Përmes një postimi na faqen e saj zyrtare, OJQ ” THY” nga Prizreni, ka mirëpritur marrëveshjen politike për Vitin Evropian të Rinisë, 2022.
“Duke pasur parasysh që Komisioni Evropian ka mirëpritur marrëveshjen politike të arritur në Parlamentin Evropian, OJQ THY merr shembull shumë të mirë që edhe në Kosovë të ndodh një gjë e ngjashme, të shpallet viti 2022 si Viti i Rinisë, në të njëjtën kohë me Vitin Evropian të Rinisë, në BE.
Gjatë vitit 2022 priten të organizohen një sërë aktivitetesh në sektorin e rinisë ku të rinjtë nga Kosova fatkeqësisht nuk mund të përfitojnë nga të gjitha këto mundësi. Megjithatë, 8 milionë Eurot e ndara për vitin 2022 në kuadër të Programit Erasmus+ dhe Korpusit Evropian të Solidaritetit, të rinjtë evropianë do të përfitojnë nga shumë mundësi për të fituar njohuri, aftësi dhe kompetenca për zhvillimin e tyre profesional dhe për të forcuar angazhimin e tyre qytetar për të formësuar të ardhmen e Evropës.
Iniciativat që po zhvillohen në kuadër të Vitit Evropian të Rinisë do të mbështeten me Programet dhe instrumentet e tjera të BE-së ku gjithashtu autoritetet dhe organizatat vendore mund të kontribuojnë në objektivat dhe aktivitetet e Vitit.
Për të nderuar, mbështetur dhe angazhuar me të rinjtë në të gjitha nivelet, Viti Evropian i Rinisë do të ndjekë katër objektiva:
-Ripërtëritja e perspektivave pozitive për të rinjtë, me fokus të veçantë në efektet negative që pati mbi ta pandemia e COVID-19, duke theksuar se si tranzicioni i gjelbër dhe digjital dhe politikat e tjera të Bashkimit Evropian ofrojnë mundësi për të rinjtë dhe shoqërinë në përgjithësi;
-Mbështetja e të rinjve, duke përfshirë punën me rininë, veçanërisht të rinjtë me më pak mundësi, nga prejardhje të pafavorizuara dhe të ndryshme ose që u përkasin grupeve të cenueshme dhe të margjinalizuara, për të fituar njohuri dhe kompetenca përkatëse dhe kështu të bëhen qytetarë aktivë dhe të angazhuar, të frymëzuar nga një ndjenjë e përkatësisë evropiane;
– Mbështetja e të rinjve për të kuptuar më mirë dhe promovimi aktiv i mundësive të ndryshme në dispozicion të tyre, qoftë nga niveli i BE-së, kombëtar, rajonal apo lokal, për të mbështetur zhvillimin e tyre personal, social, ekonomik dhe profesional.
– Integrimi i politikës rinore në të gjitha fushat përkatëse të politikave të Bashkimit në përputhje me Strategjinë e BE-së për Rininë 2019 – 2027 për të inkurajuar që një perspektivë rinore të futet në politikëbërje në të gjitha nivelet.
Viti Evropian i Rinisë synon të jetë ndërsektorial dhe të ndërtohet mbi të gjitha politikat e BE-së.
Gjatë Vitit Evropian pritet të nisin disa nisma kryesore nga të gjitha fushat e politikave. Kjo përfshin një nismë e re për të ndihmuar të rinjtë që nuk janë në punësim, arsim ose trajnim për të gjetur rrugën e tyre drejt tregut të punës duke kombinuar mbështetjen për arsimin, trajnimin profesional ose punësimin në vendin e tyre të origjinës me një vendosje pune në një shtet tjetër të BE-së. Viti Evropian i Rinisë do të shkojë gjithashtu paralelisht me NextGenerationEU, i cili rihap perspektivat për të rinjtë, duke përfshirë vende pune cilësore dhe mundësi arsimimi dhe trajnimi për Evropën e së ardhmes, dhe mbështet pjesëmarrjen e të rinjve në shoqëri.
Që viti i Rinisë të jetë i suksesshëm, është e rëndësishme ta formojmë atë së bashku me njerëzit që do të përfitojnë më shumë prej tij. Të rinjtë dhe organizatat rinore janë gjithashtu të përfshira ngushtë në organizimin e Vitit, së bashku me institucionet relevante duhet të lobohet që edhe të rinjtë europian (kosovarët) me perspektivë evropiane të kenë mundësi të përfitojnë sa më shumë që munden nga kjo, duke theksuar aspektin e pjesëmarrjes të numrit më të madh të të rinjve në vend.
Programi i plotë i aktiviteteve dhe informacione të mëtejshme do të jenë të disponueshme në Portalin Rinor Evropian.”, thuhet në fund të këtij postimi nga OJQ ” THY”.