Një zyrtar i Komunës së Prizrenit është arrestuar nën dyshimin për keqpërdorim të detyrës zyrtare.
Policia ka njoftuar se arrestimi është bërë gjatë ditës së sotme pas marrjes së disa informatave për prerje të drurëve në mënyrë të kundërligjshme.
“Pas pranimit të këtyre informatave autoritete policore kanë filluar menjëherë me veprime hetimore në koordinim me Prokurorin e Shtetit, ashtu që në proces janë hasur persona duke prerë dru, ku në vendngjarje është gjetur një kamion i ngarkuar me rreth 15 metër kub dru, si dhe shumë dru tjera të prera”, thuhet në njoftimin e Policisë së Kosovës.
Tutje Policia ka njoftuar edhe se tre persona janë intervistuar në cilësinë e dëshmitarëve ndërsa janë siguruar edhe dëshmi që mbështetin dyshimin e arsyeshmen se përgjegjësi i autoritetit pyjor në Komunën e Prizrenit ka vepruar në kundërshtim me detyrat e tij.
“I dyshuari në pozitën Përgjegjës në Autoritetin Pyjor në Komunën e Prizrenit, ka vepruar në kundërshtim me vendimin e Drejtorisë së Shërbimeve Publike në Prizren dhe kërkesën e kësaj drejtorie, se drutë duhet të dërgoheshin në hapësirat e Shërbimit të Pylltarisë, e me pas Komuna të vendose tutje, ndërsa i dyshuari i kishte mundësuar që drutë rreth 60 metër kub i janë dhënë një kompanie private”, thuhet në njoftim më tutje.
Sipas Policisë, në proces të prerjes dhe bartjes kanë qenë edhe një masë tjetër e konsiderueshme e drurëve që pritej të dërgoheshin te një kompani private dhe me këto veprime ekziston dyshimi i arsyeshëm se i arrestuari ka kryer veprën penale të keqpërdorimit të detyrës zyrtare.
Për të gjitha veprimet e Policisë është njoftuar edhe prokurori i shtetit. Me urdhër të këtij të fundit i arrestuari dërgohet për 48 orë në mbajtje.