Kryeministri Albin Kurti dhe Ministrja e Punëve të Jashtme të Kosovës Donika Gërvalla kanë thënë se nuk do të mbahet referendumi i Serbisë në Kosovë as legalisht as ilegalisht. Kryeministri Kurti ka paralajmëruar veprime nëse mbahet referendumi ilegalisht.
Deklarata e përbashkët e kryeministrit Albin Kurti, presidentes Vjosa Osmani dhe kryeparlamentarit Glauk Konjufca, kundër mbajtjes së referendumit të Serbisë në vendin tonë, duket se nuk ka bindur shtetin tonë fqinj të heqë dorë nga ky organizim.
Kjo pasi që në Mërdare, natën e mbrëmshme, Policia e Kosovës ndaloi dy kamionë që po fusnin material zgjedhor në vendin tonë. Si pasojë 6 persona fillimisht u arrestuan, e pastaj u kthyen për Serbi gjatë ditës.
E në rast se një përpjekje e tillë përsëritet apo në çfarëdo forme do të ketë tentim për tu mbajtur ilegalisht referendumi, Kosova është gati për të penguar këto veprime.
Këtë gjë e bëri të ditur kryeministri i vendit Albin Kurti, në një deklaratë për T7.
“Qëndrimi jonë është parimor, nuk është politik. Është qëndrim në mbrojtje të kushtetueshmërisë dhe ligjshmërisë në vendin tonë. Çfarëdo qëndrimi tjetër do të na vinte neve në një situatë ku ne shkelim ligjin, ne nuk respektojmë kushtetueshmërinë, andaj një qëndrim i tillë parimor nuk ka se si ndryshon”, tha Kurti, përcjell Reporteri.net.
Edhe vartësja e tij, zv/kryeministrja e kryediplomatja Donika Gërvalla. tha se referendumi nuk do të lejohet të mbahet, as legalisht e as ilegalisht.
“Nuk jemi të interesuar as të shkaktojmë tensione dhe as të shkaktojmë incidente. Është në interesin e përbashkët si të Serbisë ashtu edhe të tonin, që dita e nesërme të kalojë qetë”, tha Gërvalla.
Gërvalla shtoi se ka vetëm një mënyrë që në Kosovë mund të votohet gjatë së dieles, por tha se atë Serbia e refuzoi.
Ajo gjithashtu shtoi se raportet me shtetet e Qunitit dhe me Shtetet e Bashkuara të Amerikës mbesin të shkëlqyera edhe përkundër refuzimit për mbajtjen e referendumit.
Gjatë ditës, Kuvendi i Kosovës ka miratuar rezolutën kundër referendumit të Serbisë në Kosovë me 76 vota pro dhe vetëm 1 abstenim, në një seancë të jashtëzakonshme.