Gjykata Supreme e Kosovës, ka nxjerrë një Aktgjykim duke e shpallur si të paligjshëm dhe duke e shfuqizuar Udhëzimin Administrativ për Paisjet Elektronike Fiskale, Sistemeve Fiskale dhe Softuerëve Elektronikë Fiskalë të hartuar nga Minsitria e Financave.
Supremja ka vlerësuar se nxjerrja e akteve nënligjore nga një person që ushtron njëkohësisht detyrën e deputetit dhe të ministrit është e kundërligjshme dhe shkel dispozitat kushtetuese.
Sipas ministrit në detyrë të Financave, Hekuran Murati ky vendim i Supremes është absurd dhe nënkupton ndërprerje të procesit të digjitalizimit, si dhe vazhdim të zhvatjes së bizneseve përmes kostove enorme për arkat e vjetra fiskale.
“Monopoli i arkave fiskale me kosto enorme për bizneset tatimpaguese, i vendosur në kohën kur Bedri Hamza kishte qenë Ministër i Financave, parashihej të merrte fund me Udhëzimin e Ri Administrativ, i cili hapte rrugën për arkat fiskale digjitale, siç tashmë e kanë bërë edhe shumica e shteteve në rajon. Mirëpo sot Gjykata Supreme, me gjykatës Delushe Halimi, Lumni Sallauka, dhe Franciska Zhitija-Ymeri, paska vendosur që Udhëzimi Administrativ për arka fiskale digjitale të shfuqizohet. Ky vendim absurd i Gjykatës Supreme nënkupton ndërprerje të procesit të digjitalizimit, dhe vazhdim të zhvatjes së bizneseve përmes kostove enorme për arkat e vjetra fiskale”, ka shkruar Murati në Facebook.
Ai tutje ka theksuar se si pasojë e këtij vendimi, bizneset do të vazhdojnë të kenë kosto vjetore prej mbi 5 milionë euro në vit.