Instituti Hidrometeorologjik i Kosovës (IHMK) ka njoftuar se këtë vikend, më 26 dhe 27 korrik 2025, parashikohet të ketë mot të nxehtë, por edhe me vranësira, të cilat vende-vende do të sjellin reshje shiu.
Sipas njoftimit të Institutit, zonat më të prekura parashihen në veriperëndim të vendit, ku pritet të ketë edhe erëra në formë stuhish.
“Pas këtyre reshjeve, moti do të freskohet, dhe java e ardhshme pritet të ketë temperatura afër vlerave mesatare për këtë periudhë në raport me vitet e kaluara” – njofton IHMK.
Të shtunën, më 26.07.2025, pritet të mbajë mot me diell dhe me vranësira të pakta.
“Vranësiarat do të dendësohen dhe vende-vende parashihen të sjellin riga shiu të përcjellura me stuhi lokale. Temperaturat minimale do të lëvizin ndërmjet 16-20°C, ndërsa ato maksimale pritet të jenë ndërmjet 36- 40°C. Do të fryjë erë kryesisht nga drejtimi veriperëndimor, me shpejtësi prej 1 deri në 11m/s.” – ka njoftuar IHMK.
Dhe të dielën, më 27.07.2025, moti do të jetë me diell dhe pjesërisht i vranët. Vranësirat vende- vende mund të sjellin riga lokale shiu.
“Temperaturat minimale do të sillen ndërmjet 17 – 20°C, ndërsa ato maksimale ndërmjet 29 dhe 33°C. Do të fryjë erë nga veriperëndimi, me shpejtësi prej 1 deri në 6m/s.” – ka thënë IHMK.