Bashkimi Evropian shpreh keqardhje të thellë për udhëtimin e udhëheqjes serbe në Moskë dhe pjesëmarrjen në shënimin e Ditës së Fitores në Luftën e Dytë Botërore – një ngjarje që Rusia, sipas Brukselit, e shfrytëzon për qëllime propagandistike.

Kjo është përgjigjja e Komisionit Evropian pas vizitës së presidentit të Serbisë, Aleksandar Vuçiq, në Rusi, ku është takuar me presidentin rus, Vladimir Putin.

“Nga Serbia pritet të dëshmojë përkushtim të besueshëm ndaj vlerave evropiane dhe të na bindë për orientimin e saj strategjik drejt Bashkimit Evropian”, thuhet në një përgjigje me shkrim të një zëdhënësi të Komisionit Evropian për Radion Evropa e Lirë.

KE-ja nënvizon se të gjithë aktorët duhet të përmbahen nga çdo veprim që mund të legjitimojë agresionin e Putinit kundër Ukrainës.

“Nëse dikush dëshiron të tregojë mbështetje për paqen, vendi i duhur për këtë më 9 maj është Kievi, jo Moska”, thuhet në përgjigje.

BE-ja thekson se ka qenë “krejtësisht e qartë” me partnerët e saj, përfshirë edhe vendet kandidate si Serbia.

“Marrëdhëniet me Rusinë nuk mund të vazhdojnë si zakonisht me regjimin e Putinit, në kohën kur agresioni i tij ndaj Ukrainës është i paprovokuar dhe i pajustifikueshëm”, përfundon reagimi i Komisionit Evropian.

Vuçiq mbërriti në Moskë në prag të përvjetorit të 9 majit dhe takimi i tij me Putinin është i pari që nga nisja e pushtimit rus të Ukrainës në shkurt të vitit 2022.

Ai deklaroi para gazetarëve në Moskë se Serbia do të vazhdojë rrugën e saj evropiane dhe shtoi se “nëse dikush duhet ta paguajë çmimin e kësaj vizite, ai do të jem unë, jo shteti”.

Vuçiq tha gjithashtu se pret “reagime shumë të ashpra” nga BE-ja për shkak të kësaj vizite, por se përgjigjja e tij do të jetë “e matur dhe serioze”. Ai paralajmëroi se me Putinin do të diskutojë, ndër të tjera, për marrëveshjen e furnizimit me gaz dhe për Industrinë e Naftës së Serbisë, e cila është në pronësi ruse dhe gjendet nën sanksione amerikane.

Institucionet evropiane kishin reaguar edhe më parë ndaj paralajmërimeve për udhëtimin e Vuçiqit në Moskë. Komisionarja për Zgjerim e BE-së, Marta Kos, gjatë një vizite në Beograd në fund të prillit, tha se vendimi për të udhëtuar në Moskë i takon presidentit të Serbisë, por paralajmëroi se nëse ai e realizon atë, “do ta ketë shumë më të vështirë që ta ndihmojë Serbinë të mbetet e orientuar fort në rrugën evropiane”.

Serbia është në proces negociatash për anëtarësim në BE që nga viti 2014, por nuk ka hapur asnjë kapitull të ri që nga dhjetori i vitit 2021, për shkak të refuzimit për të harmonizuar politikën e jashtme me atë të BE-së dhe për të vendosur sanksione ndaj Rusisë.

Pavarësisht paralajmërimeve të Brukselit, autoritetet në Beograd kanë vazhduar të ruajnë marrëdhënie të ngushta me Moskën./REL/

Organizata e Veteranëve të Luftës së UÇK-së, ka reaguar pasi përfaqësuesve të saj iu refuzuan vizitat te të burgosurit në Hagë.

“Me zemërim të thellë njoftojmë opinionin publik se Dhomat e Specializuara në Hagë, përmes vendimeve të pashembullta dhe të njëanshme, kanë refuzuar dy kërkesa zyrtare për vizita të përfaqësuesve të OVL UÇK-së te bashkëluftëtarët tanë të burgosur”, thuhet në reagimin e OVL-UÇK-së.

Nga organizata është treguar se vizita e parë ishte kërkuar më 21 prill 2025 nga Fehmi Gucati, Hysni Gucati dhe Bedri Ahmeti. Ata donin t’i vizitonin Pjetër Shalën, Jakup Krasniqin dhe Sali Mustafën. Por, kërkesa iu refuzua. E njëjtë iu refuzua edhe më 14 maj, vizita te Hashim Thaçi dhe Kadri Veseli.

“Gjithashtu, jemi të informuar se edhe z. Rexhep Selimi ka bërë kërkesë për të lejuar këtë vizitë. Kjo kërkesë është ende në procedurë, por ne e dimë mirë çfarë përgjigjeje do të vijë një tjetër JO, e padrejtë dhe e padenjë. Kjo qasje përjashtuese, përçmuese dhe selektive, është dëshmi e qartë se Dhomat e Specializuara nuk kanë për qëllim drejtësinë, por poshtërimin e përfaqësuesve të luftës çlirimtare të Kosovës. Refuzimi i vizitave nuk është veçse një përpjekje për ta izoluar luftën tonë të drejtë edhe në kujtesë. Por kjo s’do të ndodhë kurrë! UÇK-ja nuk izolohet, nuk përkulet dhe nuk hesht!” – thuhet në reagim.

OVL-UÇK ka kërkuar që urgjentisht të tërhiqen dhe “të ndalet trajtimi çnjerëzor e politik ndaj bashkëluftëtarëve tanë”./KOHA/

Presidenti i Këshillit Evropian, Antonio Costa, do të vizitojë Kosovën javën e ardhshme.

Kjo do të jetë vizita e tij e parë në kuadër të një turneu ballkanik, që prej marrjes së detyrës në krye të Bashkimit Evropian.

Vizita në Prishtinë është e planifikuar për të mërkurën, më 14 maj. Një ditë më herët, ai do të qëndrojë në Beograd — vizitë që vjen pak ditë pas udhëtimit të presidentit serb në Rusi, pavarësisht vërejtjeve të Brukselit lidhur me pjesëmarrjen e tij në ceremoninë e Ditës së Fitores në Moskë.

Zyrtarët evropianë e arsyetojnë vendimin për të mos anashkaluar kryeqytetin serb me angazhimin e institucioneve dhe mbështetjen për të gjitha vendet e rajonit. Sipas tyre, puna dhe zhvillimet në shtetet e Ballkanit Perëndimor më vonë reflektohen përmes vendimeve të marra në Këshillin e BE-së, raporton për televizionin publik, Gjeraqina Tuhina nga Brukseli.

Turneu që Costa do të zhvillojë në të gjitha shtetet e Ballkanit Perëndimor ndodh në prag të samitit të Bashkësisë Politike Evropiane, i cili do të mbahet në fund të javës së ardhshme në Tiranë.

Bashkësia Politike Evropiane është një nismë pan-evropiane që daton nga viti 2022, e themeluar me iniciativën e presidentit francez Emmanuel Macron.

Ajo bashkon mbi 40 liderë nga shtetet e kontinentit evropian dhe institucionet e BE-së.

Ky forum shërben për të diskutuar të ardhmen e përbashkët të Evropës, çështjet e sigurisë dhe mbrojtjen e demokracisë.

Presidentja e Kosovës, Vjosa Osmani, pritet të thërrasë në takim krerët e partive parlamentare pas ngërçit politik në vend. Kështu ka bërë të ditur këshilltari për media i presidentes, Bekim Kupina.

Ai ka thënë se kabineti i presidentes do të kontaktojë së shpejti partitë për të caktuar një kohë të përshtatshme për takimin gjithëpërfshirës.

Kupina ka theksuar se presidentja Osmani tashmë ka shprehur gatishmërinë e plotë që nga data 16 prill 2025 që t’i presë liderët e partive politike në rast se ata e shohin të nevojshme një gjë të tillë.

“Presidentja e Republikës së Kosovës, Vjosa Osmani, tashmë ka shprehë gatishmërinë e plotë, që nga data 16 prill, që t’i presë liderët e partive politike në rast se ata e shohin të nevojshme një gjë të tillë. Deri dje nuk kemi pasur një kërkesë të tillë. Tani që disa parti kanë kërkuar që Presidentja t’i thërrasë në takim të përbashkët të liderëve, Kabineti i Presidentes do të kontaktojë së shpejti me partitë politike për të parë se cila është koha e përshtatshme për të gjithë, për një takim të tillë gjithëpërfshirës”, ka potencuar Kupina.

Presidentja e Kosovës, Vjosa Osmani, ka uruar Papën e sapozgjedhur, Papa Leo XIV, me rastin e emërimit të tij në krye të Selisë së Shenjtë.

Në një postim në platformën X, Osmani ka shprehur urimet më të sinqerta në emër të popullit të Republikës së Kosovës, duke vënë theksin në rëndësinë e udhëheqjes shpirtërore të Papës në një periudhë sfiduese për njerëzimin.

“Zëri i tij do të ketë peshë të madhe në një kohë kur bota dëshiron paqe, unitet dhe dhembshuri. Uroj që pontifikati i tij të karakterizohet nga qartësia morale, udhëheqja e palëkundur dhe përkushtimi i thellë ndaj dinjitetit të çdo njeriu,” ka shkruar Osmani.

Ajo ka theksuar gjithashtu rolin e rëndësishëm që Selia e Shenjtë ka pasur historikisht në promovimin e paqes dhe solidaritetit mes popujve, duke shprehur shpresën për thellimin e marrëdhënieve ndërmjet Republikës së Kosovës dhe Vatikanit.