Guvernatori i Bankës Qendrore të Republikës së Kosovës (BQK), Ahmet Ismaili mori pjesë në konferencën përmbyllëse të Projektit Kundër Krimit Ekonomik (PECK III) të Këshillit të Evropës.

Sipas BQK-së, guvernatori Ismaili nënvizoi se PECK III nuk ka qenë thjesht mbështetje teknike, por një partneritet strategjik që ka forcuar kapacitetet institucionale për luftimin e pastrimit të parave, financimit të terrorizmit dhe rritjen e integritetit të sistemit financiar.

Po ashtu, thuhet se guvernatori Ismaili tha se BQK-ka falë mbështetjes së PECK III, ka avancuar dukshëm në modernizimin e kornizës së vlerësimit të rrezikut, ka integruar teknologji të reja mbikëqyrëse dhe ka finalizuar një manual gjithëpërfshirës për mbikëqyrjen e bazuar në rrezik, duke përfshirë edhe sektorin e aseteve virtuale.

Sipas njoftimit, guvernatori Ismaili tutje theksoi se këto rezultate vendosin një bazë të qëndrueshme për vlerësimin e ardhshëm nga MONEYVAL, i cili do të jetë një test i rëndësishëm për integritetin financiar të Kosovës.

Siç bën të ditur BQK, në përmbyllje të adresimit, guvernatori Ismaili theksoi se BQK-ja mbetet plotësisht e përkushtuar për të thelluar reformat strukturore në sistemin financiar, për të avancuar përputhshmërinë me standardet e BE-së dhe ato globale, dhe për të garantuar stabilitet të qëndrueshëm, integritetin dhe sovranitetin monetare dhe financiar të vendit. Ndërsa në vazhdimësi të punimeve, u diskutua edhe për rolin e BQK-së në projektin PECK III.

Banka Qendrore e Republikës së Kosovës riafirmon se mbrojtja e integritetit financiar dhe forcimi i mbikëqyrjes së bazuar në rrezik mbeten prioritete kyçe, në funksion të një sistemi financiar modern, të sigurt dhe të besueshëm për qytetarët dhe ekonominë e vendit.

Guvernatori i Bankës Qendrore të Republikës së Kosovës (BQK), Ahmet Ismaili takoi përfaqësuesit e Bankës Zhvillimore të Këshillit të Evropës (CEB), Thomas Adams, menaxher i vendit përgjegjës për Gjermani dhe Kosovë, si dhe Denis ëeerts, menaxher i Lartë për Rrezikun e Kredive.

Sipas BQK-së, në fillim të takimit, guvernatori Ismaili prezantoi zhvillimet e fundit në sektorin financiar, duke përfshirë atë të mikrofinancave dhe jo bankave, duke theksuar rolin e këtyre institucioneve në zgjerimin e qasjes ndaj financave për segmente të caktuara të ekonomisë dhe popullsisë.

Në njoftim thuhet se guvernatori Ismaili gjithashtu informoi përfaqësuesit e CEB-it mbi forcimin e kornizës rregullatore dhe mbikëqyrëse për MFI dhe NBFI, duke përfshirë kërkesat e reja për licencim dhe kapital, praktikat e përmirësuara të mbikëqyrjes, dhe aktivitetet e vazhdueshme për parandalimin e pastrimit të parave (AML).

“Diskutimet gjithashtu përfshinë progresin në agjendën më të gjerë të modernizimit të sektorit financiar. Takimi nënvizoi përkushtimin e përbashkët të të dy institucioneve për të forcuar gjithëpërfshirjen financiare, praktikat rregullatore dhe reformat që kontribuojnë në zhvillimin ekonomik të qëndrueshëm të Republikës së Kosovës” – thuhet në njoftim.

SHBA-të nuk pritet të fillojnë dialogun e planifikuar strategjik me Kosovën të cilin e kishin pezulluar në shtator të këtij viti për shkak të veprimeve të pakoordinuara të Qeverisë Kurti.

Ambasada amerikane thotë se SHBA kërkon hapa konkretë nga Kryeministri kujdestar Kurti për të uljen e tensionet dhe për të çuar përpara qëllimin e përbashkët për forcimin e paqes dhe stabilitetit si bazë për prosperitet të ndërsjellë ekonomik është thënë në përgjigjen e Ambasadës së SHBA-së për RTV 21.

‘’Siç ia kemi bërë të qartë qeverisë së përkohshme, dera është e hapur për përmirësimin e marrëdhënieve dhe rifillimin e bashkëpunimit. Megjithatë, kjo kërkon hapa konkret nga kryeministri kujdestar Kurti për të uljen e tensionet dhe për të çuar përpara qëllimin tonë të përbashkët për forcimin e paqes dhe stabilitetit si bazë për prosperitet të ndërsjellë ekonomik. Ne do të vazhdojmë të vlerësojmë veprimet e qeverisë së përkohshme. Nuk kemi asgjë tjetër për të njoftuar në këtë pikë”.

Kryeministri në detyrë i Republikës së Kosovës, Albin Kurti, i shoqëruar nga ministri në detyrë i Kulturës, Rinisë dhe Sportit, Hajrulla Çeku dhe kryetari i Komunës së Podujevës, Shpejtim Bulliqi, mori pjesë në vënien e gurthemelit për ndërtimin e tribunave të lindjes në Stadiumin “Zahir Pajaziti”.

Investimi në vlerë prej afër 2 milionë euro, përfshin përveçse tribunën e lindjes dhe ulëse të reja, përfshin mbulim të tribunave perëndimore, veriore dhe jugore, si dhe ndriçim të plotë të fushës, duke mundësuar kështu zhvillimin e ndeshjeve edhe në mbrëmje.

Kryeministri Kurti tha në prononcimin e tij se Klubi Futbollistik “Llapi” ka një traditë të gjatë, është themeluar në vitin 1932, dhe nga këtu kanë dalë edhe yje të futbollit, në mesin e tyre Fadil Vokrri dhe Fevzi Rama.

“Prandaj, përveç që e kemi obligim, besoj që është tejet e dobishme sepse investimi në sport, e posaçërisht në futboll në këtë stadium këtu në Podujevë do të inkurajojë, do të zbulojë, e do të ushqejë talente të reja, të cilët në vitet në vijim natyrisht se do ta ngrisin lartë e më lartë futbollin e vendit tonë dhe të sportit në përgjithësi”, tha ai.

Gjithashtu theksoi se këto investime do ta shndërrojnë Stadiumin “Zahir Pajaziti” në stadium sipas kritereve të UEFA-s, e që natyrisht do të jetë një shtysë më shumë për suksese edhe më të mëdha.

Kryeministri në detyrë i Republikës së Kosovës, Albin Kurti, së bashku me ministren në detyrë të Arsimit, Shkencës, Teknologjisë dhe Inovacionit, Arbërie Nagavci dhe ministrin në detyrë të Administrimit të Pushtetit Lokal, Elbert Krasniqi, pritën sot në Qeveri studentë përfitues të skemave të ndryshme të bursave, përfshirë bursat për studime jashtë vendit në nivelet Bachelor, Master dhe Doktoratë, si dhe përfituesit e bursave të komuniteteve.

Zyra e Kryeministrit njofton se gjatë takimit, Kurti uroi studentët për suksesin e arritur dhe nënvizoi rëndësinë e mbështetjes së të rinjve që synojnë shkollimin në institucionet më prestigjioze ndërkombëtare.

Ai theksoi se investimi në arsim cilësor mbetet një ndër prioritetet kryesore të Qeverisë, duke shprehur besimin se këta të rinj do të jenë kontribues të rëndësishëm në zhvillimin profesional dhe shoqëror të vendit pas përfundimit të studimeve.

Ministrja Nagavci vlerësoi angazhimin dhe përkushtimin e studentëve fitues të bursave, duke theksuar se skemat mbështetëse për studentët përfaqësojnë investim të drejtpërdrejtë në kapitalin njerëzor të Kosovës.

Në vijim rikujtoi se gjatë pesë viteve të fundit MAShTI ka zgjeruar ndjeshëm skemat e bursave, si për studentët brenda vendit ashtu edhe për ata që studiojnë jashtë dhe theksoi përkushtimin për të vazhduar punën drejt rritjes së cilësisë në arsim dhe zgjerimit të mundësive për studentët.

Studentët përfitues shprehën mirënjohjen për mbështetjen e ofruar dhe vlerësuan mundësinë për të ndjekur studimet në universitete brenda dhe jashtë vendit. Ata theksuan se do t’i vënë njohuritë e fituara në shërbim të avancimit të Kosovës.

Qeveria e Kosovës dhe MAShTI rikonfirmuan përkushtimin për të vazhduar politikat mbështetëse që u mundësojnë të rinjve të vendit të përfitojnë nga arsimi cilësor në vend dhe jashtë tij, si dhe të kontribuojnë në zhvillimin e mëtejmë të shtetit.