Zyra e Bashkimit Evropian në Kosovë ka shprehur keqardhje, për siç ka thënë, sulmin dhe gjuhen e përdorur nga anëtari i Lëvizjes Vetëvendosje në KQZ, Sami Kurteshi drejtuar mediave.

Në një postim në “X” ka bërë thirrje që praktikat e tilla të ndalen.

“Liria e medias duhet të mbrohet në çdo shoqëri demokratike – BE-ja do të vazhdojë ta mbështesë Kosovën në zhvillimin e saj”, thuhet në reagim.

Anëtari i VV-së në Komisionin Qendror të Zgjedhjeve, Sami Kurteshi, të mërkurën ka publikuar një shkrim në Facebook ku i ka fajësuar Asociacionin e Gazetarëve të Kosovës dhe disa media duke i quajtur “aleancë të grupeve kriminale”. Derisa i ka përmendur disa media në Kosovë, Kurteshi i ka quajtur edhe “vrasës me pagesë”.

Reagimi i Kurteshit erdhi disa ditë pas sjelljes së tij në KQZ ndaj gazetarëve që ishin të pranishëm duke u kërkuar disa herë me tone të larta që të largoheshin në këndin e mediave.

“Një qenie a grup qeniesh që shpif e gënjen hapur, që lutjen e qartë e të zëshme në gjuhën shqipe, për ndalimin e mësymjes fizike të të ashtuquajturve gazetarë, kamerambajtës në hapësirën e caktuar për mbledhje të KQZ, ose është idiot në kuptimin e plotë të fjalës, ose-ose, mendje e çakorduar kriminale prej vrasësi me pagesë, kur e quan „cenim fizik të gazetarëve“ dhe „pengim fizik të gazetarëve“, dhe si sjellje“recidivist në sulmet ndaj gazetarëve“. Pikërisht ky reagim, dëshmon pa dyshim për veprime të motivuara e të dirigjuara të „gazetarë/eve“ e „kameramanëve“ të shashtrisur prej kërcënimeve, shantazheve, yshtjeve, keqtrajtimeve nga bosat dhe bosat e bosave të tyre, që janë dëshmuar si vrasës me pagesë të dinjitetit të njeriut”, ka shkruar Kurteshi të mërkurën në Facebook.

Ndaj gjuhës së Kurteshit ka reaguar edhe Federata Evropiane e Gazetarëve. Sekretari i përgjithshëm i saj, Ricardo Gutierrez, i ka bërë thirrje kryeministrit në detyrë që të marrë masa. Gutierrez i ka kërkuar Albin Kurtit që ta ndalojë një gjuhë të tillë nga partia e tij, teksa ka theksuar se është përgjegjësi e tij “t’i japë fund praktikave të tilla mafioze”.

Xhelal Sveçla, ministër në detyrë i Punëve të Brendshme, tha se koordinimi ndërinstitucional dhe reagimi i shpejtë shpëtojnë jetë, minimizojnë dëme dhe parandalojnë kriza humanitare.

Për këtë arsye, nënvizoi Sveçla, vendi ynë është e përkushtuar ta avancojë arkitekturën e saj të emergjencave civile, duke investuar në kapacitete logjistike, teknologji moderne, ngritje të kapaciteteve profesionale dhe forcim të bashkëpunimit ndërinstitucional.

Ai shtoi se në këtë rrugëtim roli i Agjencisë për Menaxhimin e Emergjencave, IHMK-së, Agjencisë së Pyjeve dhe institucioneve të tjera relevante është thelbësor.

“Si qeveri jemi të përkushtuar të forcojmë koordinimin ndërmjet nivelit qendror dhe atij lokal, sepse reagimi efektiv ndaj fatkeqësive fillon nga komuniteti, nga qytetarët, të cilët duhet të jenë të informuar dhe të përgatitur mbi reagimin në situata emergjente. Kjo qesasje integruar forcon bashkëpunimin ndërinstitucional dhe shtrin mbështetjen nga njohja e rrezikut deri te gatishmëria e plotë operative funksionale”, tha ai sot një punëtori të përbashkët ndër-institucionale të organizuar nga Agjencia e Menaxhimit Emergjent (AME) në kuadër të Ministrisë së Punëve të Brendshme, kushtuar aktiviteteve të Instrumentit të Financimit të Ndihmës Teknike për Parandalimin dhe Gatishmërinë ndaj Fatkeqësive (TAFF 1 dhe TAFF 2), me synim forcimin e kapaciteteve të Kosovës në parandalim, gatishmëri dhe reagim ndaj fatkeqësive.

Ai foli edhe për mbështetjen e partnerëve ndërkombëtar, ku sipas Sveçlës, përballë këtyre sfidave është i një rëndësie të jashtëzakonshme.

Sveçla shprehu mirënjohje për Komisioni Evropian dhe me ndihmën e Bankës Botërore dhe Fondit Global për Reduktimin dhe Rimëkëmbjen nga Fatkeqësitë (GFDRR), për mbështetjen e vazhdueshme e të çmuar përmes projekteve TAF1 dhe TAF2.

Instituti Hidrometeorologjik bën të ditur se sot në Kosovë do të mbajë mot kryesisht i vranët dhe herë pas here me riga shiu.

IHK njofton se temperaturat minimale do të lëvizin ndërmjet 1 deri 3 gradë Celsius, ndërkaq ato maksimale nga 7 deri në 10 gradë Celsius.

Era do të fryjë nga jugperëndimi 1-5 m/s.

Kryetari i LDK-së, Lumir Abdixhiku, ka njoftuar se ka arritur marrëveshje parazgjedhore me Partinë e Drejtësisë dhe Aleancën Kosova e Re për zgjedhjet e 28 dhjetorit.

Presidentja e Kosovës Vjosa Osmani, është takuar me ambasadorin e Mbretërisë së Bashkuar, Jonathan Hargreaves.

Në njoftimin e Presidencës, thuhet se në takim u diskutua për zhvillimet e fundit në vend, si dhe për procesin e zgjedhjeve të parakohshme më 28 dhjetor.

Tutje, thuhet se shefja e shtetit ritheksoi rëndësinë që edhe këto zgjedhje të mbahen sipas standardeve më të larta demokratike, në të cilat Kosova tashmë është shembull.

“Po ashtu, në takim u diskutua edhe për hapat konkret drejt finalizimit të iniciativës së Presidentes për lidhjen e marrëveshjeve strategjike me Mbretërinë e Bashkuar në fushat e interesit të përbashkët, respektivisht atë të mbrojtjes, sigurisë, si dhe ekonomisë e tregtisë, për ç’gjë ishin dakorduar gjatë vizitës së Sekretarit të Jashtëm britanik në Kosovë në prill të këtij viti”, thuhet në njoftim.