Qysh para orës 10:00, komandanti i Forcës së Sigurisë së Kosovës Rrahman Rama, u shfaq në Kuvend për të raportuar para Komisionit për Çështje të Sigurisë dhe Mbrojtjes.
Deputetët vendosën, ndonëse me pak hezitim, që rrëfimin e Ramës ta dëgjojnë me dyer të mbyllura e pa praninë e mediave, siç u tha për shkak të informatave të ndjeshme.
Pas këtij raportimi vetë gjenerallejtënanti nuk u deklarua, derisa kryetari i trupit parlamentar është i rezervuar. Është diskutuar kryesisht për buxhetin, për të cilin Bekë Berisha, kryetar i Komisionit thotë se nuk është i mjaftueshëm për nevojat e ushtrisë.
Komandanti i FSK-së u ka folur deputetëve edhe për ushtrimin historik në të cilin morri pjesë ushtria “Defender 21” dhe ka siguruar se siguria në vend është në nivel të lartë.
Nuk është diskutuar edhe për veriun dhe dokumentin që kryeministri e ka nisur në prokurori.
Dihet se asnjë nga ushtarët e Forcës së Sigurisë së Kosovës nuk e ka humbur jetën si pasojë e pandemisë, megjithëse virusi u ka pezulluar disa ushtrime kësaj force.