Në kohën kur çmimet e naftës në tregjet ndërkombëtare po shënojnë rritje si pasojë e konfliktit mes Iranit dhe Izraelit, është prekur edhe Kosova me shtrenjtimin e derivateve.

Aktualisht, çmimi për një litër naftë në tregun e Kosovës varion nga 1.25 euro deri 1.35 euro.

Këto çmime po variojnë nga pompa në pompë në gjithë vendin.

Kryetari i Shoqatës së Naftëtarëve të Kosovës, Fadil Berjani ka theksuar më parë se tensionet e fundit mes Izraelit dhe Iranit kanë shkaktuar lëkundje të ndjeshme në tregjet ndërkombëtare të naftës, duke ndikuar drejtpërdrejt në rritjen e çmimeve. Sipas Berjanit, përshkallëzimi i situatës në Lindjen e Mesme po ngjall frikë për ndërprerje të furnizimit global me naftë.

Ndërkohë, deputeti i LDK-së, Besian Mustafa ka thënë se Kosova është në prag të një rritje enorme të çmimeve të derivateve nga disa tregtarë që janë të lidhur ngushtë me LVV-në.

Ministrja në detyrë e Ekonomisë, Artane Rizvanolli tha se nuk ka pasur asnjë moment kur KEK-u ka prodhuar zero megavat në orë, ose që Kosova në ndonjë moment ka qenë në kolaps energjetik.

Në një konferencë për media, ministrja në detyrë tha se kanë sfida në sektorin energjetik, sepse sipas Rizvanollit, siguria furnizimit varet nga termocentralet 62 e 42 vjeçare, sepse nuk janë bërë kurrë rehabilitime të tyre.

“Një arsye pse që nga prilli nuk i kemi në funksion të gjitha blloqet është sepse për herë të parë në termocentralin “Kosova B” po i modernizojmë turbinat dhe rrjedhimisht blloku B2 është jashtë funksionit për tu kryer këto operime për gati 6 muaj. Kjo është një sakrificë e përkohshme, por e domosdoshme, dhe duhet ta bëjmë tash, sepse nuk e kanë bërë me kohë kur çmimet e importit kanë qenë trefish më të lira. Po thuhet ndër të tjera që këto janë remonte të rregullta që po bëhen në termocentralin “Kosova B” e që janë bërë gjithmonë. Kjo nuk është e saktë. Këto po bëhen për herë të parë, janë bërë intervenime të vogla qindra tenderë që kanë kushtuar në total mbi 1 miliard euro, por kurrë nuk janë bërë rehabilitime e modernizime të tilla siç po i bëjmë tani”, tha në konferencë Rizvanolli.

Ajo tha se për herë të parë në termocentralin “Kosova B” po bëjnë modernizimin e turbinave, vendosjen e filterëve dhe një sërë investimesh përcjellëse që, sipas saj, do ta rrisin kapacitetin për 80 megavat dhe do ta ulin dukshëm ndotjen.

Ka dështuar përpjekja e 36-të për konstituimin e Kuvendit të Kosovës, kjo pasi nuk pati vota të mjaftueshme për formimin e komisionit për votim të fshehtë.

Kanë qenë gjithsej 99 deputetë në sallë, ku 53 prej tyre votuan për, një kundër dhe asnjë abstenim.

Kryesuesi Avni Dehari e ndërpreu seancën, duke thënë se vazhdimi i seancës do të mbahet më 25 qershor, në orën 11:00, raporton zeri.info.

Janë Partia Demokratike e Kosovës (PDK), Lidhja Demokratike e Kosovës (LDK), AAK-Nisma dhe Lista Serbe, të cilat po e kundërshtojnë votimin e fshehtë për zgjedhjen e kryeparlamentarit.

Çështja e votimit të fshehtë – që u propozua më 1 maj nga kryesuesi i seancës, Avni Dehari, pasi e propozuara e Lëvizjes Vetëvendosje (LVV) për kryetare të Kuvendit, Albulena Haxhiu, nuk arriti në disa votime t’i merrte 61 votat e nevojshme për t’u konfirmuar në post, është dërguar në Gjykatën Kushtetuese të Kosovës nga partitë që në legjislaturën e kaluar ishin në opozitë.

Ato thonë se është jokushtetuese mënyra se si LVV-ja po tenton që kryeparlamentari të votohet përmes formës së fshehtë, dhe i kanë kërkuar Kushtetueses të marrë “një masë të përkohshme për ndalim të mbajtjes së seancave, derisa me prioritet ta trajtojë këtë lëndë dhe ta marrë një vendim”.

Seancat e dështuara po mbahen çdo 48 orë, sipas rregullores së Kuvendit.

Deputetët duhet ta zgjedhin kryetarin dhe pesë nënkryetarët për ta konstituuar përfundimisht Kuvendin e ri.

Vetëm pas konstituimit të Kuvendit mund të formohet qeveria e re. 

Ministri në detyrë i Finacave, Hekruan Murati ka thënë se Kosova rrezikon t’i humbë 90 milionë euro nga Banka Botërore nëse marrëveshja nuk ratifikohet deri në shtator.
Ai ka thënë se për këtë opozita duhet të reflektojë dhe të mundësojë konstituimin e Kuvendit.

“Nëse marrëveshja për 90 milionë euro me kamatë 0% nuk ratifikohet deri në shtator, ekziston rreziku shumë i lartë që këto mjetet t’i merren Kosovës dhe ti jepen një shteti tjetër. Prandaj është jetike që opozita të reflektojë dhe të mundësojë konstituimin e Kuvendit, e pastaj edhe të votojë këtë marrëveshje. Inatet politike nuk do të duhej t’i kushtonin shtetit tonë”, ka shkruar Murati në Fcebook.

Të hënën do të mbahet seanca e 36-të në përpjekje për konstituim të Kuvendit.

Për të 36-tën herë me radhë, sot më 23.06.2025, deputetët e Kosovës do të mblidhen në sallën plenare në përpjekje për të konstituuar legjislaturën e nëntë.

Seanca që ka nisur më 15.04.2025 po vazhdon pa asnjë rezultat deri tash. Përpjekja e radhës do të nisë në orën 11:00, apo 48 orë pas asaj paraprakes.

Kjo seancë ka mbetur në pikën e tretë të rendit të ditës, zgjedhjen e Kryetarit të Kuvendit.

Seanca është vazhdim i ndërprerjes së vazhdueshme për shkak të pamundësisë për të krijuar Komisionin për Votim të Fshehtë për zgjedhjen e Kryetarit të Kuvendit të Kosovës.

Lëvizja Vetëvendosje, e cila ka të drejtën të propozojë kandidatin për kryetar të Kuvendit, ka propozuar Albulena Haxhiun për këtë post.

Megjithatë, ajo nuk ka arritur të sigurojë numrin e nevojshëm të votave në asnjërën nga herët kur është proceduar në votim.

Presidentja e vendit, Vjosa Osmani, ka takuar liderët partiakë më 15.05.2025, në përpjekje për të gjetur në zgjidhje, por as nga ky takim nuk ka rezultuar ndonjë progres në tejkalim të bllokadës institucionale.

Ndërkohë, Gjykata Kushtetuese ende nuk ka dalë me opinion në lidhje me kërkesën e AAK-së për vlerësimin e kushtetushmërisë së propozimit për formimin e Komisionit për Votim të Fshehtë për Zgjedhjen e Kryeparlamentarit të Kosovës.

Zgjedhjet parlamentare në Kosovë janë mbajtur më 09.02.2025. LVV ka fituar 48 ulëse në Kuvend, PDK 24, LDK 20, koalicioni AAK-NISMA 8, Lista Serbe 9, pakicat joserbe 10 dhe Partia për Liri, Drejtësi dhe Mbijetesë 1 ulëse.