Lëvizja Vetëvendosje ka bërë të ditur se është dëmtuar shtylla dhe pllaka e flamurit kombëtar pranë varrit të aktivistit Astrit Dehari.

Në një reagim në Facebook, LVV-ja falënderoi Policinë e Kosovës për reagimin e shpejtë dhe bëri të ditur se po presin hetimet për zbardhjen e shkakut të këtij incidenti.

“Me keqardhje kemi marrë lajmin se është dëmtuar shtylla dhe pllaka e flamurit kombëtar pranë varrit të aktivistit tonë, Astrit Dehari. Falënderojmë të gjitha njësitë e Policisë së Kosovës për reagimin e shpejtë, ndërkaq si Lëvizje VETËVENDOSJE! jemi në pritje të hetimeve që njësitë e specializuara të Policisë së Kosovës po zhvillojnë në drejtim të zbardhjes së shkaqeve apo shkaktarëve të këtij dëmtimi”, thuhet në njoftim.

Astrit Dehari vdiq në vitin 2015 në Qendrën e Paraburgimit në Prizren, ku po mbahej nën dyshimet për terrorizëm, për sulmin ndaj ndërtesës së Kuvendit, për të kundërshtuar marrëveshjen për Asociacionin.

LVV-ja ka këmbëngulur vazhdimisht që bëhet fjalë për vrasje.

Nëntogerja e Forcës së Sigurisë së Kosovës, Lirijona Bajraktari ka zënë vendin e parë në trajnimin ndërkombëtar ushtarak të mbajtur në Abu Dhabi të Emirateve të Bashkuara Arabe.

Ceremonia e trajnimit ushtarak organizuar nga Shkolla Ushtarake për Femra “Khawla Military School”, e që zgjati dy muaj u mbajt të premten.

Lidhur me këtë arritje të Kosovës ka shkruar edhe ambasadori i vendit tonë në Abu Dabi, Xhabir Hamiti.

“Fotoja e Nëntogerës sonë, Lirijona Bajraktari, teksa pranon çmimin e vendit të parë në kursin dymujor ushtarak në Abu Dhabi, është shpërndarë gjerësisht në mediat shtetërore dhe rrjetet sociale të Emirateve të Bashkuara Arabe. Krenarë me ty, Lirijona!”, shkroi ai.

Kosova në këtë aktivitet ndërkombëtar  u përfaqësua nga tre oficere të Forcës së Sigurisë së Kosovës, ndërsa Shkolla Ushtarake “Khaëla Military School” vepron nën patronazhin e Sheikha Fatima bint Mubarak.

Partia GUXO ka njoftuar se të premten, më 05.12.2025, ka nënshkruar Marrëveshjen e Koalicionit me Lëvizjen VETËVENDOSJE!, Partinë Aleternativa dhe Partinë Shqiptare Demokristiane për zgjedhjet e parakohshme nacionale.

Kjo marrëveshje vlerësojnë se shënon konsolidimin e një bashkëpunimi politik të përgjegjshëm, të qëndrueshëm dhe të orientuar drejt interesit qytetar.

“Me këtë marrëveshje, ne riafirmojmë përkushtimin tonë të palëkundur ndaj forcimit të shtetit, avancimit të demokracisë dhe ndërtimit të institucioneve që u shërbejnë qytetarëve me integritet, transparencë dhe përgjegjësi.” – thuhet në njoftimin e partisë, më 05.12.2025.

Ata kanë theksuar se Partia GUXO mbetet besnike ndaj misionit të saj për t’i sjellë politikës vlera të reja, profesionalizëm dhe qasje moderne në qeverisje.

Zgjedhjet e parakohshme nacionale do të mbahen më 28.12.2025.

Komisioni Qendror i Zgjedhjeve ka bërë të ditur se afati për verifikimin e Qendrës së votimit, rrjedhimisht mundësisë për ta ndërruar qendrën përfundon sot më 6 dhjetor.

Qytetarët e kanë sot afatin e fundit për verifikimin dhe mundësinë e ndërrimit të Qendrës së votimit.

“Deri më tani, 16.100 votues kanë aplikuar për të ndryshuar Qendrën e tyre të Votimit”, thuhej në njoftimin e KQZ-së.

Verifikimin e Qendrës së votimit mund ta bëni në https://qv.kqz-ks.org/sq/

Verifikimi dhe ndërrimi i Qendrës së Votimit mund të bëhet edhe në Zyrën e Komisionit Komunal të Zgjedhjeve në komunë.

KQZ bën të ditur se për më shumë informata mund të kontaktoni në WhatsApp/Viber: +383 46 13 00 13 si dhe mund të telefoni në 0800 55 555.

Të shtunën parashihet të mbajë mot kryesisht i vranët dhe vende-vende me riga shiu.

Sipas Institutit Hidrometeorologjik të Kosovës, temperaturat minimale do të lëvizin ndërmjet 3 deri 5 gradë Celsius, ndërsa maksimalet e ditës parashihen të lëvizin ndërmjet 6-9 gradë Celsius.

Derisa, pritet të fryjë erë nga veriperendimi me shpejtësi 1-6m/s.