Prova dhe dëshmi interesante bëjnë pjesë në dosjen hetimore të Prokurorisë së Shtetit në rastin ku mbeti i vrarë zyrtari policor Lirim Haxholli në Zllatar të Prishtinës.KALLXO.com ka siguruar dosjen e Prokurorisë në të cilën përshkruhen dyshimet për vrasjen e policit dhe mënyrën e organizimit të ahengut në të cilin kishin marrë pjesë 15 zyrtarë policorë.Në këtë dosje përshkruhen dyshimet se zyrtarët policorë para se të shkonin në ahengun i cili ishte mbajtur në malin e fshatit Zllatar, ishin pajisur me municion jozyrtar.

“Në një shtëpi të drurit-vilë me qira, të pandehurit e lartcekur duke i pasur me vete armët zyrtare, paraprakisht ishin pajisur me municionin jozyrtar e më pas kishin dalë në ballkonin e shtëpisë ku ishin duke u argëtuar dhe kishin shtënë me armën zyrtare dhe municionin jozyrtar”, thuhet në dosjen e siguruar nga KALLXO.com.

Dosja përshkruan se disa nga zyrtarët policorë kishin dalë në ballkonin e shtëpisë ku ishte duke u mbajtur ndeja private dhe kishin shtënë me armën zyrtare e cila ishte mbushur me municion jozyrtar.Këtë veprim dyshohet ta kenë bërë policët Enis Imeri, Bleart Misiri, Elit Thaqi, Florent Ahmeti dhe Gëzim Tahiri, të cilët po dyshohen për përdorim të armës në kundërshtim me Ligjin dhe shkaktim të rrezikut për jetën e njerëzve, ndërsa Fatlum Mehmeti dyshohet se e ka privuar nga jeta kolegun e tij Lirim Haxholli.

Mehmeti dyshohet se ka qëlluar me armë policin Haxholli, i cili ishte duke qëndruar i ulur afër tij.Lidhur me këto dyshime, policit Fatlum Mehmeti, gjykata i shqiptoj masën e paraburgimit ndërsa të dyshuarve të tjerë ua caktoi masën e arrestit shtëpiak.Natën e 18 shkurtit në një aheng privat të organizuar nga disa zyrtarë policorë kishte mbetur i vrarë polici 27-vjeçar Lirim Haxholli.

Menjëherë pas rastit ishin arrestuar gjashtë zyrtarë policorë ndërsa të tjerët që ishin prezent në vendin e incidentit janë suspenduar nga puna.Përveç arrestimeve dhe suspendimeve ishin sekuestruar edhe 14 armë zyrtare të policëve të cilët kishin qenë pjesë e ahengut./kallxo.com

Parku Kombëtar i Valbonës në Tropojë, i mbuluar nga velloja e bardhë e dëborës ka tërhequr një numër të lartë turistësh në dy muajt e parë të vitit.

Drejtori i Administratës së Zonave të Mbrojtura Kukës, Lefter Gjana ka thënë se, “deri tani Parkun Kombëtar të Valbonës e kanë vizituar 1,570 vizitorë vendas e të huaj, nga të cilët 750 në muajin janar”.

Sipas tij, peizazhi që ofron ky park sidomos në stinën e dimrit ka tërhequr të apasionuarit pas alpinizimit dhe jo vetëm.

“Ky park nuk njeh stinë, pasi vizitorë të shumtë e zgjedhin atë gjatë gjithë vitit. Pavarësisht temperaturave të ulëta, vizitorët zgjedhin për të kaluar një fundjavë ndryshe në luginën e Valbonës, ku përveç ngjitjeve në mal, shijojnë edhe ushqimet tradicionale”, tha Gjana.

Sipas tij, gjatë vitit të kaluar ky park u vizitua nga një numër i lartë turistësh vendas e të huaj.

“Që prej janarit deri në dhjetor të 2021 Valbona u vizitua nga 123,654 turistë, ku 76,467 ishin turistë vendas dhe 47,187 të huaj”, ka shtuar Gjana.

Turizmi malor duket se është shndërruar në një nga tendencat më të pëlqyera të shqiptarëve.

Parku Kombëtar i Valbonës i konsideruar një mrekulli më vete me peizazhe pyjore e ujore, male e lugina mbresëlënëse është një ndër më të frekuentuarit nga turistët vendas e të huaj.

Lugina e Valbonës është shpallur Park Kombëtar në janar të 1996. Ky park ka një sipërfaqe prej 8,000 hektarësh. Konsiderohet si mrekullia e Alpeve. Ndodhet 25-30 km në veri – perëndim të qytetit Bajram Curri, qendra e rrethit të Tropojës.

Kufizohet me Parkun Kombëtar të Thethit dhe zonën natyrore të mbrojtur”Lumi i Gashit”. Territori i tij përshkohet nga rruga automobilistike Bajram Curri-Dragobi-Valbone e Çerem.
Ka maja të larta e të thepisura dhe për çdo stinë ndërron koloritin e ngjyrave dhe duke paraqitur një dinamikë të jashtëzakonshme imazhesh në kushtet e një lugine plot të papritura e me shumë labirinte.

Parku Kombëtar i Valbonës ka vlera të larta shkencore,turistike, shoqërore kuruese, të cilat pasurohen me një biodiversitet me rëndësi kombëtare dhe më gjerë. /Telegrafi/

Ministrja e Ekonomisë, Artane Rizvanolli i ka bërë thirrje KESCO-së që të dalë me një sqarim për mënyrën si janë llogaritur faturat pe energjisë për muajin shkurt.

Në seancën plenare, ajo tha se ka paqartësi për faturimin e energjisë.

“Ka pasur paqartësi në fatura për këtë pajtohem dhe i bëjë thirrje KESCO-së që të dalë me një sqarim për mënyrën si janë llogaritur faturat. Sipas diskutimeve që i kemi pas me Zyrën e Rregullatorit të Energjisë (ZRrE) dhe sipas shpjegimeve që janë dhënë, tarifat dhe faturat janë llogaritur ashtu siç duhet, por ka paqartësi në fatura dhe shpesh janë paraqitur numra më të lartë që ato që duhet t’i paguajnë qytetarët. Nuk është e qartë se cila shifër është fatura finale. Ftoj gjithë qytetarët dhe bizneset që janë bërë gabime të ankohen”, tha ai.

Ministres i reagoi deputeti, i PDK-së, Ferat Shala i cili kërkoi të dijë cilat janë hapat për sanimit të gabimeve të faturimit të energjisë.

“Nëse ka gabime në fatura atëherë çka janë hapat që kjo qeveri do të merr në sanimin e këtij gabimi”, tha ai.

Por ministrja tha se ajo nuk tha se ka gabime, por vetëm paqartësi./KSP

Të martën në Bruksel po zhvillohen takime në kuadër të dialogut mes Kosovës dhe Serbisë, në nivel tkryenegociatorëve.

Burimet e Bashkimit Evropian kanë konfirmuar takimet duke i përshkruar si “takime në kuadër të dialogut”, sepse nga përvoja e së kaluarës është parë se palët shpesh nuk janë takuar fare, por vetëm kanë pasur takime të ndara me të dërguarin e posaçëm të BE-së për dialog, Mirosllav Lajçak.

Takimin e parë me Lajçakun e ka pasur Besnik Bislimi, zëvëndëskryeministër i Kosovës.

Menjëherë pas tij, Lajçak ka nisur takimet me delegacionin e Serbisë, të udhëhequr nga Petar Petkoviq.

Në orët e pasdites pritet të zhvillohet takimi i përbashkët me ndërmjetësim të Lajçakut.

Sipas burimeve të BE-së, takimet e së martës do të shërbejnë për të vazhduar diskutimet e lidhura me zbatimin e marrëveshjeve të deritashme dhe hapat e ardhshëm në normalizimin e raporteve mes Kosovës dhe Serbisë.

Dialogu mes Kosovës dhe Serbisë, me ndërmjetësim të BE-së, ka nisur më 2011.

Sipas burimeve diplomatike pritet që temat për të cilat do të diskutohet do të jenë çështja e të pagjeturve, ajo e targave të veturave dhe çështja e energjisë.

Pala serbe, sipas asaj që ka thënë Petkoviq në një intervistë për televizionin shtetëror të Serbisë, pritet të kërkojë që të diskutohet për zbatimin e marrëveshjes për krijimin e Asociacionit të komunave me shumicë serbe në Kosovë dhe për mbajtjen e zgjedhjeve të Serbisë në territorin e Kosovës.

Serbia mban zgjedhjet e parakohshme parlamentare dhe ato presidenciale më 3 prill.

Institucionet e Kosovës, ndryshe nga praktika e mëparshme, kanë paralajmëruar se nuk do të lejojnë organizimin e tyre në Kosovë.

Takimi i 22 shkurtit zhvillohet pas një kohe relativisht të gjatë pa takime, me përjashtim të atyre të ekspertëve për çështjen e targave të veturave.

Për këtë çështje është arritur një marrëveshje kalimtare në vjeshtën e vitit të kaluar, por është thënë se në një afat prej gjashtë muajsh duhet të arrihet një marrëveshje afatgjate.

Burimet diplomatike në Bruksel kanë paralajmëruar se takimet e së martës do të shfrytëzohen për të testuar nëse ka gatishmëri të mjaftueshme mes palëve edhe për një takim të nivelit të lartë mes kryeministrit të Kosovës, Albin Kurti dhe presidentit serb, Aleksandar Vuçiq.

Të dyja palët kanë thënë publikisht se janë të gatshme për takim të tillë, por BE ka insistuar se nëse ndodhë ai, duhet të ketë edhe rezultate konkrete.

Më herët, zëdhënësi i BE-së për Çështje të Jashtme dhe Siguri, Peter Stano, i pyetur rreth mundësisë që së shpejti të ketë takim të nivelit të lartë në kuadër të dialogut, ka thënë se “zhvillimi i një takimi të tillë do të bëhet i ditur në një kohë të përshtatshme”./REL