Shumë familjarë të të vrarëve në luftën e Bosnjës, gazetarë të mediave të ndryshme të këtij vendi dhe zyrtarë shtetërorë kanë mbërritur në Hagë të hënën, ku të martën do ta shpallet vendimi i shkallës së dytë nga Gjykata Ndërkombëtare për Krime të Luftës në ish-Jugosllavi.
Shpallja e vendimit, për shkak të masave anti-COVID do të bëhet në prani të pak zyrtarëve e të ftuarve në seancë. Megjithatë, sipas gazetës “Oslobodjenje”, në Hagë kanë shkuar shumë qytetarë të këtij vendi, të prekur në mënyra të ndryshme nga gjenocidi i kryer me urdhër të ish-komandantit të forcave serbe në Bosnjë, Ratko Mladiq.
Mladiq, para katër vjetësh, ishte dënuar me burgim të përjetshëm, pasi u shpall fajtor për 10 nga 11 pikat e aktakuzës. Por, si mbrojtja ashtu edhe prokuroria u ankuan, duke çuar lëndën në shkallën e dytë.
Mladiq u dënua për gjenocid në Srebrenicë, ku u vranë mbi 8.000 myslimanë për një ditë, më 1995. Po ashtu u dënua për krime kundër njerëzimit në 15 komuna në Bosnjë, për rrethim e terrorizim të Sarajevës gjatë periudhës 1992-1995 si dhe për mbajtjen peng të trupave paqeruajtëse të UN-it gjatë bombardimeve të NATO-s.
Ratko Mladiq u arrestua më 26 maj 2011 në Serbi, pas 16 vjetësh duke i ikur drejtësisë.