Ambasada e Shteteve të Bashkuara të Amerikës në Kosovë ka kritikuar Lëvizjen Vetëvendosje, duke thënë se përpjekjet e saj për moscertifikimin e Listës Serbe për zgjedhjet e 28 dhjetorit janë me vizion afatshkurtër dhe përçarës.

Në një reagim në rrjetet sociale, Ambasada ka thënë se veprimet e tilla dëmtojnë stabilitetin e Kosovës por edhe interesat e SHBA-së, përfshirë rifillimin e Dialogut Strategjik mes dy vendeve.

“Përpjekjet e VV-së për të bllokuar certifikimin e Listës Serbe për të marrë pjesë në zgjedhjet e Kosovës janë me vizion afatshkurtër dhe përçarëse. Të gjithë qytetarët e Kosovës duhet të jenë në gjendje të ushtrojnë të drejtat e tyre demokratike. Veprime të tilla dëmtojnë stabilitetin e Kosovës dhe interesat e SHBA-së, duke përfshirë rifillimin e dialogut tonë strategjik për të çuar përpara mundësitë për bizneset amerikane dhe të Kosovës”, thuhet në reagim.

Komisioni Qendror i Zgjedhjeve mbajti dje mbledhjen e 87-të në këtë vit, të kryesuar nga kryesuesi, Kreshnik Radoniqi.

Në këtë mbledhje, KQZ mori vendime të veçanta për certifikimin e 22 subjekteve politike për pjesëmarrje në zgjedhjet e parakohshme për Kuvendin e Republikës së Kosovës, të cilat do të mbahen më 28 dhjetor 2025.

Gjatë periudhës 7-ditore (24 nëntor – 30 nëntor 2025) 24 subjekte politike, prej të cilave 18 parti politike, 3 koalicione, 2 iniciativa qytetare dhe 1 kandidat i pavarur, kanë plotësuar online formularin e certifikimit për pjesëmarrje në zgjedhjet e parakohshme për Kuvendin e Kosovës.

Sipas vendimit të KQZ-së, këto janë subjektet politike të certifikuara:

Partitë politike:

1. LIDHJA DEMOKRATIKE E KOSOVËS – LDK;
2. PARTIA DEMOKRATIKE E KOSOVËS – PDK:
3. KOSOVA DEMOKRATIK TÜRK PARTISI;
4. INICIATIVA E RE DEMOKRATIKE E KOSOVËS;
5. NOVA DEMOKRATSKA STRANKA – NDS;
6. Za Slobodu Pravdu i Opstanak;
7. PARTIA LIBERALE EGJIPTIANE;
8. SOCIALDEMOKRATSKA UNIJA – SDU;
9. JEDINSTVENA GORANSKA PARTIJA;
10. PARTIA ROME E BASHKUAR E KOSOVËS;
11. AAK – ALEANCA PËR ARDHMËRINË E KOSOVËS;
12. Kosovaki Nevi Romani Partia;
13. FJALA;
14. LËVIZJA PËRPARIMTARE E ROMËVE TË KOSOVËS (LPRK);
15. KOSOVSKI SAVEZ;
16. PARTIA BALLI KOMBËTAR DEMOKRAT SHQIPTAR (PBKDSH).

Koalicionet:

1. Koalicioni “Lëvizja VETËVENDOSJE!”, i përbërë nga 4 partitë politike: Lëvizja VETËVENDOSJE!, GUXO, Alternativa dhe Partia Shqiptare Demokristiane (PSHDK).
2. Koalicioni “Koalicija VAKAT”, i përbërë nga 3 parti politike: Demokratska Stranka Bošnjaka (DSB), Bošnjačka Stranka Kosova (BSK) dhe Demokratska Stranka Vatan (DSV); dhe
3. Koalicioni “PAI – PDAK – LPB”, i përbërë nga 3 parti politike: Partia e Ashkalinjëve për Integrim (PAI), Partia Demokratike e Ashkanlive të Kosovës (PDAK) dhe Lëvizja për Bashkëveprim (LPB)”;

Iniciativat qytetare:

1. PSA; dhe
2. Iniciativa Qytetare për Kosovë.

Kandidat i pavarur:

22. NEDŹMIDIN SEJDILAR.

Në mesin e subjekteve politike që kanë aplikuar është dhe NISMA SOCIALDEMOKRATE – NISMA. Sipas njoftimit nga Zyra për Regjistrim, Certifikim dhe Kontrollin Financiar të Subjekteve Politike, ky subjekt politik i ka përmbushur të gjitha kriteret tjera, përveç listës së nënshkrimeve. Pas plotësimit të listës së nënshkrimeve, subjekti politik do t’i nënshtrohet certifikimit nga KQZ. Subjektit politik, i është dhënë afat për plotësim të listës së nënshkrimeve deri 3 dhjetor 2025, në orën 12:00.

Ndërkaq, rekomandimi për certifikimin e partisë politike Srpska Lista, nuk mori votat e nevojshme për t’u certifikuar.

Instituti Hidrometeorologjik i Kosovës ka bërë të ditur se temperaturat minimale do të luhaten mes 1 dhe 3°C, ndërsa gjatë ditës parashikohen 6 deri në 9°C.

Vende-vende do të shfaqen riga shiu, të cilat mund të rikthehen herë pas here gjatë ditës.

Era do të fryjë kryesisht nga jugperëndimi, me shpejtësi 1–6 m/s.

Lëvizja Vetëvendosje ka shpallur zgjedhjet e brendshme për kandidatët për deputetë për zgjedhjet parlamentare të 28 dhjetorit 2025.

Misioni i OSBE-së në Kosovë ka dënuar moscertifikimin e Listës Serbe për zgjedhjet e parakohshme parlamentare në Kosovë, të parapara të mbahen më 28 dhjetor 2025.

Përmes një deklarate, OSBE ka shprehur zhgënjim të fortë dhe shqetësim të thellë për “vendimin e disa përfaqësuesve të partive politike brenda Komisionit Qendror Zgjedhor (KQZ) për të refuzuar ose abstenuar nga miratimi i kërkesës për akreditim të Listës Serbe për përfshirje në zgjedhjet e 28 dhjetorit”.

OSBE-ja ka dënuar veprimet që cenojnë të drejtën e subjekteve politike për pjesëmarrje në zgjedhje. Veprime të tilla, thuhet më tej në deklaratë, përfaqësojnë një largim të qartë nga standardet zgjedhore të pranuara ndërkombëtarisht.

“Jemi seriozisht të shqetësuar nga polarizimi politik në rritje brenda KQZ, i reflektuar në sjelljen e votimit që shfaqet i nxitur nga interesat partiake sesa nga kriteret ligjore dhe parimet demokratike. Një sjellje e tillë minon paanshmërinë dhe besueshmërinë thelbësore për një organ të pavarur të menaxhimit të zgjedhjeve” – thuhet në deklaratë.

Këto veprime, sipas OSBE-së, rrezikojnë të dëmtojnë besimin e publikut në procesin zgjedhor dhe të përforcojnë perceptimet se vendimet janë të motivuara politikisht dhe jo të orientuara nga drejtësia, gjithëpërfshirja dhe transparenca.

“Misioni i OSBE-së i kërkon KQZ-së dhe të gjithë aktorëve politikë të mbajnë profesionalizmin, paanshmërinë dhe standardet demokratike, duke garantuar që zgjedhjet e 28 dhjetorit të zhvillohen plotësisht për të krijuar praktikën më të mirë ndërkombëtare”- thuhet në deklaratën e OSBE-së.

KQZ nuk e certifikoi Listën Serbe për zgjedhjet e 28 dhjetorit 2025 gjatë një mbledhjeje të mbajtur të martën, më 02.12.2025.

Më 2 vota pro, dy kundër dhe 7 abstenime KQZ ka refuzuar certifikimin e Listës Serbe për zgjedhjet e 28 dhjetorit.