Disa biznese kanë nisur t’i shtrenjtojnë produktet, e disa të tjera kanë paralajmëruar shtrenjtim nga 1 maji, kur pritet të hyjë zyrtarisht në fuqi tarifa e re e energjisë elektrike me çmim më të lartë. Shtrenjtimi i produkteve nga bizneset për qytetarët po bëhet i papërballueshëm, kanë thënë në shoqatën “Konsumatori”. E bizneset kanë paralajmëruar shtrenjtim edhe më tej.

Në një nga furrat e Prishtinës, një bukë tani po shitet me çmim 80 centë, ndërsa para dy javësh, siç raporton “KosovaPress”, kushtonte 60 centë. E kafiteritë në kryeqytet kanë bërë të ditur se që nga maji, kafeja do të shtrenjtohet edhe më shumë.

Në disa furra në Prishtinë, prapa kamerave, punonjësit s’kanë përjashtuar mundësinë e shtrenjtimit të bukës për shkak të tarifave të reja të rrymës.

Sipas pronarit të një kafiterie në kryeqytet, furnizuesit po e shesin kafenë më shtrenjtë, dhe për këtë arsye, siç ka thënë ai, ka qenë i detyruar të përditësojë çmimet e kafesë. Nga e enjtja, nga 1 euro sa është, makiato do të kushtojë 1 euro e 50 centë në këtë bar. E ai ka paralajmëruar shtrenjtim edhe më shumë pas shtrenjtimit të rrymës.

“Çmimet e kafesë janë shtrenjtuar prej 1 majit për shkak se furnitorët që ne marrim kafe, ata e kanë rritur çmimin. Edhe në vitin 2024 dy herë është rritur çmimi. Herën e fundit është rritur çmimi për katër euro. Tash ka ndodhur rritja prapë prej 1 majit edhe për katër euro, që nënkupton se nuk kemi zgjidhje ne bizneset pa e rritur edhe çmimin e kafesë. Një espresso e kemi shitur 1 euro, tash do të shitet 1 e 20, që prapë nuk e mbulon atë pjesën ku me ditë sa. Ndërsa, makiato e madhe 1 euro e gjysmë. Përndryshe, është paralajmëruar që do të rritet prapë deri në fund të vitit edhe njëherë ose dy…Klienti nuk po e kupton që furnitori njëherë e shtrenjton, më pas edhe ne…Ka të bëjë edhe me shtrenjtim të rrymës, patjetër. Po duhet ta shtrenjtojmë edhe pjesën tjetër të ushqimit. Sepse pas shtrenjtimit të rrymës, kanë filluar paralajmërimet edhe për shtrenjtimin e bukës dhe gjërave të tjera që janë në proces të prodhimit me rrymë”, ka thënë pronari i një kafeneje në Prishtinë.

E qytetarët kanë thënë se çmimet pos në furra, janë ngritur edhe në markete.

“Standardi i cili është me vendin tonë… jashtëzakonisht çmimet janë të mëdha, krahasuar me pagat, me standardin e qytetarëve. Por, vërehet që disa artikuj vërtetë janë shtrenjtuar…Nëpër makete normal. Për shembull në krahasim me Gjermani, Zvicër shumë artikuj në Kosovë janë më shtrenjtë se jashtë. Jo që ka ngritje enorme vetëm këtë kohë të fundit, por në mënyrë graduale çmimet gjithmonë janë në ngritje, e pagat jo”, ka thënë qytetari Viktor Sopi.

E krahas shtrenjtimit, sipas Isuf Musliut, duhet të ketë edhe rritje pagash.

“Jo vetëm në furra dhe markete, po çdo kund po i ngrisin çmimet. Kudo që janë po vjedhin, po i ngrisin çmimet. Punëtorët e shkretë po punojnë me paga të ulëta… Po vërejmë që (rritje të çmimeve) çdo qytetar jo veç unë vëren çmime. Sot është çmimi i ulët, nesër pa kurrfarë paralajmërimi del. Pse nuk po i rritin pagat, të ardhurat për qytetarët, e më pas le t’ua ngritin edhe çmimet”, ka thënë ai.

Që nga paralajmërimi për shtrenjtim të energjisë elektrike kanë filluar ngritjet e çmimeve sipas kryetarit të shoqatës “Konsumatori”, Selatin Kaçaniku.

“Vaj halli për konsumatorët” ka thënë ai derisa ka shtuar se tarifat e reja të energjisë kanë qenë “përkrahje” për ata që kanë dashur t’i rritin çmimet.

“Aty-këtu kanë filluar rritje të çmimeve që nga momenti i paralajmërimit të shtrenjtimit të çmimit të energjisë elektrike që ka qenë një vendim ose një paralajmërim i pamatur i Qeverisë, ministrisë dhe ZRRE-së. Që atëherë është shkaktuar vala e ngritjes së çmimeve. Në një mënyrë ai paralajmërim ka qenë si mbështetje apo përkrahje për të gjithë ata që duan t’i ngrisin çmimet. Në momentin kur qeveria dhe ZRRE-ja e kanë paralajmëruar ngritjen e çmimeve është dashur të dalin edhe me masën e parandalimit të ngritjes së çmimeve para kohe. Ngritja e çmimeve është e sponzorizuar nga qeveria… Vaj halli për konsumatorin”, potencon Kaçaniku.

E kryetari i Odës së Hotelierisë dhe Turizmit, Hysni Sogojeva ka thënë se në zbatim të tarifave të reja të rrymës, çmimet në restorante dhe hotele, kanë nisur të rriten dhe kjo pason me reduktimin e klientelës. Si rrjedhojë e kësaj, Sogojeva potencon se bizneset janë gjithnjë e më të rrezikuara nga falimentimi.

“Sipas informatave që i kemi ne si odë, të jeni të bindur që shumica e bizneseve e sidomos ato të gastronomisë dhe hotelerisë mezi që janë duke qëndruar në këmbë të veta. Me këto shtrenjtime, zvogëlimi i klientelës dhe shumë gjëra që do të pasojnë në të ardhmen, është një problem shumë i madh dhe jetik… Veç kanë filluar diku, kafja ka filluar të bëhet 1 euro e 30 centë apo 1 euro e 40 deri në 1 e 50. Në momentin kur shtrenjtohet shërbimi, normal që klientela zvogëlohet. Me zvogëlimin e klientelës bizneset, edhe ashtu që nuk janë të ndihmuara nga shteti… Tani kur në Prishtinë tek rruga B qysh më herët kanë filluar, sepse nuk është gjendja e mirë…Shtrenjtimi i rrymës lidhet varg me shtrenjtimet e tjera”, ka thënë Sogojeva.

Zyra e Rregullatorit të Energjisë më 16 prill ka aprovuar tarifën prej 16.1 për qind për shtrenjtimin e rrymës. Shtrenjtimi i energjisë elektrike, ka shkaktuar reagime të shumta nga bizneset, subjektet politike dhe qytetarët, madje kishte edhe protesta./KosovaPress/

Presidentja e Kosovës, Vjosa Osmani, ka kujtuar personat e zhdukur nga lufta e fundit në Kosovë, në Ditën Kombëtare të të Zhdukurve me Dhunë.

Në një postim në Facebook, Osmani tha se ata që mungojnë janë “plaga më e thellë e luftës” dhe theksoi se drejtësia për ta është një premtim që nuk shuhet kurrë.

“Në Ditën Kombëtare të të Zhdukurve me dhunë, me dhimbje e respekt të thellë kujtojmë qytetarët tanë të zhdukur me dhunë gjatë luftës nga regjimi gjenocidal i Serbisë. Secili emër në atë listë është një jetë e ndalur dhunshëm, një familje që pret, një plagë që kërkon shërim, një ankth që nuk shuhet kurrë,” shkroi Osmani.

Ajo shtoi se, edhe pas 26 vjetësh nga përfundimi i luftës, Serbia vazhdon të refuzojë hapjen e arkivave që përmbajnë të dhëna për të zhdukurit me dhunë dhe për varrezat masive.

“Ky refuzim është përsëritje e përditshme e krimit, jo vetëm ndaj viktimave, por edhe ndaj familjeve të tyre dhe ndaj gjithë Kosovës. Prandaj, lufta jonë për drejtësi nuk do të ndalet kurrë. Kujtojmë me nderim dhe kërkojmë drejtësi me vendosmëri,” përfundon Osmani.

Presidentja e Kosovës, Vjosa Osmani, ka kujtuar masakrën e Mejës, “njërën nga plagët më të thella të Kosovës”, ku humbën jetën 376 njerëz të pafajshëm mizorisht nga regjimi gjenocidal i Serbisë.

E para e vendit është shprehur se çdo person i vrarë e i zhdukur me dhunë gjatë luftës, “është betim i yni për drejtësi”.

“Sot, me zemër të rënduar, e kujtojmë Masakrën e Mejës, njërën nga plagët më të thella të Kosovës. 376 jetë të pafajshme u morën mizorisht nga regjimi gjenocidal i Serbisë, vetëm pse ishin shqiptarë. Plagët që la pas kjo tragjedi janë ende të hapura, por dhimbja dhe vendosmëria jonë, janë bashkuar për të mos lejuar që e vërteta të harrohet. Çdo person i vrarë e çdo person i zhdukur me dhunë gjatë luftës, çdo ëndërr e ndërprerë dhunshëm, është betim i yni për drejtësi. Në këtë tokë të shenjtë të dhimbjes, mbjellim shpresën për një të ardhme me më shumë drejtësi dhe më shumë dinjitet. Kujtimi për martirët e Mejës do të jetojë përjetë në zemrat tona. Lavdi jetës dhe sakrificës së tyre!”, ka shkruar Osmani në Facebook.

Mbrëmë, rreth orës 00:25, në rrugën “Brigada 123”, në Suharekë, Policia ka bërë të ditur se ka ndaluar një veturë të cilën po e drejtonte 20-vjeçari E.T.

Në bazë të dyshimeve, Policia ka kryer kontrollin e automjetit dhe të dyshuarit.

 

Gazeta Sinjali raporton se të njëjtit, gjatë kontrollit, nën ulësen e shoferit i janë gjetur dhe sekuestruar, dy pako me rizlla, një grinder, një qese plastike me substancë të dyshuar narkotike të llojit marihuanë, që dyshohet se ishte për përdorim personal.

 

Lidhur me rastin janë përfshirë edhe hetuesit e Njësisë për Hetimin e Narkotikëve (DHTN), ku pas intervistimit të të dyshuarit, me urdhër të Prokurorit të Krimeve të Përgjithshme, është iniciuar rasti për “Posedim i paautorizuar i narkotikëve, substancave psikotrope dhe analoge”.

Në shënimin e Ditës së Personave të Zhdukur gjatë luftës së fundit në Kosovë, të dielën janë bërë homazhe te Monumenti i Personave të Zhdukur pranë Kuvendit të Kosovës.

Kryeministri në detyrë i Kosovës, Albin Kurti, bashkë me kabinetin e tij qeveritar, përfaqësues të shoqatave dhe familjarë, ka përkujtuar personat e zhdukur gjatë luftës së fundit në Kosovë, duke vendosur lule pranë Monumentit të Personave të Zhdukur.

Kryetari i Komisionit Qeveritar për Personat e Zhdukur, Andin Hoti tha se çështja e të zhdukurve nuk është plagë individuale, por prek gjithë shoqërinë kosovare.

Ai theksoi se normaliteti nuk mund të arrihet pa zbardhjen e së vërtetës dhe vendosjen e drejtësisë. Sipas tij, zhdukjet, vrasjet dhe fshehja e trupave në varreza masive, janë krime kundër njerëzimit dhe gjenocid i pastër, për të cilat ende kërkohet drejtësi në instanca ndërkombëtare.

Hoti nënvizoi vendosmërinë që nuk do të ndalen, derisa të dihet fati i personit të fundit të zhdukur.

“Të zhdukurit dhe plaga jonë nuk është plagë individuale, por është një plagë që e prek gjithë shoqërinë tonë. Është një plagë që nuk mund të ketë normalitet pa u treguar e vërteta dhe pa ardhur drejtësia në vend. Të zhdukurit nuk mund të shërohen si plagë vetëm me kalimin e kohës. Kjo plagë do të shërohet vetëm kur drejtësia do të vihet në vend dhe e vërteta të tregohet në familje. Zhdukjet, vrasjet apo edhe dërgimi i trupave në frigorifer apo në pajisje të ndryshme nëpër varreza masive në Serbi, nuk janë thjeshtë akte lufte. Ato janë krim kundër njerëzimit, gjenocid i pastër. Një lloj krimi që në fakt bota e sotme nuk e sheh shpeshherë. Prandaj, ky krim duhet të ketë drejtësi, e që fatkeqësisht ne këtë drejtësi ende po vazhdojmë ta kërkojmë në instanca ndërkombëtare dhe kudo që mundemi. Ne, Kosova, qytetarët e Kosovës, nuk do të ndalemi derisa personi i fundit i zhdukur të dihet fati i tij”, ka thënë Hoti.

Homazhe bëri edhe ambasadori i Britanisë së Madhe, Jonathan Hargreaves.

Pas përfundimit të luftës në Kosovë, në vitin 1999, të zhdukur kanë qenë rreth 6.500 persona. Që nga ajo kohë janë kryer disa zhvarrime në varreza masive në Kosovë dhe Serbi dhe deri më tash janë gjetur rreth 70 për qind e të zhdukurve.

Gërmimet e fundit janë bërë në Bishtazhin të Gjakovës, ku janë gjetur mbetjet mortore të mbi 10 kosovarëve, të vrarë gjatës luftës. /KSP/

Një aksident i rëndë trafiku ka ndodhur në orët e para të mëngjesit të sotëm në fshatin Vogovë të Gjakovës, ku për pasojë një person ka humbur jetën dhe tre të tjerë kanë mbetur të lënduar.

Sipas njoftimit të Policisë së Kosovës, aksidenti ka ndodhur më 27 prill 2025, rreth orës 02:05.

Hetimet paraprake tregojnë se shoferi i një automjeti, gjatë lëvizjes, ka humbur kontrollin mbi veturën dhe është vetaksidentuar.

Për pasojë, një person – mashkull, shtetas i Shqipërisë – ka humbur jetën në vendin e ngjarjes.

Tre persona të tjerë, që ndodheshin në automjet, kanë pësuar lëndime dhe janë dërguar për trajtim mjekësor.

Njësitet policore dhe ekipet emergjente kanë ndërhyrë menjëherë në vendin e ngjarjes për të ofruar ndihmën e parë dhe për të filluar hetimet mbi shkaqet e aksidentit.

Policia ka nisur hetimet për të sqaruar rrethanat e plota të ngjarjes./Telegrafi/

Hekuran Murati nga Lëvizja Vetëvendosje ka thënë se partia e tij ka kryer obligimin kushtetues me propozimin e emrit të Albulena Haxhiut për kryeparlamentare. E sipas tij, mosvotimi i saj dhe si rrjedhojë ngërçi në Kuvend nuk është përgjegjësi e deputetëve të VV-së, por e atyre që votojnë kundër.

“Ne kemi kryer obligimin tonë kushtetues, duke propozuar kandidatin për kryetar dhe duke votuar për. Ata që thonë se po bllokohet nga të gjithë dhe të gjithë duhet të ndajnë përgjegjësinë e kanë gabim. Bllokada s’bëhet me votë për. Ne përtej saj s’mund të votojmë vota të tjera”, ka thënë ai. “Bllokada nga ne do të ishte po të mos propozonim emër fare”.

Murati ka thënë se kompromisi që VV-ja mund të bëjë në konstituim është në “votën për nënkryetarët e opozitës”.

Murati është pyetur përse VV-ja nuk e pati votuar Kadri Veselin për kryeparlamentar dhe dallimin me propozimin e Haxhiut në situatën aktuale.

“S’e kemi votuar Veselin më 2014 për shkak se ishte koalicioni VLAN që në atë kohë kishte dështuar pikërisht për shkak të interpretimit të Gjykatës Kushtetuese. Kurse më vonë pozita e kryetarit të Kuvendit ishte pjesë e negociatave të koalicioneve fituese të zgjedhjeve që e kanë futur si pjesë të diskutimit për koalicionin qeverisës”, ka thënë ai./KOHA/