6 studentë të nivelit Master të Fakultetit Juridik të Universitetit “Ukshin Hoti” në Prizren po ankohen se nuk dolën përfitues të bursës elitare të Ministrisë së Arsimit edhe pse pretendojnë se i plotësojnë kriteret.

Fatlum Berisha, Leutrim Braha, Imran Sejfullahu, Shkelzen Selmanaj, Endrit Berisha dhe Edon Mazreku janë studentët ankues dhe studiojnë Qeverisje Demokratike dhe Sundim i Ligjit.

Sipas tyre, ata janë përfitues të bursës elitare të vitit akademik 2025/2026 pasi i kanë përfunduar me kohë të gjitha provimet, kanë notën mesatare prej 9.0 e tutje, kanë aplikuar me kohë për bursën, por vetëm nuk e kanë të përfunduar temën e diplomës. Të gjitha këto i kanë dëshmuar për KALLXO.com.

Në një sqarim të Ministrisë së Arsimit të dhënë për Fakultetin Juridik në Prizren, të datës 20.11.2025, për pesë prej studentëve ankues, duke mos përfshirë Leutrim Brahën, është thënë se sipas pasqyrës së notave iu mungojnë 10 kredi, e duhet t’i kenë 60 kredi.

Sipas dokumenteve të studentëve, ata i kanë 50 kredi për 10 provimet e përfunduara. Tema e diplomës iu kushton atyre 10 kredi, por konkursi për bursat elitare i datës 03.10.2025 nuk përcakton numrin e kredive, por kërkon që t’i kenë të përfunduara të gjitha provimet e vitit akademik me kohë, si dhe të kenë të përfunduar vitin e parë.

Ministrisë i ka replikuar Muharem Faiku, dekan i Fakultetit Juridik në Universitetin “Ukshin Hoti”, më 21.11.2025, duke thënë se në udhëzimin administrativ Nr.20/2023 në të cilin bazohet edhe skema e bursës elitare nuk përcaktohet askund kriteri i kredive dhe që tema e diplomës nuk hyn në kuadër të provimeve.

Dekani Faiku i ka thënë KALLXO.com se studentët nuk kanë mundësi ta përfundojnë temën e diplomës brenda vitit akademik, pasi zgjatë disa muaj.

“Diplomimi zgjatë tash më shumë sepse janë të parapara ato, publikimi i temës diplomës, e ka një procedurë që zgjatë, që mund të shkojë disa muaj të zgjatë” – tha Faiku përmes telefonit, më 08.12.2025.

Ai ka treguar se për herë të parë e kanë drejtimin e Juridikut në nivelin Master në Universitet.

“Ne mendojmë që duhet me pranu kjo Ministria, sepse brenda afatit këta d.m.th në afatin e rregullt kanë bërë përfundimin, jo përfundimin e studimit, po i kanë dhënë provimet brenda afatit të kërkuar me ligj.” – ka thënë ai, kur u pyet nëse Ministria e Arsimit duhet t’ua ndaj bursat studentëve.

Fatlum Berisha dhe Edon Mazreku kanë treguar se janë ankuar individualisht më 19.11.2025 në Ministri të Arsimit.

Pastaj, menaxhmenti i Fakultetit Juridik, më 19.11.2025, ia ka përcjellë Arbërie Nagavcit, ministres në detyrë të Arsimit, një ankesë grupore të studentëve, ku nuk shkruan edhe emri i Leutrim Brahës. Por, Braha ishte ankuar individualisht më 25.11.2025.

“Konsiderojmë që na është bërë e padrejtë nga ana e komisionit përzgjedhës me rastin e përjashtimit tonë nga lista e studentëve përfitues të bursave sipas thirrjes, prandaj kërkojmë nga ju që të na aprovoni këtë ankesë, dhe të obligoni MASHTI-n që të ndërmarr të gjithë hapat e nevojshëm për aprovimin e aplikacionit tonë dhe përfshirje në listën përfundimtare të studentëve të cilët janë përfitues të bursës elitare sipas konkursit.” – thuhet në ankesën grupore të studentëve.

Vlerësimi i Ministrisë së Arsimit për bursat elitare u bë lajm edhe një javë më parë kur KALLXO.com raportoi për 22 studentë të Fakultetit të Mjekësisë të Universitetit të Prishtinës që dëshmuan se i plotësojnë po ashtu kriteret, por nuk janë fitues të bursës.

E Ministria e Arsimit nuk ka kthyer përgjigje në pyetjet e KALLXO.com se pse vlerësuan që këta studentë të Prizrenit e Prishtinës të mos jenë përfitues të bursës.

KALLXO.com e ka telefonuar disa herë ministren Nagavci dhe i ka shkruar mesazh, më 09.12.2025, për ta pyetur për ankesat e studentëve për bursa elitare, por nuk e ka hapur telefonin dhe as s’ka kthyer përgjigje.

22 studentët e Mjekësisë po ashtu kanë problemin me kredi, pasi nuk i figurojnë kreditë e një lënde për të cilën ende nuk janë vlerësuar, pasi është lëndë trisemestriale.

Konkursi për bursat ka qenë i hapur nga data 03.10.2025 deri më 18.10.2025, në ora 16:00./KALLXO.com

Një person është gjetur pa shenja jete ditën e djeshme në një lokal, në Prizren.

Sipas raportit 24-orësh, ekipi i urgjencës ka dalë menjëherë në vendin e ngjarjes dhe ka konstatuar vdekjen e viktimës.

Ndërsa rasti është iniciuar si hetim i vdekjes.

“Me urdhër të prokurorit trupi i pajetë është dërguar në IML për obduksion”, tha policia.

Kompania për Distribuimin e Energjisë Elektrike në Kosovë (KEDS) ka njoftuar se të martën, më 09.12.2025, do të kryhen punime të domosdoshme për siguri të sistemit energjetik.

Si rezultat i kësaj, në disa lokalitete do të ketë ndërprerje të rrymës.

Nga TS 110/35/10 kV Theranda do të ndërprehet:

Dalja 10[kV] Peqani (kodi: 32000007) nga ora 10:00 deri 14:00

Vendet: Peqan, Sllapuzhan, Bllacë, Duhël, Nishor, Kosterrc, Breshancë, Semetishtë, Gurthyesi Destani Peqan,N.T.P.Kroni Bllacë. Dhe Pompat e benzinës Bes co.

Arsyeja: Ndërprerje për siguri, vendosja e ndarësit linjor.

Punime në projekte investive

1.Nga NS 110/10 [kV] Theranda do të ndërprehet:

Dalja 10[kV] Gjinovci (kodi: 32000003) nga ora 08:00 deri 08:30 dhe nga ora 16:30 deri 17:00

Vendet: fshatrat: Gjinoc, Greikoc, Leshan (një pjesë), Sallagrazhdë, Shirokë (një pjesë), Topliqan (një pjesë) dhe Gelancë.

Arsyeja: Krijimi i kushteve të punës pa tension, manipulim me ndarësit e tensionit të mesëm.

2.NS 110/10 [kV] Theranda:

Nga  Dalja 10[kV] Gjinovci do të ndërprehen nga ora 08:00  deri 17:00

këto nënstacione:

TS Sallagrazhdë lagjja e Dollocve me kod 32000003038

TS 32000003028 Haliti Mushtisht

TS 32000003059 Skender Kamer Alija NPN “AL&Plast Skenderi”,S=100 kVA

TS 32000003024 pompa Rexhep Shala

TS 32000003062 Visar Halitjaha “Dini”,S=100 kVA

TS 32000003046 Noli-Fadil Mustafa

Vendet: lagjja e Dollcëve, një pjesë Mushtishtit, NPN “AL&Plast Skenderi, Pompa Rexhep Shala, “Dini”, Noli

Arsyeja: Punime në rrjet projekte investive.

Shumica e popullatës kanë hequr dorë nga ngrohja me dru. Tashmë hapësirat e druve, që në dimrat e kaluar mbusheshin me klientë, janë të zbrazura. Drushitësit ankohen se bizneset e tyre janë drejt mbylljes.

Dimrat e butë e ngrohja me rrymë kanë çuar drejt krizës fushat e druve në Prizren. Sahit Bajrami nga Pirana thotë se ka 26 vjet që biznesin e tij e ushtron me shitjen e druve, por këtë vit ai thotë se ka arritur në pikën më të ulët të shitjes.

“Jemi para mbylljes si biznes, total jemi para mbylljes, do të thotë në të ardhmen, nëse vazhdon kësisoji, atëherë duhet me e mbyll. Këtë vit po e them 70% ka ra puna, plus problemin më të madh e kemi se as letrat nga ana e pylltarisë nuk janë lëshuar”, tha Sahit Bajrami, drushitës.

Sipas Sahit Bajramit, banorët që jetojnë në qytet, kanë më shumë interes të blejnë dru, sesa ato në fshatra.

“Në fshat janë bërë ma zotni, nëse i ka marrë përpara 10 metra, tash i merr 5, nëse i ka marr 5 tash i merr 2, do të thotë s’ka asgjë. Unë përpara kam pagua 50, 60 deri në 70 mijë euro TVSH shtetit, tash jam në bllokadë”, tha Sahit Bajrami, drushitës.

Në një tjetër biznes të këtij lloji, hallet janë pothuajse të njëjta. Daim Ukaj, që për dekada merret me blerjen dhe shitjen e druve, thotë se këtë vit veç 30% të druve ka arritur t`i shesë, ndërsa ky vit është i fundit me këtë biznes familjar.