Komisioni Qendror i Zgjedhjeve njofton se është përmbyllur afati për partitë politike për të njoftuar se do të kërkojnë certifikim për pjesëmarrje përmes koalicionit në Zgjedhjet Lokale për Kryetarë të Komunave dhe për Kuvende Komunale, të cilat do të mbahen më 12 tetor 2025.

Në njoftimin e bërë për media, gjatë periudhës 15 ditore (9 qershor – 23 qershor), në KQZ, respektivisht Zyrën për Regjistrim, Certifikim dhe Kontrollin Financiar të Subjekteve Politike këto parti politike kanë njoftuar se do të kërkojnë certifikim përmes koalicionit:

 “Koalicija Vakat”, i përbërë nga partitë politike Demokratska Stranka Bošnjaka (DSB) dhe Demokratska Stranka Vatan (DSV) dhe

Koaliconi “SDU-NAŠA (NAŠA SDU)”, i përbërë nga partitë politike Socijaldemokratska Unija dhe Naša Inicijativa, i formuar vetëm për komunën e Prizrenit.

Gjithashtu, në të njëjtën kohë është përmbyllur edhe afati për partitë politike për deklarim të mospjesëmarrjes në Zgjedhjet Lokale për Kryetarë të Komunave dhe për Kuvende Komunale.

Gjatë kësaj periudhe, këto parti politike kanë njoftuar se nuk do të garojnë në zgjedhje:

 Organizata Balli Kombëtar Demokrat (OBKD);

Partia Demokratike e Diasporës (PDD);

Partia e Drejtësisë (PD);

Kosovaki Nevi Romani Partia (KNRP) dhe

Partia Balliste (PB).

Komisioni Qendror i Zgjedhjeve njofton subjektet politike (partitë politike, koalicionet, kandidatët e pavarur dhe iniciativat qytetare), të cilat duan të marrin pjesë në Zgjedhjet Lokale për Kryetarë të Komunave dhe për Kuvende Komunale, se afati i aplikimit për certifikim dhe për dorëzimin e listës së kandidatëve, do të fillojë më 26 qershor 2025.

Për ditën e sotme parashikohet të mbajë mot me diell gjatë gjithë ditës.

Sipas Institutit Hidrometeorologjik të Kosovës, temperatura minimale do të sillen ndërmjet 10 dhe 14°C, kurse ato maksimale pritet të arrijnë nga 28 deri në 32°C.

Era do të fryjë nga veriperëndimi me shpejtësi 1-3 m/s.

Kryeministri në detyrë, Albin Kurti, mori pjesë në pritjen e organizuar me rastin e shënimit të Ditës Kombëtare të Luksemburgut.

“Vendet tona ndajnë një miqësi të veçantë. Dukati i Madh i Luksemburgut ishte ndër të parët që njohu pavarësinë e Kosovës, vetëm disa ditë pas shpalljes në shkurt të vitit 2008. Kjo mbështetje e shpejtë dhe e palëkundur është diçka që do ta kujtojmë gjithmonë me mirënjohje të thellë”, tha Kurti në fjalën e tij, gjersa uroi partnerët tanë të Luksemburgut në festimin e ditës së tyre kombëtare, njofton Kryeministria.

Në vijim, ai theksoi rolin e Luksemburgut në zhvillimin e Kosovës, në fusha kyçe si arsimi, trajnimi profesional dhe qasja në punësim, zhvillimi lokal, kujdesi shëndetësor, shoqëria civile, mbrojtja e mjedisit dhe iniciativat sociale. Luksemburgu ka kontribuar gjithashtu në zhvillimin e ndërmarrjeve të vogla dhe të mesme dhe ka ofruar ndihmë teknike të vlefshme si në sektorin financiar ashtu edhe në rrugën tonë drejt integrimit evropian.

“Ky nivel angazhimi e bën Luksemburgun donatorin më të madh për Kosovën për kokë banori nga vendi donator”, shtoi kryeministri në detyrë.

Sipas njoftimit, Kurti foli edhe rreth fuqizimit të partneritetit mes dy vendeve tona gjatë mandatit të qeverisë sonë, ku në verën e vitit 2022 nënshkruam Memorandumin e tretë të Mirëkuptimit, që mbulon periudhën 2023 deri në 2025. Kjo marrëveshje i ka dhënë përparësi shëndetësisë, tranzicionit energjetik dhe zbutjes së ndryshimeve klimatike, trajnimit profesional, rritjes gjithëpërfshirëse dhe të qëndrueshme dhe mbështetjes së vazhdueshme për shoqërinë civile.

“Angazhimi i vazhdueshëm i Luksemburgut ka ndihmuar në forcimin e demokracisë në Kosovë, një shtyllë themelore ndërsa ecim përpara në rrugën tonë evropiane dhe euroatlantike. Ne besojmë se angazhimi ynë për qeverisje të mirë dhe progres na bën një partner të natyrshëm dhe të merituar për integrimin në BE dhe NATO”, tha Kurti.