Shefi i Zyrës së Bashkimit Evropian në Kosovë, Aivo Orav, ka zhvilluar të hënën një takim me katër kryetarët e rinj të komunave veriore në Zveçan, ku ka përshëndetur dorëzimin pa probleme të administrimit lokal, proces i cili, sipas tij, u realizua në përputhje të plotë me ligjin e Kosovës.

Në një postim në rrjetet sociale, Orav ka theksuar se bashkëpunimi ndërmjet institucioneve qendrore dhe atyre lokale mbetet thelbësor për funksionimin demokratik të komunave dhe për garantimin e stabilitetit në veri të vendit.

Ai ritheksoi rëndësinë e angazhimit konstruktiv nga të gjitha palët.

“Ritheksova nevojën për angazhim konstruktiv ndërmjet autoriteteve qendrore dhe lokale, si dhe mbështetjen e BE-së për realizimin e të drejtave të komuniteteve jo-shumicë, sipas Kushtetutës së Kosovës”, ka shkruar Orav.

Agjencia për Parandalimin e Korrupsionit (APK) dhe Forumi Konsultativ me Shoqërinë Civile, në shënim të Ditës Ndërkombëtare Kundër Korrupsionit, kanë kërkuar rikthim të fokusit në integritetin institucional, forcim të llogaridhënies dhe eliminim të praktikave korruptive në sektorin publik.

Drejtori i APK-së, Yll Buleshkaj në hapje të ngjarjes, tha se integriteti duhet të jetë detyrim i secilit institucion dhe se sinjalizuesit mbeten një shtyllë thelbësore në identifikimin e shkeljeve.

“Nuk besojmë se ka mekanizëm më të rëndësishëm se sinjalizimi, duke përfshirë sinjalizimin e brendshëm apo të jashtëm por edhe publik. Është angazhim i qartë i agjencisë, po besoj edhe i publikut që integriteti nuk është opsional, është detyrë e jona. Ne si agjenci do të vazhdojmë që të jemi të paanshëm, të vendosur dhe profesional në secilin vendim. Do të vazhdojmë që të insistojmë në përgjegjshmëri të zyrtareve publik dhe transparencë, ku korrupsioni nuk tolerohet, as në raste të mëdha e as në të vogla. Por, agjencia nuk mund të kryej këtë punë vet në qoftë se nuk bashkëpunon me gjithë ju”, ka thënë Buleshkaj.

Udhëheqësi i divizionit për integritet dhe strategji në APK, Burim Sadiku prezantoi raportin e monitorimit të planeve të integritetit në institucionet publike, duke theksuar nevojën për cilësi më të lartë të raporteve.

“Sot e kemi një rezultat që d.m.th. prej gjitha institucioneve, prej 140 institucioneve, kemi 125 institucione të cilat kanë plane të integritetit, por kjo çështje mund të ngritët më shumë…Shpresojmë në të ardhmen që çështja e indeksit të integritet në komuna në të zgjerohet dhe t’i aplikojnë të gjitha institucionet publike, për arsyeje se aty shohim cilësinë e raporteve publike…Sfida e parë është në njësinë e rreziqeve reale, kjo nuk vlen për të gjitha institucionet. Në njësinë e rreziqeve reale, sidomos në prokurim dhe burime njerëzore është mungesa e të dhënave që bënë njësia e rrezikut më shumë perceptim sesa analizë. Qasja formale, fatkeqësisht, sot kjo është më shumë për disa komuna kanë shkuar me një shabllon dhe pas monitorimit kemi pa se është njëfarë vlerësimi formal jopermbajtesor, por me rekomandimet tona, ato i kanë përditësuar…Fusha me rrezik të lartë vazhdon me qenë mbi bazën e analizave tona prokurimi publik, burimet njerëzore, menaxhimi i aseteve publike dhe institucionet që s’japin leje dhe licenca ”, ka thënë Sadiku.

Profesori universitar, Bekim Baliqi foli për sfidat e implementimit të rregulloreve dhe planeve të integritetit, duke theksuar se mungesa e burimeve e vështirëson zbatimin real të tyre.

“Si shumëçka në këtë vend, një strategji, një rregullore, shpeshherë ato mbesin si dokumente formale, për mungesa të ndryshme, njëra prej tyre janë zakonisht burimet njerëzore, që lidhen me burimet financiare. Gjithashtu mendoj që këto burime bëjnë shpeshherë që këto plane të mbesin për t’u raportuar”, ka thënë Baliqi.

Po ashtu, Javën Kundër Korrupsionit 2025, koalicioni i organizatave joqeveritare i përbërë nga Instituti i Kosovës për Drejtësi (IKD), Lëvizja FOL dhe Iniciativa për Progres (INPO), e kanë nis me grevë njëditore si formë proteste kundër korrupsionit dhe kundër politikave që po e paralizojnë funksionimin e shtetit./KP

Presidentja e Kosovës Vjosa Osmani do të zhvillojë takim në Prishtinë me homologun e saj nga Hungaria, Tamás Sulyok.

Takimi do të zhvillohet në orën 16:00, njofton Presidenca.

Mirëpo, sipas njoftimit të këtij institucioni, nuk do të ketë konferencë për media.

Mediat do të kenë mundësinë të marrin pamje vetëm nga pritja dhe në fillim të takimit.

Në qershor, Osmani kishte qëndruar në Budapest për disa ditë me ftesë të Sulyok.

Gjatë qëndrimit të saj atje, në një vizitë në ambientet e bibliotekës “Ervin Szabó” në Budapest, u inagurua një pjesë e kësaj biblioteke me emrin e ish-Presidentit Ibrahim Rugova.

Osmani ishte pritur me nderime ushtarake në Hungari. Poashtu, ishte takuar me kryetarin e Parlamentit të Hungarisë, László Kövér.

Hungaria është një nga vendet e para që ka njohur Pavarësinë e Kosovës.

Ambasada e Kosovës në Budapest zyrtarisht ka filluar punën në mars të vitit 2010.

Edhe pse Hungaria ka njohur Kosovën si shtet, kryeministri i tanishëm Viktor Orban mban raporte të mira me presidentin serb, Aleksandër Vuçiq.

Përfaqësues të Hungarisë kishin mbajtur qëndrim kundër anëtarësimit të Kosovës në Këshillin e Europës gjatë vitit të kaluar.

Zsolt Nemeth nga Hungaria si përfaqësues i Partisë Europiane Konservatore, tha se është kundër raportit që u prezantua më 16 prill 2024, nga raportuesja për Kosovë, Dora Bakoyannis i cili ishte në favor të anëtarësimit të Kosovë në Këshillin e Europës.

“Janë tri arsye pse nuk e mbështesim raportin. E para, Kosova nuk ka përmbushur zotimet, Asociacioni. E dyta është Serbia. Mohimi i interesave të Serbisë rrezikon stabilitetin” – kishte thënë ai.

Nemeth kishte deklaruar se arsyeja e tretë është se Këshilli i Europës shkon kundër parimeve për stabilitet nëse e pranon Kosovën pjesë të saj./KALLXO.com

Kosova është vendosur zyrtarisht nga Këshilli i Bashkimit Evropian në listën e vendeve të sigurta të origjinës, hap që do t’u mundësojë shteteve anëtare të përshpejtojnë procedurat e azilit për qytetarët që vijnë nga shtete ku konsiderohet se nuk ka rrezik të përndjekjes apo shkelje të rënda të të drejtave të njeriut.

Përfshirja e Kosovës, bashkë me Bangladeshin, Kolumbinë, Egjiptin, Indinë, Marokun dhe Tunizinë, u bë e ditur pas miratimit të qëndrimit të Këshillit për dy ligjet e reja të BE-së që prekin drejtpërdrejt politikat e azilit.

Në komunikatën e lëshuar nga Këshillit Evropian thuhet se ligjet e reja kanë për qëllim krijimin e procedurave më të shpejta dhe më efektive të azilit për ata që nuk kanë të drejtë të marrin mbrojtje brenda BE-së.

Sipas rregullave të reja, shtetet anëtare do të mund të refuzojnë një kërkesë për azil si të papranueshme në tre raste: kur ekziston një lidhje midis aplikuesit dhe vendit të tretë (tani jo më kriter i detyrueshëm), kur aplikuesi ka kaluar tranzit përmes vendit të tretë, kur ekziston një marrëveshje me një vend të tretë të sigurt për shqyrtimin e kërkesës për azil jashtë BE-së.

Koncepti i vendit të sigurt të origjinës u mundëson shteteve anëtare të përdorin procedura të përshpejtuara të azilit, përfshirë edhe në pikat kufitare apo zonat e tranzitit. Një vend përcaktohet si i sigurt vetëm nëse përmbush standarde të larta sigurie dhe mbron të drejtat themelore të qytetarëve të tij.

Për vendet kandidate për anëtarësim në BE, statusi i vendit të sigurt mund të pezullohet në raste konflikti të armatosur, vendosjeje të masave kufizuese ndaj të drejtave të njeriut ose rritje të lartë të përqindjes së vendimeve pozitive për kërkesat e azilit.

Komisioni Evropian do të monitorojë situatën dhe mund të pezullojë statusin e sigurisë për të gjithë vendin ose për pjesë të tij, nëse ka bazë të mjaftueshme./KOHA

Veprimtari dhe lobisti shqiptar në SHBA, Faton Bislimi ka bërë të ditur se qëndrimet e Shteteve të Bashkuara të Amerikës ndaj Kosovës janë zyrtarizuar përmes përfshirjes së tyre në draft-ligjin NDAA 2026 (Ligji për Autorizimin e Mbrojtjes Kombëtare), një nga ligjet më të rëndësishme të sigurisë kombëtare në SHBA.

Sipas Bislimit, drafti i NDAA-së, i cili ka kaluar në Senat dhe pritet të votohet edhe në Dhomën e Përfaqësuesve para se të dërgohet për dekretim në Zyrën Ovale, përmban një seksion të posaçëm që përcakton qartë politikën amerikane për Ballkanin Perëndimor, përfshirë Kosovën.

“Qëndrimet e Amerikës me interes për Kosovë janë kodifikuar me Ligjin NDAA 2026”, u shpreh Bislimi.

Ai tha se draft-ligji, me mbi 3000 faqe, përfshin çështje kyçe të sigurisë amerikane, nga pajisjet ushtarake e deri te strategjitë mbrojtëse, por për herë të parë është përfshirë edhe një seksion që kodifikon me ligj politikën amerikane ndaj Ballkanit Perëndimor dhe Kosovës.

Sipas Bislimit, NDAA 2026 përcakton se: “SHBA-të përkrahin Kosovën dhe vendet tjera të rajonit në rrugën drejt integrimit në NATO dhe BE, SHBA-të përkrahin dialogun Kosovë–Serbi të bazuar në njohje reciproke dhe SHBA-të nuk përkrahin ndryshim kufijsh, ndarje apo shkëmbim territoresh sipas vijave etnike”.

Bislimi e ka cilësuar këtë zhvillim si shumë të rëndësishëm për vendin.

“Ky është një lajm fantastik! Jam më shumë se krenar të shoh që mundi i shumë organizatave të komunitetit tonë në SHBA dhe përpjekjet tona të pareshtura për të ndihmuar Kosovën po japin rezultate” – ka shkruar Bislimi.

Ai theksoi se partneriteti me Shtetet e Bashkuara mbetet i palëkundur.

“Kosova asnjëherë s’ka humbë krah Amerikës. Sot më shumë se kurrë, angazhimi im vazhdon edhe më fuqishëm, bashkë me miq e dashamirë në DC e kudo në Amerikë për ta bërë Kosovën ashtu siç kanë ëndërruar shumë gjenerata para nesh — të fuqishme, demokratike, të zhvilluar, e në miqësi permanente me SHBA-të. Kosova mbi të gjitha — Kosova e Para!” – thekson Bislimi.

Kryetari i AAK-së, Ramush Haradinaj, ka vlerësuar lartë rolin historik të diasporës në mbështetje të Kosovës, duke e cilësuar atë si një forcë të pandashme nga vendi.

Në një pstim në Facebook, Haradinaj tha se diaspora ka qenë shtylla kryesore e Kosovës që nga vitet e rezistencës paqësore.

Ai theksoi se kontributi i diasporës ishte vendimtar edhe gjatë luftës.

“Diaspora ka qëndruar gjithmonë krah për krah me Kosovën! Në kohën e rezistencës paqësore, ata ishin hambari i Kosovës, mbështetja jonë ekonomike dhe morale. Gjatë luftës, diaspora ishte aktivisht e angazhuar, duke u bërë pjesë e përbërëse e luftës për liri dhe logjistikës së UÇK-së. Vëllezërit dhe motrat nga diaspora ishin zëri ynë në botë për të treguar vuajtjet dhe padrejtësitë ndaj Kosovës. Pas luftës, diaspora ka qenë bashkë me ne, në çdo hap të rindërtimit dhe zhvillimit të vendit. Diaspora dhe Kosova janë NJË, të pandashme!” – shkroi Haradinaj.

Kapiten Ymërdin Hasani, ka diplomuar në Kursin e Çështjeve Civile në Fort Bragg të Karolinës së Veriut në Shtetet e Bashkuara të Amerikës, në Qendrën dhe Shkollën e Luftës Speciale “John F. Kennedy”.

Sipas njoftimit nga Forca e Sigurisë së Kosovës, kapiten Hasani është shpërblyer me Medaljen për Arritje Ushtarake, e cila sipas FSK-së, i ndahet pjesëtarëve të cilët kanë shfaqur rezultate të larta gjatë trajnimit.

“Ky trajnim i specializuar përqendrohet në përgatitjen e oficerëve për bashkëpunim me komunitete lokale, vlerësim të nevojave civile dhe koordinim të projekteve që mbështesin stabilitetin dhe zhvillimin në zona operimesh. Përmes këtij kursi, kapiten Hasani ka fituar njohuri të avancuara në menaxhimin e situatave civile, bashkërendimin me institucione vendore dhe organizata partnere, si dhe në ndërtimin e urave të bashkëpunimit ndërmjet forcave ushtarake dhe popullsisë civile. Kapiten Hasani do t’i kthejë njohuritë e përfituara në shërbim të Kosovës, duke kontribuar drejtpërdrejt në zhvillimin dhe forcimin e kapaciteteve të Çështjeve Civile në Forcën e Sigurisë së Kosovës” – thuhet në njoftimin e FSKsë.