Presidentja e Kosovës, Vjosa Osmani priti të hënën në takim presidentin e Hungarisë, Tamás Sulyok.

Mediat u lejuan të marrin pamje vetëm gjatë pritjes dhe në fillim të takimit. Ndërkaq nuk është paraparë as konferencë për media pas përfundimit të takimit.

Ky është takimi i dytë mes Osmanit dhe Sulyokut. Osmani gjatë muajit qershor të këtij viti është pritur në takim zyrtar nga presidenti hungarez në Budapest.

Sot, komandanti i misionit të KFOR-it të udhëhequr nga NATO, gjeneralmajor Özkan Ulutaş, u takua me presidentin e Hungarisë, Tamás Sulyok, në selinë e KFOR-it në kampin Film City në Prishtinë.

Sipas KFOR-it, Sulyok shoqërohej nga zëvendësministri hungarez i Mbrojtjes, Tamás Vargas dhe ambasadori i Hungarisë në Kosovë, László István Dux.

“Gjeneralmajor Ulutaş dha një përditësim për situatën e sigurisë në Kosovë dhe në rajon dhe për përpjekjet e KFOR-it. Ai nënvizoi angazhimin e qëndrueshëm të KFOR-it për të kontribuar në sigurinë e qëndrueshme anembanë Kosovës. Ai gjithashtu përshëndeti hungarezët për kontributet e vazhdueshme dhe afatgjatë në përpjekjet e KFOR-it dhe në stabilitetin rajonal” – thuhet në njoftimin e KFOR-it.

Kryeministri në detyrë i Republikës së Kosovës, Albin Kurti, u takua mëngjesin e sotëm me autorin, gazetarin dhe producentin radiofonik francez, Philippe Collin, i cili shoqërohej nga ambasadori i Francës, Olivier Guerot.

Sipas një komunikate nga Zyra e Kryeministrit, ata diskutuan së bashku për historinë e letërsinë, dhe aktualitetin gjeopolitik e dinamikat sociale, posaçërisht në kontinentin evropian.

Siç bëhet e ditur në njoftim, Philippe Collin i dhuroi kryeministrit romanin e tij të publikuar vitin e kaluar me titull “Barmeni i Ritzit”, ku trajtohen ngjarje nga okupimi nazist i Francës gjatë Luftës së Dytë Botërore, bazuar në historinë e vërtetë dhe spektrin e shankistit Frank Mejer, nga hoteli Ritz në Paris.

Në fund thuhet se kryeministri e falënderoi për bisedën dhe librin, duke shprehur mirënjohjen për shkëmbimin e sotëm dhe vlerësimin për krijimtarinë dhe punën e tij.

Forca e Sigurisë së Kosovës njofton se ka përmbyllur me sukses garat tradicionale sportive të organizuara në kuadër të aktiviteteve për shënimin e “Ditës së Forcës”. Ceremonia përmbyllëse u zhvillua sot në kazermën “Adem Jashari” në Prishtinë, ku u shpallën fituesit e të gjitha disiplinave.

Para fillimit të ceremonisë, FSK njofton se u realizuan edhe takimet finale të garave, për të vazhduar më pas me ceremoninë e shpërndarjes së çmimeve.

Siç bëhet e ditur në njoftim, në këtë ceremoni i pranishëm ishte zëvendëskomandanti i Forcës së Sigurisë së Kosovës, gjeneral major Enver Cikaqi, si dhe oficerë e nënoficerë të Forcës së Sigurisë së Kosovës.

“Vendi i parë në futboll i takoi ekipit të KDS-së, në disiplinën e volejbollit vendin e parë e fitoi Regjimenti i Tretë i Këmbësorisë , në Shah më i miri u zgjodh OF1 Arsim Kelmendi, ndërsa në Kros në kategorinë e femrave vendin e parë e mori Ushtar i Klasit të Parë Edona Guri nga KDS, ndërsa në kategorinë e meshkujve vendi i parë i takoi Ushtar i Klasit të Parë, Leon Thaçi nga Regjimenti i Parë i Këmbësorisë” – thuhet në njoftim.

Sipas FSK-së, ky aktivitet ka për qëllim promovimin e shëndetit fizik, frymës sportive dhe forcimin e bashkëpunimit ndërmjet pjesëtarëve të Forcës.

Përditësimi i fundit i “Reporterëve pa Kufij”, nxjerr Kosovën relativisht dobët sa i përket renditjes për lirinë e medias.

Shtetet si: Norvegjia, Estonia, Holanda, Suedia, Finlanda dhe Danimarka, e kryesojnë listen.

Në këtë listë, shumë për të dëshiruar lë rajoni i Ballkanit Perëndimor.

Ky rajon mbetet pjesë e prekshme nga këto ndërhyrje, sidomos vendet si: Bosnja, Serbia dhe Kosova që renditen goxha dobët.

Kosova në renditje zë vendin e 99, ku më keq janë vetëm vendet si: Gjeorgjia, Turqia, Bjellorusia dhe Rusia, që janë krejt në fund të renditjes.

Hiç më mirë situate nuk është nëse e shohim në rrafshi global, perspektiva është edhe më alarmante.

Për herë të parë që nga fillimi i indeksit në vitin 2002, rezultati mesatar global i lirisë së shtypit ra nën 55, me mbi gjysmën e vendeve të klasifikuara si me kushte “të vështira” ose “shumë serioze” për gazetarinë.

Oda Ekonomike e Kosovës (OEK) ka njoftuar se ka dorëzuar kallëzim penal në Prokurorinë Speciale ndaj kryesuesit të Bordit të Zyrës së Rregullatorit për Energji (ZRRE), Ymer Fejzullahu, dhe anëtarëve të bordit, për moszbatim të vendimit të Gjykatës Supreme për çështjen e liberalizimit të tregut të energjisë të bizneseve.

Sipas OEK-ut, Supremja ka konstatuar qartësisht se procesi i liberalizimit të tregut të energjisë elektrike është zbatuar në kundërshtim me ligjin.

Në njoftimin e OEK-ut janë listuar 5 vepra penale që sipas tyre i kanë kryer Fejzullahu dhe anëtarët e bordit të ZRRE-së.

“Mos-ekzekutimin e vendimit gjyqësor”, “Keqpërdorimin e pozitës apo autoritetit zyrtar”, “Shkeljen e detyrimit zyrtar”, “Mashtrimin në detyrë” dhe “Cenimin e interesit ekonomik publik”, janë veprat penale që i ka listuar OEK-u.

“Ky veprim pason kërkesën e OEK-së drejtuar Bordit të ZRRE-së për reflektim dhe fillimin e zbatimit të aktgjykimit të Gjykatës Supreme, me qëllim kthimin e bizneseve të nxjerra me dhunë në tregun e lirë me çmimet e rregulluara. Megjithatë, Bordi i ZRRE-së ka vendosur të injorojë dhe keqinterpretojë këtë aktgjykim, duke dëmtuar bizneset dhe qytetarët e Kosovës, me fatura energjetike më të lartat në historinë e Republikës”, thuhet në njoftim.

Dorëzimi i kallëzimit thuhet se mbështetet në “aktgjykimin e formës së prerë të Gjykatës Supreme, dokumentet dhe komunikatat zyrtare të ZRRE-së, si dhe materialet që dëshmojnë dëmin ekonomik të shkaktuar”.