Një person dyshohet se është gjetur pa shenja jete këtë mesdite në vendin e njohur “Te Plepat” në Orllan të Podujevës, saktësisht buzë Liqenit të Batllavës.
KALLXO.com mëson se viktima është e gjinisë femërore.
Njësiti i Policisë, Forenzika dhe Mjekësia Ligjore janë në vend të ngjarjes.
KALLXO.com ka provuar që të marrë një përgjigje nga Policia e rajonit të Prishtinës, por deri në momentin e publikimit të këtij artikulli nuk kanë kthyer./Kallxo.com/
Sot në Kosovë parashihet të mbajë mot me diell dhe pjesërisht i vranët.
Temperaturat minimale do të lëvizin ndërmjet 6 deri 10 gradë Celsius, ndërsa maksimalet e ditës parashihen të lëvizin ndërmjet 25-28 gradë Celsius.
Do të fryjë erë nga drejtimi i jugperendimit me shpejtësi 1-3m/s.
Deputetët e Listës Serbe kanë nënshkruar tekstin e betimit si deputetë të legjislaturës së nëntë të Kuvendit të Kosovës.
Në dokument thuhet se zotohen për mbrojtjen e sovranitetit të Republikës së Kosovës.
Me nënshkrimin e vënë nën tekstin e shkruar në gjuhen serbe, nëntë deputetët e rinj të Listës Serbe, janë deklaruar si ligjvënës të Republikës dhe janë zotuar se do të punojnë në interes të shtetit të Kosovës dhe të ruajtjes së sovranitetit dhe integritetit territorial të saj.
“Unë, deputet i Kuvendit të Republikës së Kosovës, betohem se me nder e me përkushtim do ta kryej detyrën time dhe do ta përfaqësoj me dinjitet popullin, do të punoj në interes të Kosovës dhe të të gjithë shtetasve të saj, do të angazhohem për mbrojtjen dhe për respektimin e kushtetutshmërisë dhe të ligjshmërisë, për mbrojtjen e sovranitetit, tërësisë territoriale dhe të integritetit institucional të Kosovës, për garantimin e lirive dhe të drejtave të njeriut, në përputhje me ligjet e vendit. Betohem!”, thuhet në tekstin e betimit i shkruar në gjuhën serbe, që e kanë nënshkruar ligjvënësit e Listës Serbe.
Dokumentet e nënshkruar janë publikuar edhe nga avokati serb, Çedomir Stojkoviq në platformën X, i cili të gjithën e ka konsideruar si lojë të trefishtë të presidentit serb, Aleksandar Vuçiq.
“Në njërën anë nxit tensione dhe përplasje të armatosura, siç ndodhi në Banjskë më 2023, nga ana tjetër përpiqet ta bindë opinionin publik serb dhe Kishën Ortodokse se po e mbron Kosovën si pjesë të Serbisë. Ndërkohë, deputetët që kontrollon betohen në institucionet e Kosovës për të ruajtur pavarësinë e saj. Kjo lojë e dyfishtë, madje trefishtë, ka prodhuar vetëm urrejtje, manipulim dhe përplasje të dhunshme – duke nxitur përçarje ndërmjet komuniteteve dhe viktima të pafajshme, në një kohë kur paqja mund të ishte zgjedhja më e thjeshtë dhe më e drejtë”, ka shkruar avokati serb.
Deputetët e bënë betimin më 19 prill, në tentimin e tretë për ta konstituar legjislaturën e re.
Seanca konstituive ende nuk është përfunduar, ndonëse janë realizuar 10 vazhdime deri tash.
Të shtunën në fshatin Lubizhdë të Prizrenit, dy persona janë përfshirë në një rrahje pas një konflikti mes tyre.
Gazeta Sinjali ka mësuar se rasti ka ndodhur sot, rreth orës 14:30, ndërsa lajmi është konfirmuar zyrtarisht edhe nga Policia Rajonale në Prizren. Njësitet policore kanë dalë në vendin e ngjarjes dhe kanë intervistuar të dy personat e përfshirë.
“Sot me datë 04.05.2025 rreth orës 14:30 është raportuar një rast rrahje nëfshatin Lubinje të Prizrenit. Policia ka intervsituar të dy personat e përfshirë në incident. Njëri nga të dyshuarit është ndalur për 48 orë.”, tha Policia e rajonit të Prizrenit.
Siç ka mësuar Sinjali dhe tashmë e konfirmuar edhe nga Policia, njëri nga të dyshuarit është ndaluar për 48 orë, me urdhër të Prokurorit të Shtetit, ndërsa i dyshuari tjetër është proceduar në gjendje të lirë.
Hetimet janë duke vazhduar për të sqaruar rrethanat e konfliktit dhe përgjegjësinë penale të palëve.
Një grua, 26 vjeçare ka marrë lëndime në pjesën e kokës si pasojë e një goditjes me gurë.
E guri dyshohet se u hodh në drejtim të një treni i cili po qarkullonte në fshatin Grabovc.
Policia ka njoftuar se rreth orës 17:15, kanë pranuar informata se, në afërsi të fshatit Grabovc, një person ka pësuar lëndime trupore si pasojë e goditjes me një gur.
Menjëherë pas marrjes së informacionit, njësitet policore kanë dalë në vendin e ngjarjes, nga ku sipas të dhënave fillestare, viktima, femër, 26 vjeç, ka pësuar lëndime në pjesën e kokës, dyshohet si pasojë e një guri të hedhur në rrethana ende të panjohura nga pjesa e jashtme e trenit, në momentin kur ai ishte në lëvizje”- ka thënë për KALLXO.com, zëdhënësi i Policisë në Rajonin e Prishtinës, Agron Borovci.
Sipas tij në vendin e ngjarjes, mjeket emergjent, i kanë ofruar viktimës ndihmën mjekësore dhe më pas të njëjtën e kanë transferuar për trajtim të mëtejshëm në QKMF, në Drenas.
Policia e Kosovës sipas Borovcit tashmë ka nisur hetimet për identifikimin e të implikuarve dhe fton qytetarët që posedojnë informacione të dobishme për këtë rast, të lajmërojnë Policinë përmes linjës emergjente 192, apo aplikacionit Lajmëro Policinë./Kallxo.com/
Një krijesë e rrallë dhe misterioze e oqeanit, një kandil deti gjigant fantazmë (Stygiomedusa gigantea), është filmuar gjatë një misioni 8-ditor kërkimor në brigjet e Antarktidës, pranë Detit Bellingshausen. Zbulimi i jashtëzakonshëm është raportuar nga ‘Discover Wildlife’, duke ngjallur interes të madh në botën shkencore dhe më gjerë.
Kjo krijesë e pazakontë, me një pamje të tejdukshme, të errët dhe thuajse jashtëtokësore, u regjistrua nga automjeti i telekomanduar ROV SuBastian, i operuar nga bordin e anijes kërkimore R/V Falkor, pjesë e misionit të Institutit të Oqeanit Schmidt.
Ekspedita nisi pas shkëputjes së një ajsbergu masiv me sipërfaqe rreth 510 kilometra katrorë nga akullnaja lundruese George VI, duke krijuar një hapësirë unike për eksplorim nënujore. Zonat që për dekada ose shekuj kanë qenë të mbuluara nga akulli, tani ishin të aksesueshme për herë të parë.
Më 25 janar, ROV SuBastian zbriti në shtratin e detit të Antarktidës, duke sjellë imazhe të jashtëzakonshme të një ekosistemi të pasur dhe të paprekur.
“Nuk e prisnim të gjenim një ekosistem kaq të bukur dhe të lulëzuar,” tha Dr. Patricia Esquet, shkencëtarja kryesore e misionit. Bazuar në madhësinë e kafshëve, komunitetet që vëzhguam kanë qenë atje për dekada, ndoshta edhe qindra vjet.”
Ndër krijesat më mbresëlënëse ishte Stygiomedusa gigantea, një kandil deti gjigant që shumë pak njerëz kanë pasur fatin ta shohin ndonjëherë. Kambana e këtij kandili mund të ketë një diametër mbi një metër, ndërsa katër ‘bishtat’ të gjatë e të lëvizshëm mund të arrijnë deri në 10 metra gjatësi. Këto struktura nuk janë tentakula tipike, por degëzime të trasha dhe të tejdukshme që ndihmojnë në kapjen e gjahut.
Kjo specie u dokumentua për herë të parë në vitin 1899, por u identifikua zyrtarisht 60 vjet më vonë. Deri më sot, është vëzhguar më pak se 150 herë, kryesisht përmes nëndetëseve kërkimore si ROV SuBastian.
“Pamja e tij është si një fantazmë që lëviz në heshtje nëpër errësirën e detit të thellë,” thuhet në përshkrimin e botuar nga Discover Wildlife.
Zbulime të tilla janë një kujtesë se pjesa më e madhe e oqeaneve të Tokës mbetet ende e paeksploruar, dhe se çdo hapje e re në zonat e thella ose të mbuluara më parë mund të zbulojë krijesa të panjohura, ose të rralla sa vetë legjendat e detit.
Ekspedita e ‘R/V Falkor’, jo vetëm që dokumentoi një kafshë misterioze, por edhe solli në vëmendje rëndësinë e ruajtjes dhe studimit të zonave të ndjeshme si Antarktida, ku ndryshimet klimatike dhe shkëputjet e ajsbergëve po hapin derën për zbulime të reja, dhe ndoshta edhe sfida të reja për ekosistemet detare. Syri.net-iefimerida
Deputetja e Lëvizjes Vetëvendosje, Donika Gërvalla, ka akuzuar partitë që në legjislaturën e fundit kanë qenë në opozitë se me mosvotim në seancën konstituive po duan të blejnë kohë.
“Të gjitha këto janë filma që duan të çojnë në blerje të kohës për të arritur diçka që opozita duhet të na tregoj. A është përpjekja për të krijuar një qeveri të partive opozitave bashkë me Listën Serbe. A është se përpjekja mes tyre ende nuk ka nxjerrë rezultat apo duan ta çojnë vendin në zgjedhje të reja. Mesazhi i Memli Krasniqit për zgjedhje të reja është mesazh që nuk i drejtohet LVV por LDK-së që nuk duket se ka interesim për zgjedhje të reja”, ka thënë ajo.
Gërvalla e ka quajtur të pakuptimë refuzimin për ta votuar mundësinë e votimit të fshehtë.
“Kjo mungesë e besimit ndaj deputetëve të tyre tregon që vullneti për të bllokuar proceset është shtyrë nga motive që është lehtë por edhe vështirë të shpjegohen. Nuk e di çka imagjinon opozita në ditët e saj të mira se si të dalim nga kjo situatë por shfrytëzimi i votimit të fshehtë është edhe një përpjekje me shpresën se do ta tejkalojmë këtë fazë”.
Edhe në seancën e dhjetë konstituive të Kuvendit të Kosovës, u propozua mënyra e votimit të fshehtë.
VV po insiston në emrin e Albulena Haxhiut, e cila deri tani është hedhur gjashtë herë në votim, pa arritur të marrë numrin e nevojshëm të votive.
Në tentativën e shtatë, u propozua votimi i fshehtë për herë të parë, por u kundërshtua nga partitë e tjera, duke shkaktuar përplasje dhe akuza të ndërsjella.
Kryetari i AAK-së, Ramush Haradinaj, ka thënë se ka informacione që po bëhen përpjekje për një kandidat më unifikues për kryeparlamentar.
“Po shpresojmë të kemi kandidat unifikues, që të ndodh propozim i ri. Shpresojmë ta votojmë kryeparlamentarin. Kam dëgjuar që ka përpjekje për ta ndërruar kandidatin, për ta vendosur një kandidat më unifikues”, ka thënë Haradinaj para hyrjes në Kuvend.
Gjatë një deklarimi të djeshëm, kryetari i AAK-së e la të hapur mundësinë ta votojë edhe Glauk Konjufcën për kryeparlamentar. AAK-ja insiston që Albulena Haxhiu nuk është kandidate unifikuese.
Haradinaj në deklarimin e sotëm shtoi se kryeministri e ministrat që po ushtrojnë detyrën edhe pse janë zgjedhur deputetë po shkelin ligjin dhe për këtë ka paralajmëruar kallëzim penal, ashtu si LDK-ja.
Deputetja e Lidhjes Demokratike të Kosovës, Hykmete Bajrami, ka deklaruar se është e papranueshme çdo përpjekje për të ndryshuar mënyrën e votimit gjatë procesit të konstituimit të Kuvendit.
Ajo theksoi se LDK-ja ka qenë gjithmonë e qartë në qëndrimin e saj dhe se “nuk jemi ne ata që duhet të ndërrojmë qëndrim”.
Sipas saj, ndryshimi i mënyrës së votimit mund të bëhej vetëm në fillim të procesit dhe jo në fazën kur votimi është duke u zhvilluar.
