Ministri i Financave, Hekuran Murati ka folur për propozimet e Qeverisë për ZRRE-në sa i përket shtrenjimit të rrymës.
Ai ka thënë se kanë dërguar një koment ku kanë propozuar që të mos ndryshojë çmimi i rrymës për ato familje që nuk kalojnë pragun mbi 1 mijë kilovatësh.
“Kemi propozuar që për konsumatorët familjarë, blloku i parë të jetë deri në 1 mijë kilovatë orë. 500 kilovatë ditën dhe 500 kilovatë natën. Për ato familje që nuk e kalojnë këtë pragë kilovatësh, 500 ditën e 500 natën, çmimi të mbetet i pandryshuar. Për ata që e tejkalojnë edhe ata që e kalojnë këtë prag mbi 500 kilovatë, propozimi ynë ka qenë që edhe tarifa e lartë ditore të ulet nga 14 në 11.5 cent. Pra edhe këtu të kemi një zbritje. Kështu kemi vlerësuar që gjenerohen të hyra 22 milionë euro për me zvogëlu këtë hendekun nga 110 në 70 milionë euro”, u shpreh Murati.
Qeveria ka propozuar që shtrenjtimi i rrymës të prek edhe bizneset.
“Kemi propozuar që barra të shpërndahet edhe te bizneset. Nëse barra apikohet edhe tek bizneset flasim për një shtesë në tarifave prej 17 milionë eurove. Me u rrit nga 1 cent për kilovatë për bizneset. Duhet një nivelizim edhe aty nga ana e ZRRE-s”, tha Murati.