjve dhe mbështetjen për biznesin e grave. Rritja ekonomike është rekord këtë vit 9.9 për qind”, tha Muja.

Ndonëse e kishte miratuar një vendim të tillë në kohën sa udhëhiqte me shtetit sa ishte kryeministër, Avdullah Hoti thotë se një praktikë e tillë nuk duhet të vijë në Kuvend.

Thotë se bizneset janë duke funksionuar mirë dhe punësimi është normalizuar.

“Unë besoj që duhet t’i gëzohemi faktit që po shkojmë drejt mbylljes së pandemisë. Në vitin 2020 në qeverinë tonë kur kemi propozuar vendimin për tërheqje 10 për qind të trustit pensional e kemi bërë mbi arsyetimin se ka pasur një shok të pa precedent në ekonomi dhe shoqëri. Mijëra persona humbën vendet e punës, bizneset pësuan. Ne tash duhet të gëzohemi që po e përmbyllim pandeminë dhe ato pakot e mbështetjes ekonomike të promovuara në Qeverinë tonë kanë dhënë rezultate sepse kanë kthyer menjëherë në janar ekonominë në trend pozitiv dhe nuk jemi në situatë që të ndërmarrim veprime të tilla. Nuk besoj që është nevojshme të vijë në kuvend sepse bizneset janë duke funksionuar, punësimi është normalizuar dhe nuk ka arsye të marrim hapa radikal”, tha Hoti.

Këshilltari Special i Departamentit të Shtetit Amerikan, Derek Chollet, ka njoftuar se sot pati një bisedë telefonike me kryeministrin e Kosovës, Albin Kurtin.

Chollet ia përmendi Kurtit edhe zgjedhjet e Serbisë që do të mbahen me 3 prill. Ndër tjera, diplomati amerikan falënderoi Kosovën për pritjen e afganëve në Kosovë.

“Telefonatë fantastike me kryeministrin Albin Kurti. Rikonfirmova mbështetjen e palëkundur për sovranitetin e Kosovës. Përpara kemi zgjedhjet e Serbisë në prill, u diskutuan rastet kur shtetet e OSBE-së i kane pranuar kërkesat e shteteve të tjera për t’u lejuar votimi fizikisht. Falënderoj Kosovën për bujarinë e saj që priti afganët”, ka shkruar Chollet.

Lidhur me këtë çështje, ish-kryetari i Gjykatës Kushtetuese, Enver Hasani, ka thënë se për dallim nga referendumi, mbajtja e zgjedhjeve të Serbisë në Kosovë nuk e prek sovranitetin e Kosovës.

“… ato (zgjedhjet) mund të zhvillohen edhe në territorin e shteteve të tjera, me marrëveshje apo pa marrëveshje, kur ndodh brenda hapësirave që gëzojnë paprekshmëri diplomatike… Ato janë organe politike që shprehin vullnetin politik jashtë territorit sovran. Sepse Serbia, rendi kushtetues serb, ekziston edhe po u mbajtën edhe pse s’u mbajtën ato”, ka thënë Hasani.

Nënkryetari i Kuvendit, Enver Hoxhaj ka thënë se përkundër asaj që po ndodhë në botë, amerikanët dhe evropianët e kanë vëmendjen kah Kosova dhe përmbyllja e shtetndërtimit të saj, duke filluar nga marrëveshja me Serbinë deri tek ulja e Kosovës në OKB.

“Përkundër asaj që ky vit përcillet me drama të mëdha ndërkombëtare amerikanët dhe evropianër e kuptojnë se nga Sllovenia deri në Maqedoninë e Veriut është një temë e hapur dhe ajo është mos anëtarsimi i Kosovës në OKB”, ka thënë Hoxhaj.

“Kur e shoh vëmendjen e madhe amerikane, kur Sekretari Blinken në fillim të vitit i dërgoi letër Kurit dhe i tregoi qëndrimin amerikan, dhe i thotë se kjo që shkruan në këtë letër nuk është qëndrim i imi personal por i politikës amerikane dhe presidentit Biden dhe thotë se qëllimi është tek njohja e ndërsjellë, mendoj se këtë mundësi do të duhej ta shfrytëzojë Kosova. Dhe nëse kjo nuk ndodhë në vitin 2022-2023 sa Joe Biden mund të jetë në Shtëpinë e Bardhë bota mund të ketë lëvizje tjera tektonike në rrafshin gjeopolitik.”, tha Hoxhaj në Top Channel.

Ish-ministri i jashtëm Enver Hoxhaj ka thënë se nëse Serbia dhe Kosova nënshkruajnë një marrëveshje të ndërsjellë, e cila në thelb e ka njohjen dhe marrëdheniet diplomatike, ai tha se kjo do të mundësonte që Kosova të anëtarësohet në OKB dhe njohjet individule do të ishin irrelevente, të parëndësishme.