Asociacioni i Komunave të Kosovës (AKK) ka njoftuar se do të jetë partner në projektin “Kosovo Energy Project”, një investim mbi 8 milionë euro nga Gjermania dhe Danimarka, që do të implementohet deri në vitin 2028.

Sipas AKK-së, projekti synon të mbështesë komunat në tranzicionin drejt energjisë së pastër dhe sjell përfitime të drejtpërdrejta për infrastrukturën lokale dhe efikasitetin e energjisë.

Nga ky projekt, thuhet se komunat e Kosovës do të përfitojnë:

• Hartimin dhe zbatimin e planeve moderne të energjisë dhe klimës (MECAP) me asistencë teknike dhe softuer profesional.
• Ngritjen e kapaciteteve të stafit komunal në standardet e eficiencës energjetike.
• Mekanizma të rinj financiarë për investime në ndërtesa publike dhe objekte kolektive, në bashkëpunim me KEEF.
• Integrim të teknologjive solare dhe masave të eficiencës në infrastrukturën komunale.
• Promovimin e përfshirjes së grave në sektorin e energjisë përmes trajnimeve dhe programeve praktike.

“Roli i AKK-së në këtë projekt do të përfshijë koordinimin, mbështetjen teknike dhe shkëmbimin e përvojave ndërmjet komunave. Ky investim konsiderohet një hap i rëndësishëm drejt energjisë së pastër, kostove më të ulëta dhe komunave më të qëndrueshme në të gjithë Kosovën” – thekson AKK.

Zëvendësministri në detyrë i Punëve të Jashtme dhe Diasporës, Kreshnik Ahmeti, ka pritur në takim zëvendësdrejtorin për Evropën Jugore dhe Qendrore në Departamentin e Shtetit të SHBA-së, Lyn Debevoise.

Sipas njoftimit të MPJD-së, gjatë takimit, zëvendësministri Ahmeti u njoftua me prioritetet e SCE për Kosovën dhe rajonin, ndërsa theksoi progresin e arritur dhe prioritetet e Qeverisë së Republikës së Kosovës, veçanërisht në fushat e diplomacisë, ekonomisë dhe mbrojtjes.

Në njoftim thuhet se ai gjithashtu informoi z. Debevoise për shqetësimet lidhur me veprimet e vazhdueshme destabilizuese të Serbisë, si dhe për gjendjen e rëndë të shqiptarëve në Preshevë, Medvegjë dhe Bujanoc.

Në takim u vlerësua angazhimi i përbashkët për forcimin e mëtejmë të marrëdhënieve dypalëshe ndërmjet Republikës së Kosovës dhe Shteteve të Bashkuara të Amerikës.

Zëvendësministri Ahmeti dhe zëvendësdrejtori Debevoise ripohuan se Kosova dhe SHBA-ja ndajnë prioritete të përbashkëta në forcimin e stabilitetit rajonal, promovimin e vlerave demokratike dhe thellimin e mirëkuptimit të ndërsjellë, duke u mbështetur mbi miqësinë e qëndrueshme dhe partneritetin strategjik ndërmjet dy vendeve.

Organizatorët e protestës së 13 dhjetorit në Shkup, thonë se të shtunën përmes një tubimi paqësor do të kërkojnë lirimin e ish-krerëve të Ushtrisë Çlirimtare të Kosovës, të cilët sipas tyre, padrejtësisht po mbahen në Gjykatën Speciale në Hagë.

Xhavit Jashari nga OVL-UÇK tha se kjo gjykatë përmes bashkëpunimit me Prokurorinë serbe, me këtë gjykimi po tenton të njollosë luftën e drejtë të UÇK-së.

“Qëllimi i jonë i vetëm është që të kërkojmë drejtësi dhe të solidarizohemi me Hashim Thaçin, Kadri Veselin, Jakup Krasniqin, Rexhep Selimin dhe të gjithë të tjerët që padrejtësisht po mbahen në Gjykatën Speciale në Hagë. Ne do t’i adresojmë kërkesat tona të drejta dhe të ligjshme dhe ajo e përgjithshmja është që të kërkojmë krerët të lirohen”, tha mes tjerash Xhavit Jashari, kryetar i Shoqatës së Familjeve të Dëshmorëve të Luftës së UÇK-së.

Ndërsa Bujar Dardhishta nga Këshilli Organizativ i protestës në Shkup, tha se nuk presin të kenë probleme për të marrë leje për mbajtjen e protestës.

Shefi i Zyrës së Bashkimit Evropian në Kosovë, Aivo Orav, ka bërë të ditur se në Prishtinë ka mbërritur raportuesi për Kosovën në Parlamentin Evropian, Riho Terras.

Në një njoftim në platformën “X”, Orav tha se pati nderin ta presë Terrasin në mëngjesin e sotëm, para takimeve që ai do të zhvillojë me përfaqësues të ndryshëm institucionalë dhe politikë në vend.

“E mirëprita këtë mëngjes në Prishtinë Riho Terrasin, raportues për Kosovën në Parlamentin Evropian, para takimeve të tij me shumë bashkëbisedues. Angazhimi i BE-së me Kosovën, si në nivel lokal ashtu edhe nga Brukseli, mbetet i fortë si gjithmonë, me mundësi të reja në horizont, përfshirë Planin e Rritjes”, ka shkruar Orav.

Welcomed @RihoTerras, @Europarl_EN Rapporteur for Kosovo, this morning in Pristina, ahead of his meetings with numerous interlocutors.
🇪🇺’s engagement with 🇽🇰, both locally and from Brussels, remains strong as ever, with new opportunities within reach, including the #GrowthPlan. pic.twitter.com/epxP88uOBA

— Aivo Orav (@AivoOrav) December 9, 2025

Komisioni Qendror i Zgjedhjeve do të ndërmarrë të gjitha veprimet e nevojshme për zbatimin e vendimit të Gjykatës Supreme dhe të Panelit Zgjedhor për Ankesa dhe Parashtresa lidhur me hapësirat shtesë për votim jashtë përfaqësive diplomatike.

Zëdhënësi i KQZ-së, Valmir Elezi, në pyetjen se çfarë do të bëjë ky institucion pas vendimit të Gjykatës Supreme që ka hedhur poshtë vendimin e KQZ-së për organizimin e votimit jashtë përfaqësive diplomatike, më konkretisht në 10 Qendra Votimi.

“Komisioni Qendror i Zgjedhjeve ka pranuar Aktgjykimin e Gjykatës Supreme, përmes të cilit konfirmohet vendimi i PZAP-it për çështjen e 10 Qendrave të Votimit të planifikuara nga KQZ që të hapen në hapësira shtesë, jashtë përfaqësive diplomatike sipas propozimit të MPJD-së. KQZ do të ndërmarrë të gjitha veprimet e nevojshme për zbatimin e këtyre vendimeve”, tha Elezi.

Më 26 nëntor 2025, KQZ kishte marrë vendim për miratimin e 50 Qendrave të Votimit në përfaqësi diplomatike të vendosura në 36 shtete për të mundësuar votimin e 63 mijë votuesve dhe 10 Qendra të Votimit në hapësira shtesë, jashtë përfaqësive diplomatike, sipas propozimit të MPJD-së. Lokacionet shtesë përfshijnë 10 Qendra të Votimit (Gjermani 5; Zvicër 3, Mbretëri e Bashkuar 1 dhe ShBA 1) me gjithsej 43 vendvotime dhe me numër maksimal të votuesve që mund të regjistroheshin për të votuar 41 mijë./Sinjali

Në një moment historik për kulturën shqiptare, arti i të luajturit, kënduarit dhe ndërtimit të Lahutës është shpallur zyrtarisht pjesë e listës së trashëgimisë kulturore jomateriale të UNESCO-s për mbrojtje urgjente. Lajmin e bëri të ditur Kryeministri Edi Rama përmes një postimi në rrjetet sociale, duke e cilësuar si “moment krenarie për kulturën dhe identitetin shqiptar”.

Çfarë është Lahuta? Lahuta është një instrument kordofon tradicional, me një tel, i përdorur në rajonin Dinarik të Evropës Juglindore dhe në gjeografinë shqiptare gjendet në Malësi të Madhe, Malësi të Gjakovës, Dukagjin, Plavë, Guci, Rugovë, Krajë, Postribë, Pukë, Kukës, Lezhë, Krujë dhe Kosovë.

Instrumenti përbëhet nga një kasë druri të zgavruar dhe një hark (argec) që prodhon tingujt karakteristikë. Lahuta lidhet ngushtë me këngët epike të Kreshnikëve dhe përdoret tradicionalisht nga rapsodët për të përcjellë histori heroike, ngjarje historike dhe vlera të trashëgimisë kombëtare.

Rëndësia kulturore dhe sociale Lahuta ka shërbyer si mjet për ruajtjen e traditës, kultit të të parëve dhe identitetit shqiptar. Sot instrumenti përdoret në spektakle publike dhe festime kulturore, duke ruajtur lidhjen me këngët epike dhe legjendat historike. Përfshirja e Lahutës në listën e UNESCO-s do të lehtësojë promovimin e saj në shkallë ndërkombëtare dhe mbrojtjen e traditës shqiptare për brezat e ardhshëm.

Citat nga Kryeministri Edi Rama “LAHUTA, PJESË E UNESCO-s. Lahuta është shpallur zyrtarisht pasuri e trashëgimisë kulturore jomateriale në listën e UNESCO-s, për mbrojtje urgjente,” shkruan Rama në postimin e tij.

Ky njohje ndërkombëtare përforcon rolin e Lahutës si simbol të identitetit dhe kulturës shqiptare, duke e bërë atë pjesë të pasurisë së përbashkët kulturore të njerëzimit./NOA.al

Kryeministrti në detyrë i Kosovës, Albin Kurti, në një postim në Facebook, ka rikujtuar se nga muaji i ardhshëm paga minimale do të rritet në 425 euro bruto nga 350 euro sa është aktualisht. Ndërkaq thekson se nga 1 korriku fillon zbatimi i fazës së dytë ku paga minimale bëhet 500 euro, siç është paraparë me vendimin e marrë nga Qeveria në detyrë.

Sipas tij, rreth 150 mijë punëtorë të sektorit privat do të përfitojnë nga kjo rritje.

“Nga muaji i ardhshëm paga minimale bëhet 425 euro bruto nga 350 euro sa është tash. Kurse nga 1 korriku fillon zbatimi i fazës së dytë ku paga minimale bëhet 500 euro, siç edhe e kemi paraparë me vendimin që kemi marrë si Qeveri. Rreth 150 mijë punëtorë të sektorit privat do të përfitojnë nga kjo rritje. Pagën minimale e gjetëm 130/170 euro, të pandryshuar për më shumë një dekadë, dhe brenda një mandati po e rrisim për të tretën herë” – ka shkruar Kurti.