Tetë universitete publike të Kosovës kanë nënshkruar marrëveshje bashkëpunimi gjatë Konferencës së Rektorëve të Institucioneve Publike të Arsimit të Lartë në Kosovës që u zhvillua në Rektoratin UP-së.
Me marrëveshjen e nënshkruar, Universiteti i Prishtinës, ai i Prizrenit, Universiteti i i Pejës, ai i Mitrovicës, Universiteti i Gjilanit, i Gjakovës si dhe ai i Shkencave të Aplikuara të Ferizajt dhe Kolegji Publik Ndërkombëtar i Biznesit në Mitrovicë, UP-ja thotë se u zotuan për thellimin e bashkëpunimit akademik, shkencor-kërkimor, arsimor dhe kulturor në bazë të parimeve të digjitalizimit në kohën e inteligjencës artificiale.
“Marrëveshja parasheh gjithashtu lehtësimin e shkëmbimit të profesorëve e studentëve, organizimin e aktiviteteve të përbashkëta dhe mundësinë e nismave të veçanta për të mirën e arsimit të lartë”, thuhet në njoftim.
Bëhet e ditur se në mbledhje, kryesuesi i Konferencës së Rektorëve, rektori i Universitetit të Prishtinës, Arben Hajrullahu, ia dorëzoi detyrën kryesuesit të ri të Konferencës së Rektorëve, profesorit, Mentor Alishani që është rektor i Universitetit “Ukshin Hoti” të Prizrenit, ndërsa zëvendës i tij do të jetë profesor, Armand Krasniqi, që me detyrë është rektor i Universitetit “Haxhi Zeka” të Pejës.
“Mandati i tyre zgjat 1 vit, kurse ndryshimet në udhëheqjen e kësaj konference bëhen me rotacion”, ka bërë të ditur UP-ja.
Thuhet se rektorët e universiteteve publike bënë hapa konkretë edhe për fuqizimin e ndërkombëtarizimit të kërkimit shkencor dhe arsimit të lartë të Kosovës, derisa diskutuan edhe për regjistrimin e studentëve në vitin akademik 2025-2026 dhe akreditimin e programeve.
“Konferenca e Rektorëve është konsoliduar shumë si institucion, duke krijuar të gjithë mekanizmat e funksionimit dhe Rregulloren e punës. Kjo konferencë do të ketë edhe uebfaqen e saj zyrtare”, njoftoj UP-ja.