Daljet në konferenca për medie i ka shpeshtuar.
E të rralla nuk i ka as ndihmat qeveritare që po i ndan, e të cilat dalin nga Pakoja e Ringjalljes Ekonomike, shkruan “Front Online”.
Një të tillë, Ministri i Financave, Hekuran Murati e paraqiti edhe këtë të enjte, përmes të cilës parashihet mbështetje për prodhuesit vendorë.
Krejt kjo me qëllim të rritjes së eksportit.
“Në kuadër të masës 2.1 do të subvencionohen bizneset me 20 % të shumës së kredisë të prinicipalit. Maksimumi i lejuar për subvencionim është 400 mijë euro. Të gjitha kreditë deri në 2 milionë euro për të gjitha bizneset prodhuese që duan t`i shtojnë kapacitetet do të mbështetën me 20 %”, u shpreh ministri Murati.
Krahas kredive investive, Qeveria miratoi edhe një masë tjetër, atë 2.4, që nxit prodhimin.
“Është paraparë edhe subvencionim deri në 10 mijë euro i stafit menaxherial. Masë mbështetëse deri në 50 mijë euro për brendim e marketing të produkteve dhe subvencionimi për të marrë pjesë në panaire deri në 50 mijë euro”, theksoi Murati.
Kjo po mirëpritet nga prodhuesit vendorë.
“Këto masa janë të mirëseardhura nëse i aplikon qeveria ‘Kurti’ kishin me qenë të mirëseardhura dhe ka nevojë në atë drejtim”, u shpreh për “Front Online” Fejzulla Mustafa, pronar i kompanisë Fluidi.
“Normal që kjo është një ndihmë e madhe për neve që merremi me eksport, duke e ditur se me çfarë konkurrence përballemi”, theksoi për “Front Online” Ramiz Gashi, drejtor në kompaninë Relux.
Vlerësime pozitive për masat e ndërmarra nga qeveria kanë edhe ekonomistët.
Mustafë Kadriaj thotë se ndihma nga Qeveria duhet të reflektojë në rritje të numrit të punëtorëve, por edhe të eksportit.
“Së pari duhet të lansohen ato mjete në llogari të bizneseve dhe pastaj të shikohet nëse ato mjete do të dinë të jetësohen nga bizneset, t`i kthejnë në prodhim. Ai prodhim duhet të reflektojë në rritje të punëtorëve dhe të eksportit”, tha Kadriaj për “Front Online”.
Për të përfituar nga masa 2.1 dhe 2.4, bizneset duhet të aplikojnë në Administratën Tatimore të Kosovës.
Ky aplikim do të jetë i hapur deri në fund të qershorit 2022./“Front Online